Berlin/Choćebuz (dpa/SN). Přihoty za to, wudobywanje brunicy nanajpozdźišo hač do lěta 2038 zakónčić, derje postupuja. Zwjazkowy kabinet je wčera zrěčenju mjez Zwjazkom a brunicowymi přede­wzaćemi přihłosowało. Tak dóstanu koncerny wotpowědne wotškódnjenje, jeli milinarnje wotpinaja. Podpisane zrěčenje hišće njeje. Wone pak wobsahuje pasus, zo móhli termin wotšaltowanja jednotliwych milinarnjow bjez přidatneho wotškódnjenja wo tři lěta doprědka sćahnyć. To dyrbjał Zwjazk pjeć lět do zažneho termina wobzamknyć. Nimo toho je w zrěčenju zapisane, zo z politiskich rozsudow, kotrež móhli njerentabelnosć wuhlowych milinarnjow zawinić, žadyn narok na přidatne wotškódnjenje njewurosće. Podpisaja-li předewzaća, wuzamkuja wone zdobom přećiwo kóncej wudobywanja wuhla skoržić.

Jednanja ze zwjazkowym knježerstwom su hižo wotzamknjene, zdźěli nowinska rěčnica Choćebuskeho koncerna Łužiska energija a milinarnje (LEAG). Detaile žane znate njejsu, ale kaž ze zrěčenja wuchadźa, dóstanje LEAG wotškódnjenje něhdźe 1,75 miliardow eurow.