Tel Aviv (dpa/SN). Israelski ministerski prezident Benjamin Netanjahu přilubja w Gazaskej wójnje dobyće nad islamistiskej Hamas „w běhu tydźenjow“, ručež je připowědźena wojerska ofensiwa w měsće Rafah na juhu Gazaskeho pasma zahajena. „Totalne dobyće“ je wotwidźomne, rjekny Netanjahu w sćelaku CBS w USA. Dojednany přiměr njeby ofensiwje zasadnje zadźěwał. Mjezynarodnje wojerske zasadźenje w měsće z milionom wobydlerjow raznje zasudźuja.
Konferenca za Ukrainu
Paris (dpa/SN). Francoski prezident Emmanuel Macron je dźensa mjezynarodnu konferencu darićelow na dobro Ukrainy zahajił. Na zarjadowanju wočakuja 20 statnych a knježerstwowych šefow, mjez nimi zwjazkoweho kanclera Olafa Scholza (SPD). Dalše kraje su na zetkanju dwě lěće po zahajenju ruskeho nadpada na ministerskej runinje zastupjene. Ukrainski prezident Wolodymyr Zelenskyj chcyše so po puću widejoweje konferency wobdźělić.
Warnuje před skrótšenjemi
Kamjenica (dpa/SN). Ze załoženjom prěnjeho krajneho zwjazka chce Zwjazk Sahry Wagenknecht (BSW) do wólbow krajneho sejma a komunalnych zastupnistwow signal wšemu krajej wusyłać. „Je nuznje trěbne, zo maja wšitcy, kotřiž su z prawom přesłapjeni wot knježaceje politiki, skónčnje serioznu alternatiwu, stronu, kotruž móža wolić“, rjekny sobupředsydka strony Amira Mohamed Ali předwčerawšim, sobotu, při załoženju w Kamjenicy. Strona je zwólniwa, k přichodnym wólbam nastupić. Sahra Wagenknecht sama njebě na čłonskej zhromadźiznje přitomna.
Sakski krajny zwjazk nawjeduje přichodnje dwójka: Bywša zapósłanča zwjazkoweho sejma Sabine Zimmermann a předewzaćel Jörg Scheibe. Na zwjazkowej runinje bě BSW hižo kónc januara nastupiła. Nětko ma zakótwjenje w krajach slědować. W Sakskej chce strona w juniju při komunalnych wólbach a w septembru k wólbam krajneho sejma nastupić, zasadźujo so za „rozumnu hospodarsku a energijowu politiku“.
Brüssel (dpa/SN). Ratarjo su dźensa składnostnje zetkanja ratarskich ministrow EU ze swojimi traktorami w Brüsselu swój protest přećiwo ratarskej politice Europskeje unije potwjerdźili. Policija wobydlerjow namołwješe, awto radšo stejo wostajić a so z podzemskej abo z ćahom do nutřkowneho města belgiskeje stolicy podać. Diplomaća EU z toho wuchadźachu, zo so protesty tež na časowy plan zetkanja ministrow wuskutkuja.
Po intensiwnych a zdźěla namócnych protestach europskich ratarjow steja politikarjo přiběrajcy pod ćišćom. W mnohich krajach EU su ratarjo na dróhach, zo bychu mjez druhim přećiwo wikowanskim zrěčenjam EU, běrokratiji a ratarjam škodźacym wobswětowym postajenjam z Brüssela protestowali.
Komisija EU bě na to hižo wšelake wolóženja přilubiła a zakoń za zniženje zasadźenja pesticidow zaso cofnyła.
Zawostajenstwo Kurta Drummera (1928-2000), sławneho telewizijneho kucharja za čas NDR, chowaja wotnětka w kulinariskim archiwje Drježdźanskeje krajneje biblioteki. Prěnje eksponaty su předwčerawšim, sobotu, přepodali. Dotal bě so Kamjeničanski zwjazk kucharjow wo to starał. Drummer pochadźa z Rudnych horin a bě w Kamjenicy kucharić nawuknył. W telewiziji NDR wón hač do 1983 wjace hač 650 króć we wusyłanju „Telwizijny kuchar poruči“ wustupowaše.
Z New Yorkskeho zwěrjenca twochnjena wulka sowa Flaco je mortwa. Prawdźepodobnje bě ptačk do fasady wysokodomu ameriskeje metropole zrazył a sej šiju zwinył. Euraziska sutawa bě w februaru 2023 ze swojeje klětki wulećała, po tym zo běchu njeznaći grót přerězali. Wot toho časa Flaca wobkedźbowachu a stajnje zaso podarmo spytachu, jeho popadnyć.
Washington (dpa/SN). Knježerstwo USA chce składnostnje druheje róčnicy zahajenja wójny w Ukrainje a jako reakciju na smjerć Alekseja Nawalnyja nowe sankcije přećiwo Ruskej wobzamknyć. Sćelak CNN rozprawja po informacijach financneho ministerstwa USA, zo přihotuja chłostanske naprawy přećiwo 500 wosobinam a institucijam. Ruska bě 24. februara 2022 Ukrainu nadpadnyła.
Biden žonu Nawalnyja přijał
San Fracisco (dpa/SN). Prezident USA Joe Biden je so po smjerći kritikarja Krjemla Alekseja Nawalnyja z toho mandźelskej a dźowku w Kaliforniskej zetkał. Biden je wobrazy wo zetkanju wozjewił. Widźeć je Julija Nawalnaja a jeje 23lětna dźowka Darja w rozmołwje z prezidentom USA. Na wobrazu Biden žonu Nawalnyja wobjima. Biden piše, zo je so z woběmaj zetkał, zo móhł jimaj swoje sobužarowanje wuprajić. Nawalny bě 16. februara w jednym z chłostanskich lěhwow Ruskeje žiwjenje přisadźił. Jeho mać je ćěło Nawalnyja mjeztym widźeć směła.
Scholz podpěruje Rutteho