Berlin (dpa/SN). Do swojeje posrědkowanskeje jězby do Grjekskeje a Turkowskeje je zwjazkowy wonkowny minister Heiko Maas (SPD) wobaj krajej k rozmołwam wo swojich teritorialnych žadanjach w Srjedźnym morju namołwjał. „Dalša eskalacija móže wšitkim jenož zeškodźeć“, rjekny Maas do swojeho wotlěta w Berlinje. Město nowych prowokacijow su nětko skónčnje kročele k wotputanju a direktne rozmołwy trěbne, Maas rjekny. „Při tym chcemy po swojich mocach přinošować.“
Zwada turkowskich točenjow za zemskim płunom před grjekskimi kupami we wuchodnym Srjedźnym morju dla je so minjene tydźenje stajnje dale přiwótřiła. Wobě stronje direktne rozmołwy wotpokazujetej. Maas spyta posrědkować. Wobaj krajej stej zwjazkarjej w Nato.
Kruså/Krusau (SN/JaW). Njewšědnu akciju su minjeny tydźeń młodostni danskeje mjeńšiny w Němskej zhromadnje z młodostnymi němskeje mjeńšiny w Danskej zahajili. Z njej skedźbnjeja na njeznjesliwe połoženje při hranicy mjez Němskej a Danskej. Woni rozdźělowachu na dwěmaj dnjomaj módre banćiki a flajery dojězdźowarjam z wobeju krajow na přechodomaj w Krusauwje a Pattburgu. Banćiki su při awtach přiwjazali, flajery ludźom do rukow jako informaciju dali.
13lětneho za wodźidłom wosoboweho awta je policija w Mecklenburgsko-Předpomorskej krótko před krajnej mjezu Schleswigsko-Holsteinskeje z awtodróhi wjedła. Pódla hólca sedźeše jeho nan, jězbny wučer z Madźarskeje. 53lětny zastojnikam rozłoži, zo chcyše synej na awtodróze jězdźenje nawučić. Hólc bě něhdźe 50 kilometrow po A 24 jěł. 13lětny dóstanje skóržbu. Tež nan dyrbi z chłostanjom ličić, dokelž je hólca jěć dał.
Wopity muž je sej w taksiju pola Kaiserslauterna njedźelu rano tak kruće wusnył, zo dyrbješe zadwělowany šofer taksija policiju wołać. Chětro sprócny 22lětny bě so wot Kaiserslauterna do Enkenbacha-Alsenborna wozyć dał. Tam pak njeje šofer muža hižo wubudźić móhł. Hakle přiwołanym zastojnikam so to poradźi. 22lětny jězbu zapłaći. Policisća jeho wěsće doma wotedachu.
Rom (B/SN). Bamž Franciskus je biskopow, měšnikow a rjadnikow w Libanonje namołwjał, potrjechenym wobydlerjam wosebje bliscy być. Katastrofa eksplozije w Beiruće žada sej wot wšitkich „za derjeměće tutoho woblubowaneho kraja hromadu dźeržeć a dźěłać“, rjekny bamž. W tutym času njesměła cyrkej ćerpjacych ludźi samych wostajić. Po njedawnej sylnej detonaciji, při kotrejž je znajmjeńša 150 ludźi zahinyło, hroža krajej hłód a problemy ze zastaranjom.
Nowy farar
Paris (dpa/SN). Po dobyću FC Bayern Mnichowa přećiwo Paris Saint-Germain w kónčnej hrě champions league je wčera wječor w francoskej stolicy k namócnosćam dóšło. Policija w Parisu je 148 ludźi zajała. Nimo toho su 400 chłostanjow wuprajili, dokelž njewužiwachu ludźo nahubniki, kaž bě wukazane. Cyłkownje 16 policistow je so zraniło. Namócni demonstranća zapalowachu wotpadkowe sudobja a rozbichu wukładne wokna wobchodow. Policija zasadźi sylzopłun.
Opozicija namołwja do stawka
Minsk. Opozicija w Běłoruskej je dźensa k zahajenju tydźenja k nowym stawkam w statnych zawodach a k demonstracijam namołwjała. „Žadamy sej wotstup Lukašenka. Kóžda mjeńšina, kotruž je wón dale na mocy, zawinuje wulke škody w hospodarstwje“, zdźěli koordinowaca rada opozicije. Lukašenko je po informacijach medijow guwernerej regiona Grodno kazał, wot dźensnišeho stawkowace statne zawody kompletnje zawrěć. Wčera běchu w Minsku statysacy ludźi přećiwo Lukašenkej demonstrowali.
Ministrojo wuradźowali
Berlin (dpa/SN). Zwjazkowy wonkowny minister Heiko Maas chce měrowy proces na wuchodźe Ukrainy pospěšić. „Chcemy w Minskowskim procesu spěšnišo doprědka přińć – tohodla podam so dźensa do Kijewa“, rjekny politikar SPD po informacijach wonkowneho ministerstwa do wotlěta dźensa rano. „Mjeztym dlěje hač štyri tydźenje trajacy přiměr bróni je najdlěši wot lěta 2014 a nadźijepołne znamjo. Na tym chcemy natwarić.“ W Kijewje wočakowachu Maasa toho kolega w zastojnstwje Dmytro Kuleba, statny prezident Wolodymir Selenskij a ministerski prezident Denys Šmyhal. Z nimi chcył Maas pruwować, kak móhli „pozitiwny momentum za wažne politiske signale wužiwać“.
Poslednje wjerškowe zetkanje z Ruskej, Ukrainu, Němskej a Francoskej bě so loni w decembru w Parisu wotměło. Na nim běchu so dojednali, měrowy proces na wuchodźe Ukrainy znowa nastorčić.
Minskowske měrowe zrěčenje bě w februaru pjeć lět stare. Měr na wuchodźe Ukrainy při wšěm wotwidźomny njeje.
Brandenburg (dpa/SN). Braniborski ministerski prezident Dietmar Woidke (SPD) je za to, winowatosć wužiwanja nahubnika po wšej Němskej jednotnje rjadować. Na zetkanju ministerskich prezidentow zwjazkowych krajow ze zwjazkowej kanclerku Angelu Merkel (CDU) přichodny štwórtk chcył wón tutón temu narěčeć, rjekny Woidke sćelakej rbb. „Trjebamy jednotne rjadowanje w Němskej“, rjekny Woidke Podstupimskim nowinarjam. Njemóže być, „zo jědźeš ze spěšnikom po třoch zwjazkowych krajach a wšudźe płaća hinaše rjadowanja.“ Woidke chce tež narěčeć, zo pobrachuja kapacity testow koronawirusa. „To mje jara starosća“, ministerski prezident potwjerdźi.
Woidke hladajo na zaso přiběrace ličby koronainfekcijow njewuzamkny, zo měli so wšěm pokuty napołožić, kotřiž so spjećuja, nahubnik wužiwać. „Trjebamy tu, to sej myslu, sylny signal, zo njeje pandemija hišće nimo“, rjekny wón rbb. Kóždy dyrbjał wědźeć, zo njejsu nahubniki dobrowólna naležnosć, wone měli so tež wužiwać.
Nawoči, kiž bě indiski wojowar wo swobodu Mahatma Gandhi pječa wužiwał, su we Wulkej Britaniskej za 260 000 puntow (278 000 eurow) přesadźili. Trochowali běchu pomoc k lěpšemu widźenju na najwjace 15 000 puntow, zdźěla awkciski dom w Bristolu. Při tym njemóže sej nowy wobsedźer ani stoprocentnje wěsty być, zo je Gandhi nawoči woprawdźe wobsedźał. Předawar to twjerdźi.
Přewidne toalety su najnowša atrakcija japanskeje stolicy Tokija. Swětosławny architekt Shigeru Ban bě je naćisnył, zo by špatnu nahladnosć zjawnych hajzlow polěpšił. Njeje-li nichtó na toaleće, móža wšitcy přez wulke škleńcy do nich hladać a widźeć, kak čiste su. Zastupi-li něchtó do škleńčaneje budki w měšćanskim parku, so z wjacorych worštow škleńcy wobstejace wokna awtomatisce přebarbja a su naraz njepřewidne.