Drježdźany (SN). Předsyda sakskeje SPD Martin Dulig plany noweje zakitowanskeje ministerki Annegret Kramp-Karrenbauer (CDU) nastupajo brónjenje raznje wotpokazuje. Tute „ně“ chcyła SPD tež přichodnje zastupować, rěka w nowinskej zdźělence sakskeho ministra za hospodarstwo. Wot Kramp-Karrenbauer w jeje knježerstwowej deklaraciji žadane přidatne miliardy eurow su po měnjenju Duliga w kubłanskim wobłuku a w zakładnej renće lěpje inwestowane.

„Po wšěm swěće napjate połoženje žada sej nowu politiku wotputanja a wjace prócy při mjezynarodnym wotbrónjenju. Masiwne brónjenje Němskeje njeby jenož kłonjenje před Donaldom Trumpom było, ale tež fatalny signal Němskeje mjezynarodnemu­ statowemu zjednoćenstwu.“ Dulig pokaza na wosebitu rólu měroweho hibanja za čas měrniweje rewolucije, kotraž bě před 30 lětami zakład mócnych demonstracijow była.

„SPD zasadźa so za lěpše wuhotowanje zwjazkoweje wobory“, tak Dulig dale. „Podpěra na dobro wojakow je samozrozumliwa. Z brónjenjom pak chcyła unija wukrajne zasadźenja zwjazkoweje wobory rozšěrić. Tole SPD wotpokazuje.“