Wčera a dźensa wotmě so w Budyskim Serbskim instituće mjezynarodny sympozij pod hesłom „To ryzy a to měšane – 15 lět po tym“. Bě to zdobom rozžohnowanje wotrjadnicy za kulturne wědomosće dr. Elki Černokožeweje, kotraž so po 23lětnym skutkowanju na slědźenišću na wuměnk poda.
Budyšin (SN/CoR). Z diskusiju wo hybridologiji jako teoriji přichoda je so sympozij dźens připołdnju zakónčił. Dwaj dnjej su wědomostnicy z najwšelakorišich disciplinow slědźenske wuslědki předstajili a wot Elki Černokožeweje wuwiwany hybridny přistup hódnoćili. Swjedźenski spis „To ryzy a to měšane – 15 lět po tym“ přepodaštaj jej wčera wudawaćelej dr. Ines Kellerowa a dr. Fabian Jacobs jako 8. zwjazk rjadu „Hybride Welten“. Dźens dopołdnja staj mjez druhim dr. Steffen Groß z Choćebuza a redaktorka Noweho Casnika Ines Neumannojc přednošowałoj.
