Policija (20.04.22)
Bydlenski mobil pokradnył
Brěza. Wobsedźerjo bydlenskeho mobila su jutry póndźelu popołdnju w Brězy (Birkau) pola Hodźija přestawku zapołožili. Jako so po poł hodźinje wróćichu, bě jězdźidło preč. Policija wuhlada je bórze na to w Strahwaldźe, hdźež awto do směra na Žitawu jědźeše. Zastojnicy chcychu mobil zadźeržeć, šofer pak spyta ćeknyć, při čimž policajske awto wobškodźi. Zajěwši na łuku spyta skućićel pěši twochnyć. Jeho pak spěšnje dosahnychu a zajachu. Škoda wučinja 17 000 eurow.
Policija (19.04.22)
Předjězbu njewobkedźbował
Dźěwin. Wjacori zranjeni běchu wuslědk wobchadneho njezboža jutrowničku popołdnju w Dźěwinje. 91lětny wodźer awta njebě tam předjězbu dalšeho jězdźidła wobkedźbował a do njeho zrazy. Štyri wosoby so ćežko zranichu, mjez nimi bě dźewjeć měsacow stary ćěšenk.
Policija (14.04.22)
W zahrodowych domčkach pobyli
Ćisk. Zahrodkownišćo bě cil paduchow předwčerawšim w Ćisku. Tam zadobychu so do pjeć zahrodowych domčkow a do dalšich pódlanskich přitwarkow. Z nich pokradnychu najwšelakoriši grat, mjez druhim akušrubowak a piłu. Hódnotu rubizny trochuje policija na 1 500 eurow. Nimo toho načinichu skućićeljo 800 eurow wěcneje škody.
Policija (13.04.22)
Do nakładneju awtow zrazył
Pančicy-Kukow. Wobchadne njezbožo je so wčera připołdnju na kromje Pančic-Kukowa stało. Z Kamjenca přijěducy wodźer Mercedesa chcyše nakładne awto přesćahnyć, njewobkedźbowaše pak napřećo přijěducy Lkw a skónčnje do wobeju zrazy. Dwě wosobje z Mercedesa dyrbjachu do chorownje dowjezć, wodźerjej Lkw-jow so njezraništaj. Statna dróha S 100 bě mjez wotbóčku do Jawory a Pančicami dwě hodźinje zawrjena.
Policija (12.04.22)
Ćežke njezbožo
Rachlow. 38lětny muž budźe so dyrbjeć dlěje w chorowni lěkować dać. Tón bě zašłu sobotu z Wulkich Ždźarow na wokrjesnej dróze 9221 z awtom typa Opel Astra znjezbožił. W křiwicy zajědźe wón z jězdneje, při pospyće směr korigować, zrazy do dweju štomow, prjedy hač njewosta wosrjedź jězdneje stejo. Šofer so při njezbožu ćežko zrani. Awto je dospołnje skóncowane.
Policija (11.04.22)
Wosobowe awto dospołnje wotpalene
Wudwor. 55lětny wobsedźer domskeho bě sobotu popołdnju we Wudworju popjeł do tony za zbytne wotpadki sypnył. Tutón pak běše po wšěm zdaću hišće horcy, tak zo so wotpadkowa tona zapali. Na to přeskoči woheń na dalšu tonu a na blisko wotstajene wosobowe awta typa Rover, kotrež so dospołnje wupali. Wohnjowa wobora tomu zadźěwa, zo woheń na bliski bydlenski dom přeskoči. Na zbožo njeje so při wohenju nichtó zranił. Wěcna škoda wučinja něhdźe 6 000 eurow.
Policija (08.04.22)
Wudźerja wobkradnyli
Budyšin. Na Budyskej Njekowej dyrbješe wobydler wutoru popołdnju zwěsćić, zo bě něchtó jeho wudy, saki, kumštne wudźenki a wjele dalšeho wudźerskeho wuhotowanja z pincy wjaceswójbneho domu pokradnył. Kaž policija zdźěli, je wuhotowanje nimale 4 000 eurow hódne. Dalša škoda po wšěm zdaću nastała njeje. Kriminalna policija pad přepytuje.
Policija (07.04.22)
Wjace škody hač rubizny
Wojerecy. Tójšto škody načinili su njeznaći w času wot póndźele popołdnja do wutory dopołdnja we Wojerowskim zahrodkownišću na Brězowym puću. Tam zadobychu so do sydom twarjenjow. Pokradnyli su kable a pisany metal. Łamachu zamk duri, při tym nasta něhdźe 10 000 eurow wěcneje škody. Rubizna bě po informacijach policije 500 eurow hódna.
Policija (06.04.22)
Rozestajenje na puću
Budyšin. Při Cyhelskim nasypje w Budyšinje je minjenu sobotu k rozestajenju mjez mužomaj dóšło. Wobaj dyrbještaj z awtom při ampli čakać. Šofer Hyundaja wulěze a so ze šrubowym klučom w ruce do 46lětneho ukrainskeho wodźerja VWja, kiž za nim steješe, da. Štyrjo swědkojo, kotřiž běchu scenu wobkedźbowali, njemdreju mužow dźělachu. Kaž policija rozprawja, jedna so při podhladnym wo 69lětneho ruskeho staćana. Čehodla bě so wón do tamneho dał a so z nim rozestajał, policija nětko přepytuje. Na zbožo njeje so nichtó z wobdźělenych wosobow zranił.
Policija (05.04.22)
Napadne awto pokradnyli
Mučow. Stare awta poprawom cil paduchow njejsu. Hdyž pak so wo jězdźidło za rallye jedna, je to po wšěm zdaću hinak. W Mučowje su njeznaći minjenu sobotu 36 lět stary Suzuki pokradnyli. Módre awto je něhdźe 5 000 eurow hódne. Jeho wobsedźer bě je tak přetwarił, zo móžeš z nim rallye jězdźić. Awto ma čornu škitnu konstrukciju a powjazowy nawijak (Seilwinde) přitwarjeny. Nimo toho je na nim wjele nalěpkow. Tež dwaj nastrojej za nabiwanje baterijow w cyłkownej hódnoće 160 eurow so z garaže zhubištej. Dale nasta něhdźe 100 eurow wěcneje škody. Policija pyta nětko swědkow, kotřiž su napadne jězdźidło snano wuhladali. Pokiwy přijimuja pod telefonowym čisłom 03581 468100.
