Policija (10.05.21)
Bjez zawěsćenja a pod alkoholom
Budestecy. Sobotu wječor kontrolowachu w Budestecach 19lětneho, kiž bě tam z e-scooterom po puću. Za swoje jězdźidło pak njeměješe młodostny trěbne zawěsćenje. Nimo toho zastojnikam napadny, zo bě wón alkohol pił. Pola njeho naměrichu 0,49 promilow. Tež za to změje so 19lětny zamołwić. Wšako w probowym času jězbneje dowolnosće scyła pod wliwom alkohola jězdźić njesmě.
Policija (07.05.21)
Třoch podhladnych zwěsćili
Běła Woda. Woheń w něhdyšim Běłowodźanskim ludowym domje je hobersku škodu načinił. Něhdźe 200 wohnjowych wobornikow bě wot 25. apryla hač do přichodneho zažneho ranja płomjenja hašało. Kriminalna słužba je hižo za čas hašenja zjawnje za swědkami pytała. Po wuhódnoćenju wjacorych pokiwow je policija nětko třoch podhladnych zwěsćiła. Wumjetuja jim, zo su njedźelu, 25. apryla, na ležownosći kulturneho domu woheń zamiškrili. Kaž kriminalisća mjeztym zdźělichu, běchu skućićeljo stólcy a plany zapalili, štož bě přičina wudyrjeneho wohenja. Kak běchu so do domskeho dóstali, ma so z wuhódnoćenjom slědow zwěsćić. Zamiškrjenja wohenja podhladni su dwaj młodostnaj a jedyn dorosćacy němskeho pochada.
Policija (06.05.21)
Pilota slepili
Halštrow. Dotal njeznaći su wutoru w nocy z laserowym pokazowakom pilota helikoptera sakskeje policije slepili, kotryž bě nad awtodróhu A 4 pola Porchowa po puću. Wužiwanej laseraj běštej jara intensiwnej a swěćeštej ze směra Halštrowa na helikopter. Najebać wohroženje je so tón wěsće na zepěranišćo wróćił. Bjez wuspěcha wostachu zastojnicy, kotřiž za podhladnymi pytachu.
Lětacy trampolin
Kamjenc. Chětro nastróžił je so šofer linijoweho busa w Kamjencu, jako wón wutoru popołdnju swoju jězbu zakónči. Na wotbóčce Macherowa/Hansa Gradowa je lětacy trampolin do busa zrazył. Wichor bě nastroj do toho na přestrjeni předewzaća ze zakótwjenja wutorhnył. Lětacy objekt wobškodźi wokno a motorowu hawbu busa.
Wodźer awta wopak šaltował
Słona Boršć. Na wotpočnišću Hornja Łužica na A 4 pola Słoneje Boršće je tohorunja wutoru popołdnju 84lětny muž z awtom marki Ford Transit do twarjenja zastanišća zrazył. Po wšěm zdaću bě so wón w awtomatiskim šaltowanju mylił. Po prěnim trochowanju wučinja cyłkowna škoda něhdźe 10 000 eurow.
Policija (05.05.21)
Pod wliwom drogow awto wodźił
Budyšin. Na Tzschirnerowej w Budyšinje su policisća póndźelu wječor krótko do wosmich šofera Škody kontrolowali. Woni zwěsćichu, zo steješe 24lětny pod wliwom drogow. Zakazachu jemu na to, dale jěć a přizjewichu jeho přestupjenja wobchadneho porjada dla.
Policija (04.05.21)
Pytaja paducha bleški limonady
Budyšin. Na tankowni při Budyskej Róžowej bě muž sobotu wječor wokoło sedmich blešku limonady spakosćił. Policija so z padom zaběra a prosy swědkow so pod tel. čo. 03591 / 356 0 přizjewić. Škoda wučinja 2,15 eurow. Za čas padustwa běchu wjacore wosoby w tankowni. Paduch bě markantny kabat z kapucu woblečeny.
Policija (03.05.21)
Wulka škoda diesela dla
Cokow. 72 wohnjowych wobornikow Budyskeho wokrjesa dyrbješe 1. meje dźěłać. W 11.30 hodź. alarmowachu Budysku powołansku a dobrowólne wobory z Wjelećina, Kumwałda, Medingena, Wachauwa a Huski. Wudźer bě dopołdnja w skale pola Cokowa na wodźe něšto płuwać widźał, při čimž za dieselom smjerdźeše. Wudźerjo a zastojnicy wućehnjechu dieselowy tank ze skały. Njecyłu hodźinu pozdźišo podachu so wobornicy ze Zemic-Tumic a Korzymja-Rodec z hadźicowym čołmom na wodu a sćehnjechu tam zawěru, doniž něhdźe 90 procentow wuběžaneho wolija njezezběrachu. Připrawichu na to wosebite hubicy, z kotrymiž ma specialne předewzaće přichodne dny wšitko wurjedźić. Policija pad nětko přepytuje.
Policija (30.04.21)
Wobšudnikej pjenjezy přepokazała
Budyšin. Wobydlerku na Budyskej Martina Hoopowej su njeznaći tele dny wobšudźili. 54lětna Budyšanka bě SMSku dóstała, zo ma mužej, kiž so jako jeje syn wudawaše, na konto w Španiskej cyłkownje 3 500 eurow přepokazać. Wona jemu tuž próstwu spjelni. Krótko po tym pak zwěsći, zo njebě to jeje syn, kiž sej pjenjezy žadaše, ale wobšudnik, a přizjewi to policiji. Kriminalna policija pad nětko přepytuje.
Policija (29.04.21)
Hałzy a lisćo so palili
Demjany. Zašłu nóc dyrbjachu dobrowólni wohnjowi wobornicy z Demjan, Huski, Drječina/Warnoćic, Hnašec, Dobruše a Noweje Wsy lěsny woheń při statnej dróze S 119 pola Nowych Demjan hašeć. 45 kameradow ze sydom jězdźidłami bě zasadźenych. Rozhladujo so wuhladachu woni woheń, kotryž běchu wobydlerjo přizjewili. Běše to njezawěsćeny a njehašeny lěhwowy woheń, hdźež bě něchtó lisćo a hałzy zapalił. Wobornicy płomjenja zhašachu. Policija so nětko z padom dale zaběra. Wšako móže tajki kaž wčera spěšnje na wokolne štomy přeskočić.
Policija (28.04.21)
Dwě njezboži na A4
Budyšin. Na awtodróze A4 mjez wotjězdomaj Budyšin-wuchod a Wósporkom je so wčera rano nakładnemu awtu wobruč skóncowała. Za sedłowym wlečakom jěducy Seat njemóžeše so lětacym dźělam wuwinyć a zrazy do njeho. Škoda na jězdźidłomaj wučinja něhdźe 10 000 eurow. Wobaj šoferaj wostaštaj njezranjenaj.
Njezbožo na samsnej čarje pola Połčnicy měješe hrozniše sćěhi. Wokoło 8.30 hodź. bě 59lětny šofer nakładneho awta přepozdźe zwěsćił, zo so wobchad do směra na Drježdźany haći, a zajědźe do před nim stejaceho Lkw-ja. Muž z Běłoruskeje móžeše ćežko zranjeny hišće sam wulězć. Z helikopterom transportowachu jeho do chorownje. 37lětny Polak w awće před nim wosta njezranjeny. Wěcna škoda na jězdźidłomaj wučinja po prěnim trochowanju 60 000 eurow. Wo rumowanje starachu so wohnjowi wobornicy, Techniska pomocna słužba kaž tež sobudźěłaćerjo awtodróhoweje mištrownje. Policija bě čaru dospołnje zawrěła, štož hač do zažneho popołdnja traješe. Tak stejachu čakace awta zdźěla hač k parkowanišću Röderska dolina.
Policija (27.04.21)
Tři Lkw-je do so zrazyli
Budyšin. Na awtodróze A4 njedaloko wotjězda Budyšin-wuchod su wčera popołdnju tři nakładne awta do so zrazyli. Zranił so na zbožo nichtó njeje.
