Sakski krajny sejm wuradźuje wo financach za lěće 2015/2016
Drježdźany (SN/MkWj). Kaž njebě hinak wočakować, je wčera w Sakskim krajnym sejmje k raznym debatam wo etaće swobodneho stata za lěće 2015/2016 dóšło. Při tym sej tež wótrje wumjetowachu.
Na spočatku debaty je sakski ministerski prezident Stanisław Tilich (CDU) inwesticije zakitował. Po wuspěšnym nowonatwarje kraja dźe nětko wo to, dale „nachwatować“. Kaž Tilich rjekny, je hladajo na to, zo wučinja produktiwita w Sakskej runje 74 procentow zapadoněmskeho přerězka, hišće tójšto dźěła. Wotstawk chcedźa z hišće wyšej inwesticiskej kwotu 17 procentow pomjeńšić.
