Z nowej instancu móhli azylowej temje lěpje wotpowědować
Budyšin (CK/SN). Nanajpozdźišo hač do 1. septembra ma so w Budyskim wokrjesnym zarjadnistwje zarjad za wukrajnikow wutworić. Přičina toho je, zo chcedźa zakwartěrowanje, hladanske posłužby, prawa wukrajnikow a integraciju do jedneje instancy zjednoćić. Tole zwurazni krajny rada Michael Harig (CDU) wčera wječor na nowinarskej rozmołwje w Budyskej lutowarni. Hladajo na krizy a wójny na swěće ličba požadarjow azyla přichodnje dale přiběra. Z dotalnej strukturu – nimo loni w nowembru wutworjeneho staboweho městna azyl zaběraja so wjacore wotrjady we wšelakich zarjadach z temu azyl – su w Budyskim wokrjesu na hranicy storčili, Harig rjekny.
