Kónc koalicije móžny

wutora, 28. awgusta 2018 spisane wot:

Berlin (dpa/SN). Parlamentariski jednaćel frakcije SPD w zwjazkowym sejmje Carsten Schneider ma za móžne, zo koalicija jeho strony z CDU a CSU w běhu přichodnych dwanaće měsacow rozpadnje. „Hdyž unija dale dźěło zapowědźa a wažne zakonske předewzaća blokuje, njetrjebamy hač k ewaluaciji nazymu 2019 čakać“, rjekny Schneider nowinarjam. „Mjez socialdemokratami je po zwadźe mjez CDU a CSU azyloweje poli­tiki dla sćerpnosć přetrjebana.“

Knježerstwo bjez wjetšiny

Drježdźany (dpa/SN) Dobre lěto do wólbow Sakskeho krajneho sejma je nahladnosć krajneho knježerstwa mjez wole­rjemi tak snadna, zo nima hižo wjetšinu. Bychu-li njedźelu wólby byli, by CDU z 30 procentami najsylniša móc była, njeby pak z SPD koaliciju wutworić móhła, dokelž by ta runje hišće jědnaće procentow hłosow dóstała, zdźěla institut Infratest. AfD by z 25 procentami druha najsylniša móc była. Lěwica by měła 18 procentow, Zeleni šěsć a FDP pjeć proc.

Přemało za kolesowarjow

Dźěłapołny kónc tydźenja mějachu sobudźěłaćerjo mjeńšinoweho sekretariata w Berlinje: Woni wobdźělichu so na kóždo­lětnym dnju wotewrjenych duri zwjazkoweho knježerstwa, zo bychu w nutřkownym ministerstwje wo swojim dźěle a wo narodnych mjeńšinach informowali. Tam přińdźe předsyda Domowiny Dawid Statnik ze zwjazkowym ministrom za nutř­kowne naležnosće Horstom Seehoferom (CSU) do rozmołwy a jeho přeprosy błótowske kórki woptać. Foto: Mjeńšinowy sekretariat/Judit Šołćina

Praha (dpa/SN). Dźeń do wopyta w Italskej a na kupje Malta je čěski ministerski prezident Andrej Babiš w prašenju ćěkan­cow swoju bjezkompromisnu po­ziciju potwjerdźił. „Hdyž wo tym rěču, zo nochcu ani jeničkeho migranta při­wzać, da tohodla, zo bych signal dał“, rjekny załožer populistiskeho hibanja ANO po zdźělenju powěsćernje čtk wčera w Praze. Babiš sej žadaše, zo měli zrěčenja ze sewjeroafriskimi statami wujednać, zo bychu ćěkancow wróćo brali.

W Romje wočakowaše Babiša dźensa italski ministerski prezident Giuseppe Conte. Wobaj politikarjej běštaj so minjene dny w prašenju migracije w Srjedźnym morju zjawnje rozestajałoj. Čěska bě italsku próstwu wotpokazała, přiwzać ćěkancow, kotřiž z čołmami přijědu. Ital­ska­­ žada sej wot čłonskich statow EU wjace solidarity. Čuje so hladajo na spochi přichadźacych ćěkancow wosamoćena a je swoju politiku migrantam a pomocnym organizacijam napřećo widźomnje přiwótřiła. Tež na kupje Malta su pječa hranicy poćežowanja docpěli. Tam čaka tohorunja tójšto ćěkancow na dalejězbu do druhich europskich krajow.

Wopory katastrofy wopominali

wutora, 28. awgusta 2018 spisane wot:

Ramstein (dpa/SN). 30 lět po katastrofje na lětarskim dnju na porynsko-pfalcskim wojerskim zepěranišću USA Ramstein su při­wuzni a přežiwjeni 70 mortwych a wjace hač tysac zranjenych wopomi­nali. Předwidźana bě mjez druhim eku­meniska nutrnosć. Po tym smědźachu wobdźělnicy z busom k městnu njezboža w poprawom kruće zaraćenej kónčinje lěta­nišća jěć. Dźeń měješe ze zjawnym zarjadowanjom při wopomnišću zwonka lětanišća wuklinčeć. Zarja­dowarjo wočakowachu něhdźe sto wobdźělnikow. Na swjatočnosć přizjewili běchu so mjez dru­him ministerska prezidentka Po­rynsko-Pfalcy Malu Dreyer (SPD) kaž tež ně­hdyšej ministerskaj prezidentaj Kurt Beck (SPD) a Bernhard Vogel (CDU).

28. awgusta 1988 běchu we wobłuku lětarskeho předstajenja na wojerskej bazy tři mašiny italskeje wuměłskeje stafle Frecce Tricolori (Třibarbne kłoki) do so zrazyli. Jedne z nich padny do přihladowarjow a rozbuchny. 67 wopytowarjow a třo piloća zemrěchu. Wjace hač tysac ludźi so zrani, mnozy so strašnje spalichu.

Namócnosće raznje zasudźeja

wutora, 28. awgusta 2018 spisane wot:

Tež nowe demonstracije w Kamjenicy sej zranjenych žadali

Kamjenica (dpa/SN). Po najnowšich namócnosćach w Kamjenicy přiběra kritika přiběraceje agresije přećiwo wukrajnikam dla. „Rasizm sej widźomnje puć ruba“, rjekny fachowc za prawicarski ekstremizm Amadeuwa Antonijoweje załožby Robert Lüdecke powěsćerni dpa.

Při nowych protestach prawicarskich a lěwicarskich demonstrantow w centrumje Kamjenicy je so wčera wječor šěsć demonstrantow zraniło. Wobdźěl­nicy mjetachu praskotaki a bleše. Wuchadźišćo protestow běchu kónctydźenske namócnosće, při kotrychž bu 35lětny Němc zakłóty. Policija zaja na to 23lět­neho Syričana a 22lětneho muža z Iraka. Wobaj sedźitaj w přepytowanskej jatbje.

W Nowej Cali planuja nowy klóšter

wutora, 28. awgusta 2018 spisane wot:

Podstupim (dpa/SN). Mniša rjadu cisterciensow so po 200 lětach do braniborskeje Noweje Cale nawróća a planuja zdobom nowotwar klóštra. Spočatnje chcychu mniša do kencliskeho twarjenja 750 lět stareho klóšterskeho objekta zaćahnyć, zdźěli kulturna ministerka Braniborskeje Martina Münch (SPD), kotraž je tež předsydka rady załožby Wustaw Nowa Cala, wčera w Podstupimje. Mniša su so po probowym lěće w Nowej Cali za no­wotwar rozsudźili.

Přichodnu njedźelu chcedźa priorat oficialnje załožić, zo móhli klóšterske žiwje­nje dale wjesć. Před 750 lětami za­łoženy stary klóšter bu 1818 sekulari­zowany. Wot lěta 1996 wobsteji załožba. Na terenje wotměwa so tójšto kulturnych zarjadowanjow.

To a tamne (28.08.18)

wutora, 28. awgusta 2018 spisane wot:

20 centimetrow dołhi štabik kokoška­ceho kebaba su britiscy lěkarjo psej ze žołdka wuoperowali. Šěsćlětny pos mě­ješe na prawym boku naraz spodźiwnu zaćeklinu. Štož lěkarjo pod röntgenowym nastrojom wuhladachu, jich zadźiwa: Stajnje zaso psy kamjenje abo hrajki póžěraja, tajki dołhi štabik pak skerje nic. Wobsedźerjo psow dyrbjeli tuž na grilowanskich partyjach derje na swoje štyrinohače kedźbować.

Nop wopicy a róh antilopy su cłownicy na Hannoverskim lětanišću w kófrje žony­ z Namibije namakali. Při kontroli wačoka so cłownicy chětro stróžichu, jako­ na röntgenowym nastroju nop wuhladachu. Wočiniwši kófer njenamakachu jenož wosobinske wěcy, ale tež nop šimpansy a róh antilopy. Dokelž njeměješe žona žane dokumenty za škitanej wěcy, jej cłownicy nablaku sćazachu.

Dwělomne próstwy

póndźela, 27. awgusta 2018 spisane wot:

Lipsk (B/SN). Předsyda ewangelskeho pomocneho Skutka Gustava Adolfa w Sakskej dr. Arndt Haubold warnuje před dwělomnymi próstwami z Rumunskeje. „Zas a zaso dochadźeja z póštu próstwy nuzu tradaceje rumunskeje swójby ze Sedmihródskeje“, Haubold pisa. „Rěč je wo wulkej nuzy, tež foto swójby je připołožene, podate su kontowe daty a bibliske słowa z poručenjom duchowneho.“ Tajke kopěrowane listy kursěruja hižo někotre lěta ze samsnym tekstom, kaž zwěsćichu. „Woprawdźe nuzowe pady njech dochadźeja radšo přez dowěrliwych ludźi a puće, potom so jim pomhać hodźi“, zdźěla Skutk Gustava Adolfa.

Habermas žada sej solidaritu

Za spěšniši zwisk so wuprajili

póndźela, 27. awgusta 2018 spisane wot:

Wojerecy (SN/at). Wotpohladane „znamjo z Wojerec“ zapósłanče zwjazkoweho sejma Caren Lay (Lěwica) je krajny stronski zjězd sakskeje Lěwicy sobotu w Zusowym měsće zeskutkownił. Delegaća wobzamknychu namjet, zarjadować stajny zwisk spěšnoželeznicy mjez Drježdźanami a Wojerecami.

„Što mamy we wačoku za wjesny rum?“, so Caren Lay prašeše, wobkrućejo swój namjet. Jězbny čas połdra hodźiny wot póndźele do pjatka přez Rólany „njeje­ akceptabelny“. Wožiwjena wosobowa destinacija přez Njedźichow móhła dojězdźowarjam zajimawy poskitk być, we Wojerecach bydlić a w Drježdźanach dźěłać. Z tajkim zwiskom by Wojerowski region swoju lěpšinu měł, tež pod aspektom, zo maja w měsće něhdźe 1 000 swobodnych bydlenjow. Spěšnoželeznica Drježdźany–Wojerecy by nimo toho turistow z krajneje stolicy zaměrnišo do łužiskeje jězoriny wjedła.

Lěwica skedźbni na to, zo hodźi so předewzaće ze srědkow za regionalizaciju zaručić, kotrež Zwjazk Sakskej płaći. Ta pak wužiwa pjećinu pjenjez za nadawki, kiž dyrbjała sama financować.

Za wyše dawki bohatych

póndźela, 27. awgusta 2018 spisane wot:

Berlin (dpa/SN). Městopředsyda SPD Ralf Stegner žada sej wyše mzdy za mało zasłu­žacych a wyše dawki za bohatych, zo móhł so niwow renty tež po lěće 2025 stabilizować. „Čim wjace ludźi derje zasłuža, ćim połniše su rentowe kasy a ćim mjenje pjenjez trjebamy za wurunanje mjez młodymi generacijemi“, rjekny Stegner nowinarjam. Tež wulkokoncerny, kotrež w Němskej profity nadźěłuja, měli „porjadne dawki“ płaćić.

Třěleńca w Floridźe

Jacksonville (dpa/SN). Při smjertnej třěleń­cy na turněrje widejohrajerjow w floridaskim Jacksonvillu su tři wosoby žiwjenje přisadźili. Mjez woporami je tež třělc, policija na nowinarskej konferency zdźěli. Wón je so sam zatřělił. 24lětny z Baltimora bě wčera z dotal njeznateje přičiny wosrjedź wubědźowanja třěleć započał a dweju wobdźělnikow morił. Cyłkownje jědnaće ludźi wón zrani.

Žaruja wo Johna McCaina

nawěšk

nowostki LND