Berlin/Choćebuz (dpa/SN). Přihoty za to, wudobywanje brunicy nanajpozdźišo hač do lěta 2038 zakónčić, derje postupuja. Zwjazkowy kabinet je wčera zrěčenju mjez Zwjazkom a brunicowymi přede­wzaćemi přihłosowało. Tak dóstanu koncerny wotpowědne wotškódnjenje, jeli milinarnje wotpinaja. Podpisane zrěčenje hišće njeje. Wone pak wobsahuje pasus, zo móhli termin wotšaltowanja jednotliwych milinarnjow bjez přidatneho wotškódnjenja wo tři lěta doprědka sćahnyć. To dyrbjał Zwjazk pjeć lět do zažneho termina wobzamknyć. Nimo toho je w zrěčenju zapisane, zo z politiskich rozsudow, kotrež móhli njerentabelnosć wuhlowych milinarnjow zawinić, žadyn narok na přidatne wotškódnjenje njewurosće. Podpisaja-li předewzaća, wuzamkuja wone zdobom přećiwo kóncej wudobywanja wuhla skoržić.

Jednanja ze zwjazkowym knježerstwom su hižo wotzamknjene, zdźěli nowinska rěčnica Choćebuskeho koncerna Łužiska energija a milinarnje (LEAG). Detaile žane znate njejsu, ale kaž ze zrěčenja wuchadźa, dóstanje LEAG wotškódnjenje něhdźe 1,75 miliardow eurow.

Wojacy z Němskeje do Pólskeje

štwórtk, 25. junija 2020 spisane wot:

Washington (dpa/SN). Prezident USA Donald Trump chce wojerske jednotki z Němskeje do Pólskeje přepołožić. Cyłkownje potrjechi to něhdźe 25 000 wojakow. Trump wopodstatni postupowanje z tym, zo Němska jenož mało pjenjez ­za zakitowanje wudawa. W Zwjazku je tuchwilu 34 500 wojakow z USA zaměstnjenych. Někotři z nich maja so samo do USA nawróćić. Tamni budu po cyłej ­Europje zasadźeni, mjez druhim budźe Pólska jedne ze stejnišćow. Prezident ­susodneho kraja Andrzej Duda, kiž je Trumpa wčera we Wasingtonje zetkał, ­samo připowědźi, zo chcedźa wojerske jednotki USA zapłaćić. Pólska prócuje so hižo dlěje wo wjace wojakow we kraju, zo móhli napřećo Ruskej móc demonstrować. Tak móhli sej samo US-bazu w kraju předstajić.

Tež na zakitowanskim zrěčenju z USA je Pólska zajimowana. Duda pak dyrbješe wčera bjez konkretnych wuprajenjow domoj jěć. Mjeztym pak Trump zwurazni, zo su USA a europski kraj tak wusko zwjazani kaž nihdy do toho.

Žně hromaka zakónčene

štwórtk, 25. junija 2020 spisane wot:

Ratarske předewzaća zhladuja na spodźiwnu sezonu z wjele šmjatkami

Drježdźany (dpa/SN). Plahowarjo hromaka zhladuja lětsa na jara spodźiwnu sezonu. Tradicionelnje wšak tule woblubowanu zeleninu wot 24. junija wjace nježněja. Dokelž běchu na spočatku sezony hosćency zawrjene, su so někotři ratarjo rozsudźili, jenož na něhdźe połojcy planowaneje přestrjenje hromak plahować. Přiwšěm bě naprašowanje kupcow z blakami chětro wulke. „Mnozy běchu doma a mějachu chwile sej něšto warić“, praji René Heidig z agrarneho předewzaća Naundörfel. Na kóncu sezony mějachu tam telko skazankow, zo zelenina lědma dosahaše. Wšako bě tež sakske knježerstwo dowoliło, hosćency zaso wotewrěć. Domanic ratarski zawod w Hózku bě ze žnjemi spokojom. Přiwšěm njemóžeše zeleninu dospołnje wotbyć, wšako běchu hosćency dołho zawrjene.

Wulki zawjazk

štwórtk, 25. junija 2020 spisane wot:
Wupada tak, jako móhli w Berlinje hišće do lětnjeje přestawki to docpěć, na čož tež łužiscy akterojo njesćerpnje čakaja. Zakonjej wo kóncu wudobywanja brunicy a wo změnje strukturje trjebatej na nowy tydźeń jenož hišće wotum parlamenta a krajneje komory. Wězo, Sakska a Braniborska na tym wobstawatej, zo zakonjej płaćiwosće nabudźetej. 3. julij, kotryž je tež sakski hospodarski minister Martin Dulig před dwěmaj tydźenjomaj dźěłarnikam IG metal wuchodneje Sakskeje jako finalny termin mjenował, hodźi so potajkim dodźeržeć. Duligowa strona SPD pak njeje hišće přezjedna, žada sej wosebje nastupajo kónc kamjentneho wuhla dalše jednanja. Nadźijomnje wone termin njewohroža. Pozitiwnje je powěsć nastupajo zrěčenje Zwjazka z wuhlowymi předewzaćemi, zo móhli jednotliwe milinarnje tři lěta do předwidźaneho termina wot syće wotpinyć. Zo dyrbi to knježerstwo pjeć lět do toho wobzamknyć, je wulki zawjazk přichodnym knježerstwam. Axel Arlt

Wótry wołojnik (25.06.20)

štwórtk, 25. junija 2020 spisane wot:
Přeco to samsneŠNAK

To a tamne (25.06.20)

štwórtk, 25. junija 2020 spisane wot:

Móšnju ze 460 eurami namakała je wutoru popołdnju 13lětna holca w Drježdźanach blisko Hłowneho dwórnišća a je ju hnydom policiji přepodała. Sprawnosć chcedźa zastojnicy nětko honorować a jej darik přepodać. Hač tež wot wobsedźerja móšnje něšto dóstanje, to so hišće pokaza. Winowatosć za to dźě žana njewobsteji.

Dwaj razaj wob lěto narodniny swjećić smě nětko 15lětny młodostny z porynsko-pfalcskeho městačka Kirn. Na dompuću ze zetkanja z přećelemi bě wón tak mučny, zo so na kolije železnicy lehny a njepytny ani, kak regionalny ćah přijědźe. Lokomotiwnik bě jeho wuhladał a zawoła policiju. Zastojnicy dyrbjachu młodostneho samo budźić, tak kruće wón spaše. Zo je tajku strašnu situaciju přežiwił, jemu scyła wědome njebě.

Duda pola Trumpa

srjeda, 24. junija 2020 spisane wot:

Washington (dpa/SN). Něšto dnjow do prezidentskich wólbow w Pólskej přebywa jeje statny prezident Andrzej Duda dźensa na wopyće pola prezidenta USA Donalda Trumpa we Washingtonje. Najwažniša tema je wojerska prezenca USA w Pólskej, kotrejež so Duda jara nadźija. W rozmołwje ma tež wo wobrónjenje pólskeho wójska ze stron USA hić. Wopyt Dudy je prěni tajki, po tym zo so koronawirus tak masiwnje w USA rozpřestrěwa.

Swětowe hospodarstwo ćerpi

Washington (dpa/SN). Mjezynarodny měnowy fonds (IWF) chcyše dźensa aktualizowanu prognozu k wuwiću swětoweho hospodarstwa předstajić. Wone dźě tuchwilu jara ćerpi. Hladajo na dale wupřestrěwacy so koronawirus budu negatiwne wuskutki sylniše hač hišće w aprylu wočakowane, zdźěli ludowa hospodarka IWF Gita Gopinath w swojim internetnym blogu. Za klětu liči měnowy fonds zaso z rozrostom hospodarstwa.

Nětko bě Wiesenhof potrjecheny

W Moskwje su dźensa dobyće nad nacistiskim režimom před 75 lětami wopominali a wulku wojersku paradu wotměli. Poprawom chcychu hižo 9. meje dźeń dobyća wo­swjećić, štož pak koronapandemije dla wotprajichu. Nětko su to potajkim nachwatali, byrnjež w Ruskej hišće nowoinfekcije zwěsćeli. Foto: pa/Aleksander Zemljaničenko

Na ćežišća so dojednali

srjeda, 24. junija 2020 spisane wot:

Drježdźany (dpa/SN). Strony sakskeho knježerstwa, CDU, SPD a Zeleni, su so wčera na prěnim posedźenju koaliciskeho wuběrka na 17 ćežišćow zhromadneho dźěła dojednali. Mjez druhim chcedźa chorownje a strowotniski wobłuk bóle podpěrać. Za wažne dale maja fachowcow za Saksku zdobyć. Poskitk wobnowjomnych energijow chcedźa rozšěrić, slědźenje, wuwiće a digitalizaciju sylnišo podpěrać.

Hakle loni wuzwolena koalicija ma drje z tuchwilnej koronapandemiju wulke wužadanje zmištrować, ma pak zdobom dźěło knježerstwa wukonjeć. Nastupajo w januaru předstajene programy njemóža njedostatka pjenjez dla wšitko tak přewjesć kaž předwidźane. Wšako su wjele wobłukow pandemije dla podpěrali.

Dalše wolóženja

srjeda, 24. junija 2020 spisane wot:

Podstupim (dpa/SN). W Braniborskej móža wobydlerjo z nowymi wolóženjemi wobmjezowanjow ličić, zdźěli wčera rěčnik braniborskeho knježerstwa Florian Engels w Podstupimje. Kopańca, mjetańca a judo změja dorosćeni bórze zaso dowolene. Dotal smědźachu to jeno dźěći a młodostni. Na pasažěrskich łódźach njetrjebaja pućowacy pod hołym njebjom hižo škit za hubu a nós měć, na dowolowych jězbach w busu njetrjebaja sobujěducy na wěstotny wotstawk dźiwać. W zjawnym bliskowobchadźe wšak je škitne zakryće dale trěbne.

Přichodnu wutoru chce knježerstwo wo mjenowanych wolóženjach rozsudźić. Hižo wot 15. junija w Braniborskej wobmjezowanja, kaž na přikład socialnych kontaktow, krok po kroku zběhnu.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND