Dalši pomocny fonds Sakskeje

srjeda, 05. awgusta 2020 spisane wot:

Drježdźany (SN/CoR). Z 30 milionami eurow chce Swobodny stat Sakska młodych kreatiwnych předewzaćelow pod­pěrać. Wobmjezowanjow koronakrizy dla maja mnohe runje załožene projekty a firmy ćeže z pjenjezami. Nowy pomocny fonds přewostaji tak mjenowanym startowacym předewzaćam w Sakskej 30 milionow eurow. Na financowanju wobdźěla so Zwjazk, Swobodny stat Sakska a srjedźostawska wobdźělenska towaršnosć (MBG) Sakskeje.

Hač do kónca lěta móža młodźi załožerjo firmow Drježdźanskej MBG próstwu zapodać. Fonds zaruča za zawěsćenje likwidity swójski kapital hač do 800 000 eurow. „Su to młode předewzaća, kotrež z inowatiwnymi modelemi naše­ hospodarstwo modernizuja. Chcemy wobeńć, zo płódne ideje financowanja dla zwrěšća“, podšmórny wčera sakski minister za hospodarstwo a dźěło Martin Dulig (SPD). Wotmołwy na swoje prašenja dóstanu zajimcy na internetnym forumje Online-Q&A, kotryž inowaciska platforma futureSAX dźensa wot 17 hodź. přewjedźe. Přizjewjenja pod www.futuresax.de/corona-startup-hilffonds

Hnydom sej pokutu žadać

srjeda, 05. awgusta 2020 spisane wot:

Berlin (dpa/SN). Sewjerorynsko-Westfalska chce sej ranjenja předpisa nastupajo wužiwanje nahubnika w busu a železnicy dla hnydomnu pokutu 150 eurow žadać. To je tamniši wobchadny minister Hendrik Wüst (CDU) připowědźił. Dotal su sej pokutu hakle žadali, hdyž potrjecheni tež po wospjetnym napominanju škit za hubu a nós njewužiwachu. „Žane dołhe diskusije wjace. Dźe wo solidaritu z najsłabšimi w našej towaršnosći“, mi­nister Wüst raznje podšmórny.

FDP skorži připłatka dla

Berlin (dpa/SN). Direktnje po parlamentariskej lětnjej přestawce spočatk septembra chcedźa čłonojo frakcije FDP w zwjazkowym sejmje na Zwjazkowym wustawowym sudnistwje skóržbu pře­ći­wo solidaritnemu připłatkej zapodać. To rjekny městopředsyda frakcije Christian Dürr powěsćerni dpa. Wjacore posudki fachowcow běchu wunjesli, zo zběranje přinoška po decembru 2019 wustawu rani­. „Po skónčenju solidarneho pakta za natwar wuchoda bychu wot 1. januara 2020 soli wotstronić dyrbjeli.“

Witaja rozsud Němskeje

Beirut (dpa/SN). Po hoberskej detonaciji w stolicy Libanona Beiruće z wjace hač sto mortwymi a 4 000 zranjenymi pytaja tam nětko za móžnymi přičinami. Dotal z toho wuchadźeja, zo je wulke mnóstwo eksploziwneho amonijoweho nitrata roz­buchnyło. Něhdźe 2 750 tonow strašneje substancy bě w jednej z halow Beirutskeho přistawa bjez wěstotnych naprawow składowanych, kaž ministerski prezident Hassan Diab zdźěli. Pokazki na politisce motiwowany atentat dotal žane njejsu. Jenož prezident USA Donald Trump je sej ze „swojimi generalemi“ wěsty, zo jednaše so wo „tajke něšto kaž bombu“.

Rozbuch je libanonsku stolicu, kotrejež wobydlerjo tuchwilu wulkeje poli­tiskeje a hospodarskeje krizy dla ćerpja, do hišće wjetšeho chaosa storhnył. Střasenja dla buchu wokna rozbite, wšudźe su njesměrne škody widźomne. Krawjacy ludźo błudźachu po dróhach nutř­kow­­ne­ho města połneho rozwalinow, črjopow a procha. Wulke dźěle přistawa su dospołnje zničene. W Beiruće, hdźež bydla něhdźe 2,4 miliony ludźi, su dwutydźenski nuzowy staw wukazali.

Waršawa (dpa/SN). W Pólskej maja telko nowych natyknjenjow z koronawirusom kaž hišće ženje za čas pandemije. Wčera su tam zamołwići 680 nowoinfekcijow w běhu 24 hodźin registrowali, kaž strowotniske ministerstwo informuje. Dotalnu rekordnu ličbu 658 nowych padow běchu minjenu sobotu docpěli. Po oficialnych informacijach je so tam dotal 48 149 ludźi z wiruson natyknyło, 1 738 pacientow je na njón zemrěło.

Wirus so wočiwidnje tež mjez zapósłancami we Waršawje rozšěrja. Třoch čłonow senata, druheje komory parlamenta, su hižo pozitiwnje testowali. Pose­dźenja parlamenta su přestorčene. Přiwšěm chcedźa jutře planowane zapokazanje a spřisahanje prezidenta Andrzeja Dudy za druhu dobu zastojnstwa pod wěstotnymi naprawami přewjesć. Duda chce přisahu před narodnej zhromadźi­znu złožić, kotraž wobsteji z wobeju komorow parlamenta.

Dróhi po sylnym dešću zapławjene

srjeda, 05. awgusta 2020 spisane wot:
Sylny dešć minjenych dnjow je w dźělach hornjeje Awstriskeje a Bayerskeje zapła­wjenja zawinił. Kaž tule w awstriskim Mattighofenje wjacore dróhi pod wodu steja. Z městnami je k zesunjenju zemje dóšło. W Bayerskej dyrbjachu wjele wužiwanu awto­dróhu A 8 zapławjeneje jězdnje dla nachwilnje dospołnje zawrěć. Jězdźidła so na wja­corych kilometrach kopjachu, dokelž běchu tež wobjězdki přepławjene. Tež wjacore železniske čary dyrbjachu po zesuwanjach zemje zawrěć. We wokrjesomaj Rosenheim a Miesbach su wohnjowu woboru cyłkownje 500 króć wołali. Wjedrarjo wěšćachu za dźensa dalše spadki, byrnjež nic wjac tak wulke. Foto: dpa/Manfred Fesl

To a tamne (05.08.20)

srjeda, 05. awgusta 2020 spisane wot:

Psyče howno na čriju je so w Saksko­Anhaltskej wo bijeńcu młodeho porika w awće postarało. Krótko do wotjězda bě 23lětna mylnje do hromadki stupiła. Po tym­ zo bě so do awta sydnyła, dóńdźe k zwadźe z 32lětnym šoferom. Po wer­balnym rozestajenju wza žona črij a bi­ješe z nim muža. Na to so wobaj biještaj. Hakle policisća móžachu zwadu skónčić. Wobaj mataj nětko ze skóržbu ranjenja ćěła dla ličić.

Z kosćemi mandźelskeho we wačoku su Armenjanku na Mnichowskim lětanišću zadźerželi. Žona bě po puću z Grjekskeje do swojeje domizny, zo by lěta 2008 zemrěty mandźelski tam swój posledni wotpočink nadešoł. Zastojnicy cła, lě­karka a statny rěčnik pak njemóžachu žane přeńdźenja zwěsćić a su 74lětnej dowolili, z powostankami mandźelskeho do Kawkaza dale jěć.

Kühnert zastojnstwo spušći

wutora, 04. awgusta 2020 spisane wot:

Berlin (dpa/SN). Zwjazkowy předsyda mło­dźinskeje organizacije Juso Kevin Küh­nert chce swoje zastojnstwo dočasnje spušćić a klětu za zwjazkowy sejm kan­didować. 31lětny na zwjazkowym kongresu kónc nowembra wotstupi, rěčnica SPD potwjerdźi. Kühnert, kiž je zdobom městopředsyda SPD, chcył klětu nazymu w Berlinskim Tempelhofje-Schönebergu za wólby zwjazkoweho sejma nastupić.

Kral Španisku tajnje wopušćił

Madrid (dpa/SN). Bywši španiski kral Juan Carlos je kraj tajnje wopušćił. Po informacijach medijow je 82lětny nan krala Felipy VI. hižo minjeny kónc tydźenja wupućował. Španiska justica přećiwo Carlosej korupcije dla přepytuje. W skandalu dźe wo płaćenje wobtykanskich pjenjez při twarje železniskeje spěšnočary w Sawdi-Arabskej přez španiski konsorcij lěta 2008. Tehdy bě Juan Carlos wot Sawdičanow pječa sto milionow dolarow dóstał. Jako kral bě wón hač do 2014 před přesćěhanjom škitany.

Witaja cofnjenje wojakow USA

Italski ministerski prezident Giuseppe Conte je so wčera na poswjećenju noweho awtodróhoweho mosta w Genuwje dźě­ła­ćerjam za dobre dźěło z awtogramom na nahłowniku dźakował. Nowy móst steji na městnje stareho z mjenom „Morandi“, ­kotryž bě so 14. awgusta 2018 zwjezł a 43 ludźi do smjerće storhnył. Foto: dpa/Attili/Ho Chigi Press Office

Lambrecht za demonstracije

wutora, 04. awgusta 2020 spisane wot:
Berlin (dpa/SN). Zwjazkowa justicna minister­ka Christine Lambrecht njeje ­za to, protestne demonstracije přećiwo wobmjezowanjam koronawirusa dla w nuzy wot wšeho spočatka zakazać. „Mam za jara wažne, zo su demonstra­cije zaso móžne a zo smědźa tam ludźo swoje měnjenje k aktualnej po­li­tice knježerstwa w koronakrizy swobodnje a zjawnje zwuraznić“, rjekny politikarka SPD časopisej Spiegel. Wědome ranje­nje předpisow korony dla přez demon­strantow pak je za nju „zamylace a nje­akceptabelne“. W Berlinje bě minjenu sobotu­ 17 000 ludźi přećiwo wob­mje­zo­wanjam korony dla na dróhu šło. Na kóncu bě jich 20 000 wobdźělnikow, kotřiž njedźiwachu na wěstotny wotstawk a njemějachu škitny nahubnik. Policija je demonstraciju rozpušćiła.

GEW: Start šule „wulke riziko“

wutora, 04. awgusta 2020 spisane wot:
Berlin (dpa/SN). Předsydka dźěłarnistwa za wobłuk kubłanje GEW Marlis Tepe widźi wulke problemy nastupajo zahajenje normalneje šulskeje wučby. „Šule wote­wrěć je wulke riziko“, rjekny Tepe Passauskim nowinarjam. Wšitcy wobdźěleni měli jara kedźbliwi być a wěstotny wotstawk dodźeržeć. Přiwšěm je „zasadnje derje“, zo w šulach dale dźe a zo móža dźěći a młodostni zaso tam wuknyć. Tepe­ pak kritizuje, zo njejsu kubłanišća na nowu situaciju přihotowane, dokelž nimaja wotpowědne informacije. Strowotniske zarjady bychu jich hygienowe plany pruwować dyrbjeli. Tež z digitali­zaciju na mnohich šulach hišće klaca.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND