Božemje Sergio Ramos, Cristiano Ronaldo a Lionel Messi

póndźela, 02. julija 2018
artikl hódnoćić
(0 )
Španiski trenar Fernando Hierro a kopar Sergio Ramos po wčerawšej poražce přećiwo Ruskej  Foto: dpa/Markus Ulmer Španiski trenar Fernando Hierro a kopar Sergio Ramos po wčerawšej poražce přećiwo Ruskej Foto: dpa/Markus Ulmer

Sobotu a wčera běchu prěnje štyri partije ­wosmifinala swětowych koparskich mišterstwow, a koło najlěpšich wosom mustwow docpěchu jako prěnje Francoska, Uruguay, Ruska a Chorwatska. Zazběhowy duel bě sobotu popołdnju Francoska – Argentinska. Équipe Tricolore přesadźi so po napjatej hrě ze 4:3. Wrota za Francozow třělichu Antoine Griezmann (13.), Benjamin Pavard (57.) a dwoje Kylian Mbappé (64., 68.). Za Argentinjanow trjechichu Ángel Di María (41.), Gabriel Mercado (48.) a Sergio Agüero (93.). W druhej sobotnej hrě přewiny Uruguay amtěrowaceho ­europskeho mištra Portugal z 2:1. Hižo w 7. min. nawjedowachu Južnoameričenjo přez wrota Edinsona Cavanija. Luis Suárez bě bul do šěsnatki třělił, a Cavani přetwori ze zdalenosće pjeć metrow z hłójčku. Po tym zo bě Pepe za Portugal tohorunja z hłowu wurunał (55.), poradźichu so Cavanijej dobyćerske wrota (62.). Přihrawku z centruma Rodriga ­Bentancura do šěsnatki třěli wón z prawej nohu do dołheho lěweho kuta.

wozjewjene w: Sport

Galerija

dalši wobraz (1)
Prošu přizjewće so, chceće-li komentar podać

Serbska debata

nowostki LND