Mjez Drježdźanami a Wrócławjom maja po změnje jězbneho plana w decembrje zaso wšědnje trójce direktne ćahi jězdźić. Hižo wot 21. septembra pojědu ćahi z Pólskeje hač na Zhorjelske dwórnišćo, zo změja pućowacy z wobeju směrow składnosće přestupjenja.
Podstupim/Wrócław (SN/JK). Železniski zwisk mjez Němskej a Pólskej wožiwić, na to su so jednaćeljo železniskich předewzaćow a zastupjerjo wobchadneju ministerstwow Němskeje a Pólskeje dojednali minjeny pjatk na němsko-pólskim železniskim wjeršku w Podstupimje. Wot Berlina do Wrócławja pojědu wot meje hač do septembra 2016 kulturne ćahi. Pozadk je, zo budźe Wrócław klětu europska kulturna stolica. Nimo toho ma so čara z Berlina do Szczecina hač do lěta 2020 na dwučarowu wutwarić.
Klětu přeprosy Pólska na železniski wjeršk. „Trjebamy němsko-pólsku perspektiwu město dźěleneje němskeje a pólskeje, jenož tak budźemy nastupajo mjezy překročacy železniski wobchad wuspěšni“, podšmórny jednaćel Němskeje železnicy Rüdiger Grube.