Policija (09.04.20)
Plantaža w bydlenju
Budyšin. Zastojnicy Budyskeho policajskeho rewěra su předwčerawšim w jednym tudyšim bydlenju plantažu konopje zwěsćili. Dobry nós wjedźeše jich po schodach wjaceswójbneho domu hač pod třěchu. Tam stejachu rostliny w połnym kćěwje, rěka w rozprawje Zhorjelskeje policajskeje direkcije. Wobydlerjo běchu swoje bydlenje za plahowanje cannabisa dospołnje přerumowali. Woni běchu samo mału rostlinarnju, kajkež su w drogowej scenje z wašnjom, natwarili. Zastojnicy namakachu dohromady 17 konopjowych rostlin kaž tež wjacore sudobja, w kotrychž běchu sušene dźěle dalšich rostlin. Wšo to woni sćazachu a su njeskutk 49lětneho němske- ho wobydlerja přizjewili. Kriminalna policija so z tymle padom nětko bliže zaběra.
Policija (08.04.20)
Spěšnosć měrili
Komorow. Na zwjazkowej dróze B 156 blisko Komorowa pola Klukša, hdźež je 70 km/h dowolenych, je policija předwčerawšim spěšnosć měriła. Do směra na Budyšin přepruwowachu zastojnicy dohromady 250 jězdźidłow, třinaće bě přespěšnych. Njesławny rekord docpě Mazda ze 100 km/h.
Policija (07.04.20)
Smjertnej woporaj njezboža
Njebjelčicy. Hrózbny wobraz skićeše so wuchowanskim mocam, wohnjowym wobornikam a policiji wčera připołdnju na statnej dróze S 94 blisko Njebjelčanskeje wotbóčki. Tam bě so krótko po 12.30 hodź. ćežke wobchadne njezbožo stało. Z dotal njeznateje přičiny zrazyštej transporter typa Fiat a wosobowe awto typa Audi frontalnje do so. Dospołnje skóncowany transporter wosta na třěše ležo, Audi suny so do přirowa. Wodźer transportera bě po wšěm zdaću nablaku mortwy. Šofera wosoboweho awta dyrbjachu z ćežkej techniku z jeho jězdźidła wuswobodźić. Tež wón pak pozdźišo w chorobnym awće wudycha. Nimo dweju helikopterow běchu dźesatki wobornikow a wuchowarjow zasadźene. Wobdźěłanja njezboža a rumowanja wobdźěleneju jězdźidłow dla bě statna dróha wjacore hodźiny dospołnje zawrjena. Za přičinami njezboža policija slědźi.
Policija (06.04.20)
Do bydlenja so zadobyli
Pěskecy. Njeprošeny wopyt mějachu w nocy na sobotu w jednoswójbnym domje w Pěskecach. Tam běchu so cuzy na dotal njeznate wašnje zadobyli. Na delnim poschodźe přepytachu wšitke rumnosće a pokradnychu pjenjezy, laptop kaž tež ručnu tobołku z wupokazami. Škoda wučinja 700 eurow.
Policija (03.04.20)
Złoto skazać chcył
Wulka Dubrawa. Z njewšědnej naležnosću je so 64lětny muž z Wulkeje Dubrawy na policiju wobroćił. Wón chcyše w interneće złoto skazać. K identifikaciji měješe wón kopiju swojeho wupokaza e-mailnje pósłać. To pak bě jemu podhladne, dokelž móhł něchtó cuzy jeho wosobinske daty znjewužiwać.
Policija (02.04.20)
Pozdatneju wobšudźerjow lepili
Němcy. Bjez płaćenja tankować drje chcyštaj mužej w Němcach. Na Kulowskej dróze zadźerža policija 33lětneho šofera Renaulta a 35lětneho sobujěduceho. Kontrolujo jězdźidło zastojnicy zwěsćichu, zo stej značce awta po zdaću falšowanej. Nimo toho namakachu w Renaulće wjacore prózdne bencinowe kanistry a poprawnej awtowej značce za njón. Zaměr podhladneju drje běše tankownja na Drježdźanskej dróze. Čerwjene awto bě policiji hižo časćišo w zwisku z njeskutkami napadnyło.
Policija (01.04.20)
Małe swjedźenje rozpušćili
Budyšin. W nocy na wutoru su policisća w Budyskim a Zhorjelskim wokrjesu dodźerženje płaćiwych postajenjow koronowirusa dla kontrolowali. Při tym wobdźěłachu 52 chłostanskich přizjewjenjow přeńdźenja přećiwo zakonjej wo infekciskim škiće dla a kazachu 20 ludźom, zo měli domoj hić. W Budyšinje na přikład słyšachu haru z bydlenja na Hasy Ricardy Huch. Nimo dweju wobydlerjow běštaj tam hosćej, a wšitcy štyrjo zhromadnje swjećachu. Podobny pad dožiwichu na Löfflerowej we Wojerecach. 28lětny wobydler bě sej sydom ludźi přeprosył. Woni a dalši w Zhorjelcu, Lubiju a Ottendorfje maja nětko z pokutu ličić.
Policija (31.03.20)
Woheń wulku wěcnu škodu načinił
Šěrachow. Wčera dopołdnja stej so na Chróstawskej dróze we Wurbisu bróžnja a domske paliłoj. Po wšěm zdaću bě woheń z tony za wotpadki wuchadźał. Wjacore wohnjowe wobory běchu zasadźene. Wěcna škoda wučinja 100 000 eurow.
Předjězbu njewobkedźbował
Budyšin. Na křižowanišću Mužakowska/Krakečanska w Budyšinje sta so njedźelu wječor wobchadne njezbožo. Wosobowe awto marki Seat Leon bě z Delnjeje Kiny přijěło, bjeztoho zo by 21lětny šofer předjězbu małotransportera marki Opel Morena wobkedźbował. Tón přijědźe ze směra Budyšin-Bórk a zajědźe do sćežora ample. 47lětna wodźerka Opela a 20lětna sobujězdźerka Seata so zraništej. Wěcna škoda wučinja něhdźe 25 000 eurow.
Policija (30.03.20)
Pjekarnja wobškodźena
Wulki Šunow. Sobotu wječor chwataštej wohnjowa wobora a policija do Wulkeho Šunowa. Tam dyrbjachu w pjekarni při Hłownej dróze woheń hašeć. Přičina njeje dotal jasna. Palił je so drjewjany twar při pjekarni, kotryž za swjedźenje wužiwaja. Wokna do pjekarnje běchu horcoty dla rozškrěte, a kur stupaše do objekta. Wohnjowa wobora móžeše na zbožo tomu zadźěwać, zo so płomjenja dale rozpřestrěja. Mějićel trochuje škodu na něhdźe 30 000 eurow. Wšako buchu wulkeho kura dla, kiž bě so do pjekarnje dóstał, wjacore mašiny wobškodźene. Ludźo so při wohenju zranili njejsu. Kriminalna policija městnosć njezboža nětko dokładnje přepytuje.
Policija (27.03.20)
Njewočakowana překwapjenka
Zhorjelc. Zhorjelscy zarjadnicy so wutoru njemało dźiwachu. Jako k swojim awtam přińdźechu, witaše jich wóń kwětkow. Njeznaći běchu pod woknotrějaki kóždeho policajskeho jězdźidła, kotrež stejachu před rewěrom na Gobbinowej, róžu tyknyli. Zarjadnicy dźakuja so nje-znatym darićelam za spodobne floralne hódnoćenja swojeho dźěła.
