Policija (07.08.17)

póndźela, 07. awgusta 2017 spisane wot:

Třo zranjeni po njezbožu

Rěčicy. Při wobchadnym njezbožu na zwjazkowej dróze B 115 su so wčera popołdnju tři wosoby zranili. 48lětna wodźerka Škody bě krótko po 15 hodź. z Rěčic do Mužakowa po puću. Dokelž chcyše naprawo wotbočić, pomjeńši swoju spěšnosć, zo by kolesowarjow na jich šćežce nimo jěć dała. To pak za njej jěducy 30lětny wodźer Mazdy po wšěm zdaću přepozdźe pytny a do Škody zrazy. Nimo wobeju šoferow so tohorunja 53lětna sobujěduca w prěnim awće zrani. Na woběmaj jězdźidłomaj nasta dohromady ně­hdźe 13 000 eurow škody. Na městnje njezboža dóńdźe krótki čas k poćežowanjam wobchada. Dokładnu přičinu zražki policija nětko přepytuje.

Policija (04.08.17)

pjatk, 04. awgusta 2017 spisane wot:

Bjerjer zastajencow w jastwje

Zhorjelc. Wutoru wječor je 32lětny we Wuskidźi najprjedy dwě dźěsći a po tym jeju 27lětnu mać jako zastajencow wzał. SEK muža přemó a jeho nachwilnje zaja (SN rozprawjachu). Přepytowanski sudnik Zhorjelskeho hamtskeho sudnistwa je wčera rano přećiwo wobskorženemu na próstwu Zhorjelskeho statneho rěčnistwa zajeće branja zastajencow a wotpohladneho zranjenja ćěła dla přikazał. Skućićelej hrozy pjeć do 15 lět jastwa.

Wobornicy kóčku wuchowali

Biskopicy. Dźensa dopołdnja je woby­dler na Lessingowej w Biskopicach měšćansku wohnjowu woboru wo pomoc prosył. Dokelž sedźeše kóčka hižo hodźiny dołho na chětro nahłej třěše a muž njemóžeše ju tež z ani jeničkej hrajku dele zwabić, njewědźeše sej wón žaneje rady a woleše hawarijowe čisło wobory. Na kóncu wšak móžeštaj wobsedźer kóčki a jeho žona swojeho lubuška cyle zbožownaj zaso do ruki wzać.

Nachribjetnik a wačok fuk

Policija (03.08.17)

štwórtk, 03. awgusta 2017 spisane wot:

Z třomi promilemi za wodźidłom

Kamjenc. Zastojnicy Kamjenskeho policajskeho rewěra su so wutoru wječor njemało dźiwali, kontrolujo 42lětneho šofera BMWja na Christiana Weißmantelowej. Měrjenski nastroj jim pokazowaše, zo ma muž tři promile alkohola w kreji. Při tym bě samo hišće awto wodźił. To pak nětko dlěši čas wjac njebudźe, dokelž jemu zastojnicy nablaku jězbnu dowolnosć sćazachu. Nimo toho leži pad jako njeskutk na blidźe Zhorjelskeho statneho rěčnistwa.

79lětna do Opela zajěła

Nowe Město. Na Sprjejčanskim puću w Nowym Měsće je wutoru připołdnju 79lětna ze swojim Huyndaijom do parkowaceho Opela zajěła. Při tym so njekedźbliwa šoferka lochko zrani. Wěcna škoda wučinja něhdźe 7 000 eurow.

Sydom zranjenych při njezbožach

Zhorjelc. We wobłuku Zhorjelskeje policajskeje direkcije, kotrejž nimo wobłuka awtodróhi A 4 šěsć policajskich rewěrow přisłuša, registrowachu wčera 59 wobchadnych njezbožow. Sydom wosobow je so zraniło.

Policija (02.08.17)

srjeda, 02. awgusta 2017 spisane wot:

Wopity dźěsću z nožom hrozył

Wuskidź. K njewšědnemu zasadźenju policije, wohnjoweje wobory a wuchowanskeje słužby dóńdźe wčera we Wuskidźi (Weißkeißel). Najprjedy bě tam 32lětny wopity Libanonjan před domom požadarjow wo azyl maćeri ćěšenka namócnje wutorhnył. Po tym zo bě jeho zaso wróćił, wza sej wosomlětneho hólca a hrožeše jemu z nožom. Wot zastojnikow žadaše sej mjez druhim medikamenty. Krótko na to wón wosomlětneho pušći a wza sej jeho 27lětnu mać jako zastajenču. Po tym zo su jemu sobudźěłaćerjo wuchowanskeje słužby medikamenty dali, wzda so tež žony. Zastojnicy SEK muža přemóchu. Dźěsći a mać dowjezechu do chorownje.

Policija (01.08.17)

wutora, 01. awgusta 2017 spisane wot:

22lětny so před ćah stupił

Biskopicy. 22lětny Libyčan je so wčera w nocy w Biskopicach před čakacy ćah na kolije stupił a jemu tak znjemóžnił dypkownje wotjěć. Dokelž bě młodostny na bordowym nuzniku kurił, jemu personal ćaha dalejězbu zakaza. Tak je so na ćěridłowym wozu kruće dźeržał. Kaž so wukopa, steješe njeskutka podhladny pod wliwom wopojenskich srědkow. Krótko do přichada policije wopojeny pasažěra při wulězenju wotpohladnje storči a na njeho pluny. Zastojnicy Habrachčanskeje zwjazkoweje policajskeje inspekcije jeho a dalšeju Libyčanow, kotrajž měještaj cuzu móšeń a papjery při sebi, nachwilnje sobu wzachu. Jim hrozy chłostanje nuzowanja, padustwa a zranjenja ćěła dla.

Nakładne awto do přirowa zajěło

Łužnica. Na B 97 blisko Łužnicy je wčera dopołdnja nakładne awto do přirowa zajěło, dokelž bě šofer kontrolu nad wodźidłom zhubił. LKW so na to zwróći a tony ćežke róle płata so z njeho kulachu.

Policija (31.07.17)

póndźela, 31. julija 2017 spisane wot:

Šofer zatłusnjeny był

Čorny Chołmc. Na Skalnym puću w Čornym Chołmcu je wčera wječor šofer do štoma zrazył. Dokelž bě z dotal njeznateje přičiny kontrolu nad wodźidłom zhubił, zjědźe wón z jězdnje a so při zražce w awće zatłusny. Čornochołmčanscy a Wojerowscy wobornicy jeho ćežko zranjeneho wuswobodźichu.

Kólnja so wotpaliła

Mortkow. Sobotu dopołdnja je so w Mortkowje z dotal njeznateje přičiny kólnja na njewobydlenej ležownosći wotpaliła. Wěcna škoda wučinja něhdźe 5 000 eurow. Kriminalna policija přičiny wohenja přepytuje.

Policija (28.07.17)

pjatk, 28. julija 2017 spisane wot:

Spěšnosć měrili

Łaz/Bjedrichecy. Hnydom na dwěmaj městnomaj we Łazowskej gmejnje su zawčerawšim wječor spěšnosć jězdźi­dłow kontrolowali. W času wot 18 do 23 hodź. jědźechu we Łazu a w Bjedrichecach cyłkownje 304 awta nimo mobilneho błyskača. W kóždej ze wsow su štyrjo šoferojo dowolene 50 km/h překročili. We Łazu bě najspěšniši šofer Opela z 79 km/h, a w Bjedrichecach tohorunja Opel ze 77 km/h.

Paduch awta lepjeny

Wojerecy. W nocy na štwórtk su policisća we Wojerecach paducha awta lepili a nachwilnje zajeli. Dalšim padustwam pak zadźěwać njemóžachu. Cyłkownje su policiji w tej nocy tři pady pospytaneho a padustwa awtow w měsće přizjewili.

Policija (27.07.17)

štwórtk, 27. julija 2017 spisane wot:

Konjej po jězdni běhałoj

Jitk. Wčera rano je na statnej dróze S 101 k njezbožu z konjom dóšło. Kaž policija zdźěla, bě so 31lětny šofer Golfa chětro nastróžił, jako steješe rano w pjećich w Jitku nadobo kóń před nim na jězdni. Wodźer awta drje spyta so wuwinyć, zrazy pak do dalšeho swobodnje běhaceho ko­nja. Krótko na to běchu policisća a wobsedźerka na městnje a zwěsćichu, zo njeběchu konjej kaž tež šofer na zbožo zranjeni. Na awće nasta škoda 2 000 eurow.

Policija (26.07.17)

srjeda, 26. julija 2017 spisane wot:

Předjězbu njewobkedźbował

Kamjenc. Šěsć zranjenych a wjacore tysacy eurow škody je bilanca ćežkeho nje­zboža wčera wječor w Kamjencu na statnej dróze S 94. Z Němskich Pazlic přijěducy 69lětny šofer Subaruwa njebě na křižowanišću w Jěžowje předzjěbu wobkedźbował a do VWja zrazy. Šofer Subaruwa a sobujěducej žonje w VWju so ćežko zranichu, 19lětny šofer VWja a dalšej sobujěducaj lochce. Zo bychu zranjenych tak spěšnje kaž móžno w chorowni zastarać móhli, běchu nimo Kamjenskeje wohnjoweje wobory dwaj helikopteraj, štyri wuchowanske wozy kaž tež nuzowy lěkar zasadźeni. S 94 bě ně­hdźe tři hodźiny zawrjena. Škodu na awtomaj trochuje policija na něhdźe 22 000 eurow. Policija za přičinu njezboža slědźi.

Policija (25.07.17)

wutora, 25. julija 2017 spisane wot:

Handy wažniši był hač wobchad

Rakecy. Policija prosy wo pomoc při wujasnjenju njezboža. Na Rakečanskej Zahrodowej bě sobotu kolesowar do Daewoowa zrazył – wón bě so bóle handyjej wěnował hač wobchadej – a ćeknył. Na awće nasta škoda něhdźe tysac eurow. Policija pyta za něhdźe 25lětnym 1,75 metrow wulkim mužom z krótkimi čornymi włosami. Koleso měješe tak mjenowane buwołowe wodźidło. Informacije přijimuje Wojerowski policajski rewěr.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND