Z muzeja na Hród
Budyšin. Ćichi pjatk w 10 hodź. su dźěći na wosebite wodźenje po Budyšinje witane. Hólcy a holcy w starobje pjeć do dźewjeć lět spřistupnja sej sprjewine město na rejwanske wašnje, z hudźbu a wjele informacijemi. Tohorunja ćichi pjatk poskića w 10.30 hodź. a 14 hodź. kołojězbu po Budyšinje z busom, sobotu w 10.30 a 12 hodź. Pjatk stej pod hesłom „z tysac krokami po tysaclětnym měsće“ w 11 a 14 hodź. měšćanskej wodźeni, ćichu sobotu w 11, 14 a 17.30 hodź. a jutrowničku w 14 hodź. Přez cyły dźeń, wot 10 do 17 hodź., wočinjene budu přez jutry Muzej Budyšin na Zitnych wikach, Stara wodarnja, Bohata wěža a wot 10 do 18 hodź. Serbski muzej kaž tež Budyske wopomnišćo.
Jutry w Błótach
Lubin/Bórkowy. Ćichi pjatk je w Lubinje wot 21.30 hodź. wodźenje po měsće z nócnym stražnikom. Wón wě wjele historiskich anekdotow powědać, tež wo Serbach. Zetkanje je při schodach radnicy. Sobotu maja wot 10 do 18 hodź. na hrodowej kupje pisany jewišćowy program z tradicionalnym walkowanjom jejkow přihotowany. W 14 hodź. nowu čołmikowu sezonu swjatočnje zahaja. Lubin hornje a delnje Błóta zwjazuje.