Hospodliwi jeno štyri dny?

pjatk, 10. julija 2015
artikl hódnoćić
(1 )
Marian Wjeńka

Łužica je tele dny potajkim zaso raz pupk swěta, znajmjeńša folklorneho. Hdyž ­při­jědźe telko hudźbnych a rejwanskich skupin k nam, směmy tajke wopisowanje swojeje domizny runjež raz za sebje wužiwać. Telko rozdźělnych ludźi, zajimawych kulturow a wšelakich nabožinow dźě tu kóždy dźeń njedožiwjamy. Je to­ wulkotna składnosć, zbližić sej mysle­ hosći, woznam jich spěwow a pozadk jich ­rejow. Bjez dźiwa, zo tysacy wopy­towarjow tule móžnosć wužiwaja, sej programy jednotliwych skupin dźensa w Hochozy a kónc tydźenja w Chró­sćicach wobhladaja a so zawěsće wo­bo­ha­ćeni zaso domoj podadźa.

Bohužel so kóždy swjedźeń raz skónči. A hdyž poslednja festiwalna ­fanfara za­ju­třišim nawječor pod Fulkec hórku wu­klin­či, budźe tež 11. mjezynarodny folklorny festiwal „Łužica 2015“ stawiznam přisłušeć. Wšitcy budu potom serbsku a łužisku hospodliwosć chwalić a wuzběhować, kak wotewrjeni tule smy.

wozjewjene w: Rozmyslowane
Prošu přizjewće so, chceće-li komentar podać

Serbska debata

nowostki LND