Policija (28.12.16)

srjeda, 28. decembera 2016 spisane wot:

Z awtom do latarnje

Połčnica. Na Kamjenskej dróze w Połčnicy je wčera popołdnju wodźerka awta kontrolu nad jězdźidłom zhubiła. Najprjedy zrazy do płotu a na to do latarnje. Zranjenu šoferku dyrbjachu do chorownje dowjezć. Połčničanscy wohnjowi wobornicy su dróhu wuběžaneho bencina dla wurjedźili.

Tysac eurow škody načinili

Hodźij. Mjez swjatymi dnjemi běchu so njeznaći na Hodźijskej Krótkej hasy do tam wostajeneju jězdźidłow zadobyli. Što paduši w małotransporteru, kotryž bě z njerjadom nakładowany, a w Peugeoće pytachu, njeje jasne. Načinjena wěcna škoda wučinja tysac eurow.

Randalěrar lepjeny

Budyšin. Policija je wčera w nocy na Budyskej Dr. Salvadora Allendowej wopiteho kolesowarja lepiła. Zastojnicy widźachu, kak bě 27lětny, kiž měješe něhdźe 1,5 promilow alkohola w kreji, wokno busoweje čakarnje rozbił.

Běrow AfD wobškodźili

Budyšin. W nocy na wutoru su njeznaći na Budyskej Jerjowej na fasadu běrowa AfD z barbu pjelnjene hodowne kule mjetali a wjacore wokna wozbili.

Policija (27.12.16)

wutora, 27. decembera 2016 spisane wot:

Ćežkozranjenaj po njezbožu

Załom. Z hišće njewujasnjeneje přičiny je 26lětny wodźer Golfa wčera připoł­dnju w Załomju pod Hrodźišćom při wotbočenju nalěwo napřećo přijěducy VW Polo přewidźał. Při zražce so wodźer Golfa a 27lětna šoferka Pola ćežko zraništaj. Cyłkowna wěcna škoda wučinja 15 000 eurow.

Do pincow so zadobywali

Budyšin. Njeznaći běchu so minjeny kónc tydźenja na Hannsa Eislerowej w Budyšinje do štyrjoch pincow wjaceswójbneho domu zadobyli. Mjez druhim pokradnychu tam paduši keyboard w hódnoće něhdźe 300 eurow.

Awto so paliło

Kamjenc. Na Wuchodnej dróze w Kamjencu je so njedźelu dopołdnja wo­srjedź jězby tři měsacy stary Peugeot zapalił.­ 52lětny šofer słyšeše syčenje, a njeposrědnje po tym sapachu ze zadnjeho dźěla awta płomjenja. Wjacori pasanća a připa­dnje přidružaca so policajska patrulja woheń spěšnje zhašachu. 57lětny pomocnik so při hašenju lochko zrani.

Z 1,08 promilemi po puću

Policija (23.12.16)

pjatk, 23. decembera 2016 spisane wot:

Njezboža woškrota dla

Budyšin. Lochke miholenje a temperatury wokoło nule, to bě w nocy a dźensa rano strašna měšeńca na dróhach. Z teje přičiny dóńdźe w Budyskim wokrjesu k wjacorym wobchadnym njezbožam. Na awtodróze mjez Ohornom a Hornim Wujězdom su hnydom wjacori šoferojo kontrolu nad swojim jězdźidłom zhubili, počachu so suwać a zrazychu do so. Byrnjež to jenož mjeńše njezboža byli, so wobchad na wosom kilometrach haćeše. We Weickersdorfje pola Biskopic prasny nakładne awto do płotu a skóncowa jón. Tež awto so wobškodźi. W Ohor­nje suny so VW po skłoninje dele, a wotwlečenska słužba dyrbješe jón wućahnyć. Kelko zranjenych při tymle a dalšich njezbožach bě, njeje znate.

Nahi w awće sedźał

Kubšicy. W nocy na srjedu zadoby so njeznaty w Kubšicach do firmy na Lubijskej dróze. Tam bě zachodne wrota a wokno Citroëna ze železnej žerdźu rozbił. Jako policisća přijědźechu, nańdźechu 23lětneho naheho na zadnim sydle Citroëna sedźaceho.

Policija (22.12.16)

štwórtk, 22. decembera 2016 spisane wot:

Wulku škodu načinili

Mały Wjelkow. W Małym Wjelkowje běchu so njeznaći wčera rano do kupnicy na Wojerowskej dróze zadobyli. Po prěnich dopóznaćach tam drje ničo pokradnyli njejsu, wěcna škoda rozbitych duri dla pak wučinja něhdźe 10 000 eurow.

Wopity z awtom jěł

Wjazońca. Na statnej dróze S 119 sta so wčera pola Wjazońcy ćežke njezbožo. 39lětny wopity šofer bě kontrolu nad jězdźidłom zhubił a na łuku zajěł. Wěcna škoda je něhdźe 5 000 eurow.

Policija (21.12.16)

srjeda, 21. decembera 2016 spisane wot:

Bjez jězbneje dowolnosće

Połčnica. Překwapjenku dožiwichu policisća, kotrychž su wčera rano k wobdźěłanju wobchadneho njezboža na awtodróze A 4 pola Połčnicy wołali. Najskerje techniskeho defekta dla bě so ćežke nakładne awto na prawy bok jězdnje dóstało a do nabóčneho wobhrodźenja zrazyło. Wěcna škoda wučinja po prěnim trochowanju wjacore dźesaćitysacy eurow. Při zwěsćenju blišich wobstejnosćow nje­zboža zastojnikam napadny, zo 30lětny šofer přewodneho awta scyła žanu jězbnu dowolnosć njeměješe. Nimo toho reagowaše wón pozitiwnje na drogowy test. Policisća su 30lětneho na to tuž k wotedaću kreje přewodźeli.

Policija (20.12.16)

wutora, 20. decembera 2016 spisane wot:

Armatury kradnyli

Budyšin. W času wot soboty wječora do njedźele ranja běchu so njeznaći na Budyskej Kolpingowej do twarnišća wja­ceswójbneho domu zadobyli. Z jedneje kupjele wottwarichu sanitarne armatury a su je sobu wzali. Škodu trochuja na něhdźe­ 900 eurow.

Policija (19.12.16)

póndźela, 19. decembera 2016 spisane wot:

Hudźby dla so storkali

Budyšin. K rozestajenju mjez šěsć młodymi ćěkancami a runje telko domoródnymi je sobotu wječor na Budyskich Wjacławskich wikach dóšło. Přičina najskerje bě, zo měješe jedyn z migrantow hudźbu z handyja wótře nastajeju. Po werbalnym rozestajenju młodostni do so storkachu. Ćěkancy so na to wotsalichu.

Policija (16.12.16)

pjatk, 16. decembera 2016 spisane wot:

W bydlenju kradnyła

Łaz. Lochkomyslnosć wobydlerki je nje­znata žona zawčerawšim we Łazu k padustwu wužiła. 87lětna wjesnjanka bě dopołdnja swój dom wopušćiła, zo by po šćěpki šła. Po wšěm zdaću pak durje njezamkny,­ tak zo móžeše cuza žona zastupić. Jako so rentnarka wróći, wona njeprošeny wopyt wuhlada a jemu ka­zaše, dom a ležownosć wopušćić. Hakle pozdźišo staruška pytny, zo běchu w spanskej stwě wšitke kamory přeborkane a zo je so mały drjewjany kašćik z wopismami a medaljemi w hódnoće ně­hdźe 50 eurow zhubił.

Policija (15.12.16)

štwórtk, 15. decembera 2016 spisane wot:

Psa dračowali

Bórk. Z padom přeńdźenja na zakonju wo škiće zwěrjatow so policija w Bórku zaběra. Tam bě žona srjedź nowembra swojeho psa ke skótnemu lěkarjej donjesła. Tón namaka w črjewje štyrinohača připinawki (Reiß­zwecke), dźěle wótreho brjenka (Messerklinge) a jěd pře wulke myše. Po wšěm zdaću běchu njeznaći wokoło domu žony w Bórku abo w lěsku sewjernje Sprjewineho hotela zajědojćene wabjenki wupołožili. Pos ćežko zranjeny přežiwi. Nětko pytaja swědkow, kotřiž su něšto podhladne wobkedźbowali, abo wobsedźerjow psow, kotrychž lubuški běchu potrjechene. Pokiwy přijimuja pod telefonowym čisłom 03591/ 35 60.

Zawinowarja wuslědźili

Hamor. Ćeknjeneho zawinowarja wobchadneho njezboža w Hamorje je policija zawčerawšim rano spěšnje wuslědźiła. Muž bě ze swojim Mitsubishijom blisko milinarnje po puću. Byrnjež to tam zakazane było, wón wodźerja mopeda přesćahny a jemu puć wotrězny. 16lětny na to kontrolu nad mopedom zhubi, padny a so snadnje zrani. Wodźer awta ćekny. Zastojnicy Běłowodźanskeho policajskeho rewěra pak 28lětneho wuslědźichu.

Policija (14.12.16)

srjeda, 14. decembera 2016 spisane wot:

Woheń ze smjertnym woporom

Wóspork. Při hašenju wohenja su wobornicy wčera rano we Wósporku ćěło muža namakali. Něhdźe w 7.30 hodź. wołachu jich k hašenju wohenja w jednoswójbnym domje na Schillerowej. Na hornim poschodźe namakachu wuchowarjo ćěło 86lětneho wobydlerja. Nuzowy lěkar móžeše jenož hišće jeho smjerć zwěsćić.

nawěšk

nowostki LND