Připrawja křiž a kulu
Smječkecy. Jutře, sobotu, je tak daloko! Na wěži Smječkečanskeje cyrkwički budźe so nětko znowapozłoćany křiž zybolić. Štóž nochce to skomdźić, je w 15 hodź. wutrobnje k nyšporu přeprošeny. Po tym připrawja tam zaso křiž a kulu na wěžu. Štož su w kuli namakali, pokazuje Gerhard Schmeling zajimcam w małej wustajeńcy.
Swjeća zaso z „kotołom pisaneho“
Koćina. Jutře a njedźelu wotměje so w Koćinje wjesny swjedźeń. Hižo wot 11 hodź. wubědźuja so jutře dźěći a mužojo wokolnych wsow na Koćinskim sportnišću w kopańcy. Žony hraja tam wot 14 hodź. volleyball. Wšitke dalše zarjadowanja pak su na swjedźenskej łuce „při konsumje“ napřećo wjesnej kapałce. Wot 21 hodź. budu tam reje z diskoteku. Njedźelu su wšitcy wot 10 hodź. na rańše piwko přeprošeni a w 15.30 hodź. započnje so legendarny, mjeztym 18. Koćinski „kotoł pisaneho“.
Bodo čaka na dźěći
