Diesel a bencin 2020 tunjej byłoj
Mnichow (dpa/SN). Ekstremnje tuni zemski wolij koronakrizy dla je so wo to postarał, zo běštej bencin a diesel prěnje jědnaće měsacow 2020 tak tunjej kaž dołho nic. Bencin płaćeše w tym času přerěznje 1,25 eurow na liter, piše awtomobilowy klub ADAC. Na tym drje so lětsa wjace wjele njezměni, měnja fachowcy kluba. Je to najniša płaćizna bencina, po tym zo běchu před dźesać lětami bencin E10 zawjedli. Tež diesel bě jara tuni. Cyłoněmski přerězk wučinješe wot januara hač do nowembra 1,11. To je najniša płaćizna wot lěta 2016. Mjeztym płaćizna zemskeho wolija zaso přiběra.
Z přijomnymi płaćiznami sprita pak je bórze nimo. Zniženje nadhódnotoweho dawka kónc lěta wuběži. Nimo toho dyrbja přetrjebarjo popłatk za wuhlikowy dioksid płaćić. Diesel a bencin budźetej tuž prawdźepodobnje wo dźesać abo jědnaće centow dróšej.
Žane praskotaki
Žane lětadła z Wulkeje Britaniskeje
London (dpa/SN). We Wulkej Britaniskej zwěsćeneje noweje warianty koronawirusa dla so europske kraje přiběrajcy wot zjednoćeneho kralestwa wotmjezuja. Zo njeby so wirus na dalše kraje wupřestrěł, njesmědźa w Němskej wot dźensnišeho hač do 31. decembra žane lětadła z Wulkeje Britaniskeje wjace přizemić. Wuwzate su ryzy transportne. Francoska je mjezu k Jendźelskej hižo zawrěła. Tež wažny přistaw w jendźelskim Doveru a tunl mjez Jendźelskej a Francoskej stej mjeztym zawrjenej.
Nowych postajenjow dla dyrbi na Berlinskim Schönefeldskim lětanišću 77 pasažěrow z Wulkeje Britaniskeje čakać, doniž nimaja wuslědk koronatesta. Při tym jedna so přewažnje wo pólskich staćanow. Za nich su pólne łoža nastajili. Tež na dalšich lětanišćach Němskeje dyrbja pasažěrojo z Jendźelskeje čakać.
Wirologa Christian Drosten z toho wuchadźa, zo je mutěrowany wirus z Wulkeje Britaniskeje Němsku hižo docpěł. „Wón je hižo w druhich krajach. Čehodla njedyrbjał tež w Němskej być?“
EU jamy dla Čěskej poboku
Praha skorži před Europskim sudnistwom přećiwo Pólskej
Luxemburg (SN). Čěska ma w swojim postupowanju přećiwo dalšemu rozšěrjenju brunicoweje jamy w pólskim Turówje podpěru Europskeje unije. Komisija EU je minjeny štwórtk nastupajo skóržbu Čěskej ranjenja zrěčenja dla zwěsćiła, zo Pólska směrnicy k pruwowanju wobswětoškitneje znjesliwosće a směrnicy wo přistup zjawnosće k wotpowědnym informacijam rani. Čěska bě přećiwo rozšěrjenju brunicoweje jamy před Europskim sudnistwom skóržbu zapodała.
To a tamne (21.12.20)
W dźěćacym stanje před policiju chował je so paduch w sewjerorynsko-westfalskim Hagenje. Swědcy běchu zastojnikow k twarjenju firmy wołali, dokelž běchu swětło kapsneje lampy w domje widźeli. Policisća ze słužbnym psom twarjenje přepytachu a nańdźechu slědy paduchow. Skónčnje pos před dźěćacym stanom zašćowka, w kotrymž 51lětneho paducha wuhladachu. Tež dalšeju kumpanow nańdźechu a wšěch třoch zajachu.
Nic mjenje hač 4,4 promile alkohola w kreji měješe šofer njedaloko Flensburga, jako jeho zastojnicy kontrolowachu. 44lětny bě šoferce na awtodróze A 7 napadnył, dokelž njewěsće jědźeše. Zastojnicy jeho na parkowanišću kontrolowachu. Muž drje je pomały skutkował, móžeše pak na wšitke prašenja policistow wotmołwić. Dokelž skoržeše na brjušebolenje, dowjezechu jeho do chorownje.
Loránt Vincze: „To je wažne dobyće!“
Strasbourg (SN/JaW). Europski parlament je wčera w Strasbourgu rezoluciju za podpěru wobydlerskeje iniciatiwy Minority SafePack (MSPI) wo skrućenju prawow narodnych mjeńšin wobzamknył. Kaž Federalistiska unija europskich narodnych mjeńšin (FUEN) w medijowej zdźělence informuje je 524 ze 694 zapósłancow za rezoluciju hłosowało. „Tak je MSPI prěnja wobydlerska iniciatiwa, na kotrejež zakładźe su plenarnu debatu zwołali, hdźež je Europski parlament rezoluciju přiwzał“, rěka z Flensburgskeho běrowa FUEN.
Biskopstwo dyrbi lutować
Drježdźany (dpa/SN). Hladajo na deficit nimale 15 milionow eurow je Drježdźansko-Mišnjanske biskopstwo klětu k lutowanskim naprawam nuzowane. Nimo krótkodobnych skrótšenjow wudawkow chcedźa „strategiski proces“ zdźěłać, z kotrymž wudawki a dochody wurunaja, biskopstwo informuje. Deficit zawinowali su předewšěm personalne kóšty 50 milionow eurow, štož dochody z cyrkwinskeho dawka (31,5 milionow eurow) njewurunaja. Na 140 000 katolikow diecezy přińdu nětko „bolostne rozsudy“.
Prawobydlerka do kabineta
Washington (dpa/SN). Woleny prezident USA Joe Biden chce po informacijach medijow prěni króć w stawiznach kraja amerisku prawobydlerku za ministerku w swojim kabineće powołać. Zapósłanča kongresa Deb Haaland ze zwjazkoweho stata New Mexico ma w knježerstwje Bidena nutřkowne ministerstwo přewzać. 60lětna Haaland słuša ke kmjenej Pueblo of Laguna. Jako ministerka by wona zdobom za naležnosće 1,9 milionow prawobydlerjow USA zamołwita była.
Nowolětne přijeće njebudźe
