App žana wulka pomoc

štwórtk, 24. septembera 2020 spisane wot:

Berlin (dpa/SN). W boju přećiwo koronapandemiji w Němskej posudźuja zastupnicy lěkarjow skutkownosć noweje warnowanskeje app za mobilne telefony jako jara snadnu. „Dokelž daty tuteje app awtomatisce strowotniskim zarjadam njeposrědkuja, njeje nam tónle instrument w swojej tuchwilnej formje žana wulka pomoc“, rjekny předsydka Zwjazka lěkarjow zjawneje strowotniskeje słužby Ute Teichert nowinarjam. App njehraje „we wšědnym dźěle strowotniskich zarjadow tak derje kaž žanu rólu“.

Razniše naprawy korony dla

Mnichow (dpa/SN). W bayerskej stolicy Mnichowje płaća wot dźensnišeho razniše wobmjezowanja a winowatosć, w starym měsće škitny nahubnik wužiwać. Zakład toho je powšitkowny wukaz, kotryž su wčera wozjewili. Prawidła płaća hač do 1. oktobra. Tak smě so najwjace pjeć wosobow zetkać, wšojedne hač doma, w přirodźe abo w hosćencu. Wot 9 hač do 23 hodź. maja ludźo w dźělach nutřkowneho města sej hubu a nós zakryć. Kónc tydźenja je na někotrych městnach w nocy zakazane alkohol pić.

Rekordne ličby w Israelu

Na namołwu dźěłarnistwa ver.di su sobudźěłaćerjo Hamburgskich měšćanskich zawodow dźensa za wyše mzdy demonstro­wali. Z hesłom „Nětko sće wy na rjedźe“ skedźbnichu woni na to, zo běchu so tež w časach najraznišich wobmjezowanjow ­koronawirusa dla wo to starali, zo su najtrěbniše posłužby, kaž rumowanje wotpadkow, zaručene. Foto: dpa/Axel Heimken

Dalše rizikowe kónčiny w EU

štwórtk, 24. septembera 2020 spisane wot:
Berlin (dpa/SN). Zwjazkowe knježerstwo je regiony w jědnaće krajach Europskeje unije přiběracych ličbow koronainfekcijow dla jako rizikowe kónčiny zastopnjowało. Mjez nimi su kónčiny w susodnych krajach Danskej, Čěskej, Francoskej, Awstriskej a Nižozemskej, kaž z aktualizowaneje lisćiny Roberta Kochoweho instituta wuchadźa. Tak je nětko hižo zaso 14 ze wšěch 27 čłonskich statow EU zdźěla abo dospołnje jako rizikowa kónčina wupokazane. K tomu přišli su na lisćinu ­Roberta Kochoweho instituta wčera ­regiony w Danskej, Portugalskej, Irskej a Słowjenskej.

Baterije za awta bórze z Lipska

štwórtk, 24. septembera 2020 spisane wot:

Lipsk (dpa/SN). Awtotwarc BMW chce produkciju baterijow za elektroawta w Němskej dale rozšěrić. Za to inwestuje koncern 100 milionow eurow do swojeje Lipšćanskeje twornje. Wot lěta 2021 chcedźa tam baterijowe module za wysokovoltowe baterije elektroawtow zhotowić, kaž nawoda twornje Hans-Peter Kemser wčera zdźěli. Hač do lěta 2022 ma w Lipsku wjace hač 150 sobudźěłaćerjow baterije twarić.

Wysokovoltowe baterije dóstawa BMW dotal z bayerskeho Dingolfinga kaž tež z USA a Chiny. Syć chcedźa wot 2021 z Lipšćanskim zawodom wudospołnić. Hižo klětu ma kóžde štwórte předate ­awto BMW elektrisce po puću być, 2030 połojca. W Lipsku twari BMW wot lěta 2013 elektriski model i3. Hišće w oktobru ma 200 000. awto tohole modela zawod wopušćić.

Maas a Altmaier w karantenje

štwórtk, 24. septembera 2020 spisane wot:

Berlin (dpa/SN). Zwjazkowy wonkowny minister Heiko Maas (SPD) a hospodarski minister Peter Altmaier (CDU) staj so po móžnych kontaktach z ludźimi, kotřiž běchu so z koronawirusom natyknyli, do domjaceje karanteny podałoj. Maas dyrbi do domjaceje izolacije, dokelž běchu jednoho z jeho wosobinskich škitarjow pozitiwnje na wirus testowali. Altmaier měješe kontakt ze sobudźěłaćerjom europskeho ministra, kiž bu tohorunja pozitiwnje testowany, powěsćernja dpa rozprawja.

Prěni hnydomny test pola Maasa bě negatiwny, kaž wonkowne ministerstwo informuje. Nětko chcedźa zwěsćić, hač su dalše wosoby potrjechene. Tež pola Altmaiera njejsu natyknjenje dotal zwěsćili. „Sym so najebać to najprjedy raz do domjaceje karanteny podał. Mi so jara derje dźe“, Altmaier twitterowaše.

Kak dołho dyrbi Maas w karantenje wostać, njeje hišće znate. Poprawom chcyše so wón wčera popołdnju do jordaniskeje stoli Amman podać. Jězbu dyrbjachu krótkodobnje wotprajić.

Zwada eucharistije dla

štwórtk, 24. septembera 2020 spisane wot:

Diskusija wo zhromadnym přistupje k blidu Božemu biskopow zaběra

Fulda (dpa/SN). Vatikan jenož na reformowy proces němskich katolikow kritisce njezhladuje, ale ma tež wulke wobmyslenja hladajo na zbliženje k protestantam zhromadny přistup k blidu Božemu nastupajo. Prezident Bamžowskeje rady k spěchowanju jednoty křesćanow, šwicarski kardinal Kurt Koch, warnuje němskich biskopow w rozmołwje z katolskim měsačnikom Herder Korrespondenz, w tymle prašenju swojowólnje postupować.

W diskusiji dźe wo to, hač smědźa so katolikojo a protestanća mjezsobnje k swjatemu woprawjenju respektiwnje k Božemu wotkazanju přeprosyć. To rěka, zo jedna z cyrkwjow eucharistiju swjeći, a wěriwi wobeju konfesijow so na njej wobdźěleja. To chcedźa mjez druhim na Ekumeniskim cyrkwinskim zjězdźe klětu w Frankfurće nad Mohanom praktikować.

Dale prošerjo?

štwórtk, 24. septembera 2020 spisane wot:
Dwurěčne popisanje na twarjenjach w nošerstwje Budyskeho krajnoradneho zarjada je wěčna, njespokojaca naležnosć. Cyły čas swojeho šěsćlětneho skutkowanja je za něšto dnjow wotchadźaca wo­krjesna społnomócnjena za serbske naležnosće Regina Krawcowa so wo mjenowanu tematiku prócowała. A wospjet su čłonojo wokrjesneho dźěłoweho kruha za serbske naležnosće dale wobstejace njedostatki zwěsćili. Zakonsce wobkrućena dwurěčnosć w serbskim sydlenskim rumje płaći we wobłuku swójskeje zamołwitosće Budyskeho wo­krjesneho zarjadnistwa. Je jeho spjećo­wanje, naležnosć skónčnje zawjazujcy dorozrisać, z metodu? Tajki zaćišć so nanuzuje. Wšako bě šěsć lět šwarna doba, zo bychu zakonjej wotpowědowacy rezultat docpěli. W delnjołužiskim wokrjesu Dubja-Błóta zwěsćamy zwjeselacu wotewrjenosć za serbske naležnosće, tež za dwurěčnosć. W samsnym nastupanju pak su Serbja w Budyskim wokrjesu dale prošerjo. Axel Arlt

Muzejebóle škitać

štwórtk, 24. septembera 2020 spisane wot:

Berlin (dpa/SN). Hladajo na spektakularne padustwa je sej kulturna statna sekretarka Němskeje Monika Grütters (CDU) wěsta, zo njejsu muzeje najebać wšelake inwesticije na přiběrace wohroženja dosahajcy přihotowane. Je tuž nuznje trjeba wěstotne połoženje w muzejach dokładnje pruwować a tež do prašenja stajeć. W muzejach leža wuměłske drohoćinki, „kotrež su špihel našich stawiznow a kultury z wulkej materielnej a hišće wjetšej imaterielnej hódnotu“, rjekny Grütters we widejowym poselstwje wěstotnej konferency Němskeho muzejoweho zwjazka. Muzeje njemóža wěstotne směrnicy bankow spjelnić, dyrbja pak so tež brachialnej namocy a techniskim rafinesam kriminelnych wobarać móc.

Fachowcy chcedźa na konferency wuradźować, kak hodźa so eksponaty lěpje škitać a runočasnje zjawnosći přistupne wostać. Za to sej muzejownicy, kriminalni zastojnicy a wěstotni specialisća mysle a měnjenja wuměnjeja. Zeńdźenje je tež sćěh spektakularneho padustwa w Zelenym wjelbje Drježdźanskeho hrodu loni w nowembru, hdźež běchu njeznaći diamanty a brilanty rubili.

400 akcijow za lěpšu klimu

štwórtk, 24. septembera 2020 spisane wot:

Berlin (dpa/SN). Hibanje Fridays for future planuje zhromadnje z dalšimi organizacijemi přichodny kónc tydźenja we wobłuku cyłoněmskeho protesta za škit klimy a za energijowu změnu na wšě 400 demonstracijow w Němskej, po wšěm swěće dobre 2 500. To je organizacija wčera w Berlinje zdźěliła. Tam ma so pjatk wopomnjenska straža při Braniborskich wrotach wotměć. Runočasnje wotmějetej so dwě demonstraciji kolesowarjow. Za zarjadowanje před Braniborskimi wrotami je Fridays for future 10 000 wobdźělnikow přizjewiło, nimo toho liča ze 4 000 kolesowarjemi.

Runje kaž koronakriza trjechi klimowa kriza předewšěm tych, kotřiž socialneje njesprawnosće dla ćerpja, praji rěčnik hibanja Quang Paasch. „Njedowolimy to a póńdźemy zaso na dróhu, zo bychmy přećiwo klimowej njesprawnosći protestowali.“

Kónc tydźenja planuja dalše zarjadowanja. Tak chce skupina „Ende Gelände“ zhromadnje z iniciatiwu wot wotbagrowanja wohroženych „Wšitke wsy wostanu“ z akcijemi ciwilneje njeposłušnosće za kónc zmilinjenja brunicy demonstrować.

To a tamne (24.09.20)

štwórtk, 24. septembera 2020 spisane wot:

Dosć krótke bě wjeselo młodeje Španičanki nad nowej, w interneće skazanej ručnej tobołu z Chiny. Jako žona doma do tobołki přimny, ju něšto do ruki kałny. Nablaku da ju padnyć a widźeše, kak něhdźe pjeć centimetrow wulki skorpion z toški wulěze. Na zbožo bě bratr doma, wón skorpiona popadny, tykny jeho do škleńcy a ze žonu do chorownje jědźeše. Předawar njemóžeše sej rozkłasć, kak bě jědojte zwěrjo do tobołki přišło.

Bywše jastwo kupić móža zajimcy při internetnym přesadźowanju w Compiègne sewjerowuchodnje Parisa. Dotal poskićeja 1,5 milionow eurow za jastwo ze 19. lětstotka, kotrež běchu před pjeć lětami zawrěli. Stat jako wobsedźer objekta ze 4 000 kwadratnymi metrami płoniny bě sej 527 000 eurow žadał. Kupcy pak su warnowani: Bywše jastwo ma so dospołnje ponowić abo wottorhać.

Serbska debata

nowostki LND