Ćěkancy a jich podpěraćeljo su zaměr nadpadow

Drježdźany (dpa/SN/K). Dźiwajo na to, zo přiběraja w Sakskej aktiwity napřećo cuzym a jich podpěraćelam, so wěstotna situacija w swobodnym staće pohubjeńša. Eksperta CDU za nutřkowne naležnosće Christian Hartmann zwěsća „spiralu šćuwańcy, hidy a namocy“, z čimž je „čerwjena­ linija“ doskónčnje překročena. Tohodla dyrbi so wěstotne połoženje w Sakskej znowa pohódnoćić. „Tajki přirost namocy njejsmy dźesać lět dołho měli“, rjekny šef frakcije Lěwicy w krajnym sejmje Rico Gebhardt, „napjelnja nas ze starosću, zo so atmosfera w towaršnosći spochi přiwótřa a zo su ludźo kaž tež organizacije, kotřiž so za naležnosće ćěkancow zasadźeja, nadpadam wustajeni.“ W nocy na póndźelu běchu nje­znaći awto Freitalskeho politikarja Lě­wicy Michaela Richtera skóncowali. Kaž Operatiwny wotwobaranski centrum (OAZ) zwěsći, bu wozydło wot zakaza­neho praskotaka rozbuchnjene. „Wužił je so za njeskutk pyrotechniski wudźěłk, kajkiž w Němskej dowoleny njeje“, praji rěčnica­ OAZ. Lěwica ma za to, skućićela pytać w kruhach prawicarskich ekstremistow.