Berlin (dpa/SN). Zwjazkowy sejm chcyše dźensa popołdnju wo dźělnym legalizowanju cannabisa w Němskej rozsudźić. Amplowa koalicija planuje ze swojim ­zakonjom kontrolowane wužiwanje wopojneho jěda z mnohimi wobmjezowanjemi. Plahowanje a wobsydstwo postajeneho mnóstwa za swójski konsum ma po tym za połnolětnych wot 1. apryla móžny być. Wot 1. julija je njekomercielne plahowanje cannabisa dowolene. Wo daloko sahacej změnje dotalneje drogoweje politiki su hač do kónca jara kontrowersnje diskutowali. Zwjazkowy minis­ter za strowotnistwo Karl Lauterbach (SPD) bě optimistiski, zo zwjazkowy sejm noworjadowanje wobzamknje. W strowotniskim wuběrku zwjazkoweho sejma běchu so SPD, Zeleni a FDP za legalizowanje wuprajili. Tež Lěwica je swoje přihłosowanje signalizowała. Přećiwo planam knježerstwa hłosować chcychu CDU/CSU a AfD. Strony žadaja sej hnydomny kónc wšěch planowanjow nastupajo legalizowanje, dokelž liča z raznymi wuskutkami na polu drogoweje kriminality.

Jako bě Čorna Pumpa dotwarjena, smy doma přestali serbować – tajke abo podobne wuprajenja słyšiš wot staršich ludźi Wojerowskich kónčin. A zdobom je w archiwach dosć hołdowanja płunowemu kombinatej ze stron tehdomnišich SED přichilenych serbskich funkcionarow čitać. Tuteje změny strukturow na njedobro Serbow w powójnskim času dla mam wulke zrozumjenje za kóždu skepsis ludźi napřećo swětłowni aktualneje změny strukturow w Serbach, Astrocentrumej Łužica. Tohodla je prawje, zo narodna organizacija dźensa šansy a rizika zjawnje tematizuje. So wě, zo mějachu masy němskich dźěłaćerjow w Čornej Pumpje hinaši poćah k serbšćinje hač změja to mjezynarodni wědomostnicy Astrocentruma, kotřiž su na wjacerěčnosć zwučeni. Na kóncu njerozsudźi pak jeničce sympatija partnerow, ale naše sebjewědomje, kajku rólu budźe naša rěč w přichodźe w našej domiznje hrać. Tutu zamołwitosć njemóžemy delegować. Marcel Brauman

Při porodźe dźěsća spontanje pomhała je Berlinska wohnjowa wobora. Starosćiwy susod młodeje swójby bě wobornikow wo pomoc wołał, jako bě porod wotwidźomny. Pomocnicy z nuzowym wačokom muža domoj přewodźachu. Krótko na to porodźi mać „strowe a zbožowne dźěćo“, wohnjowa wobora rozprawja. Mać a dźěćo dowjezechu do chorownje. Wohnjowa wobora na swojej internetnej stronje młodym staršim radźi, sej radšo bydlenje w susodstwje wobornikow pytać.

Na wšěch 48 kóčkow rědkeje družiny Ukrainian-Levkoy je weterinarny zarjad z bydlenja w Berlinje-Marzahnje wuswobodźił. Zwěrjata bjez kožucha a z wulkimaj wočomaj mějachu zdźěla ćělne brachi a genetiske njedostatki. Kóčki su na wjacore zwěrjatownje rozdźělili. Mužej su dalše plahowanje zakazali a jeho wobskoržili.

Brüssel/Grodk (SN/at). Delegacija Łužiskeho kruha je wčera w Brüsselu krajnej zastupnistwje Braniborskeje a Sakskeje při Europskej uniji wo rozmołwje z hospodarskim komisarom EU Thierryjom Bretonom informowała. W srjedźišću steješe rozsud Łužicy, chcyć so stać z prěnjej „dolinu nettoweje nule (Netto-Null Valley) Europy, kotryž běchu zastupjerjo zwjazkarstwa z komisarom rozjimali.

Łužiski kruh a krajnej zastupnistwje chcedźa zhromadnje přichodne trěbne kroki wothłosować, informowaše komunalne zwjazkarstwo wčera. Zaměr je, Łužicu pola Zwjazka a krajow jako prěni modelowy region za nowe inwesticije za transformaciju etablěrować. Wobě statnej kencliji nětko ministerskeju prezidentow Dietmara Woidku (SPD) a Michaela Kretschmera (CDU) wo naležnosći informujetej. Bliske regiony Čěskeje a Pólskej měli do rozmyslowanjow wo modelowym region nettoweje nule Łužica zapřijeć. Wjesnjanosta Rěčic, Ralf Brehmer, wjeseli so nad konsensom z krajnym zastupnistwom Sakskeje, zo móhła Łužica jako tajki modelowy region směrodajny přikład za cyłu Europu być.