Madrid/Barcelona (dpa/SN). Před najwyšim sudnistwom w španiskim Madridźe započa so dźensa dopołdnja z wulkej napjatosću wočakowany proces přećiwo dwanaće katalanskim separatistam. Statne rěčnistwo wumjetuje wobskorženym politikarjam a aktiwistam w zwisku z ludowym rozsudom wo njewotwisnosći 1. oktobra 2017 zběžkarstwo, rokoćenje a znjewužiwanje zjawnych srědkow. Wobskorženym hrozy w najhóršim padźe jastwo hač do 25 lět.

Sudnistwo chce nimale 600 swědkow přesłyšować, mjez nimi Mariana Rajoyja. Tón bě swój čas ministerski prezident Španiskeje. Jednanje ma po informacijach sudnistwa znjamjeńša tři měsacy trać. Něhdyši regionalny prezident Carles Puigdemont, kiž je w belgiskim eksilu, njeje wot procesa potrjecheny.

Přiwisnicy njewotwisnosće Katalonskeje su k wjacorym demonstracijam namołwjeli. Protestne zarjadowanja njeplanuja jenož w Barcelonje a druhich katalanskich městach, ale tež w Brüsselu, Berlinje, Hamburgu a Kölnje.

Debata mjez SPD a CDU/CSU wo reformje socialneho systema

Podstupim/Berlin (dpa/SN). Braniborski ministerski prezident Dietmar Woidke (SPD) ma dalše zwyšenje minimalneje mzdy za centralnu temu socialdemokratow. Wotstawk mjez tymi „kotřiž na dźěło chodźa, a tymi, kiž njedźěłaja, dyrbi wjetši być hač dźensa, a to na přikład z moderatnym, ale běžnym zwyšenjom minimalneje mzdy w přichodnych lětach“, rjekny krajny předsyda SPD powěsćerni dpa. „Ludźo w Němskej, kotřiž dźěłaja, dyrbja něšto z toho měć, woni dyrbja wědźeć, čehodla dźěłać chodźa.“

Nawodnistwo SPD je wčera a zawčerawšim w Berlinje mjez druhim wo alternatiwach za reformu Hartza IV wuradźowało. Hladajo na špatne wuslědki naprašowanjow chcyła strona swój socialny profil dale zesylnić. W swojim koncepće k znowawusměrjenju socialneho stata chcedźa socialdemokraća mjez druhim minimalnu mzdu wot tuchwilu 9,12 na dwanaće eurow zwyšić. Woidke je w tym zwisku tež planowanu reformu bjezdźěłnostneho pjenjeza II witał. Zdobom zakitowaše wón wuznam bywšeje „Agendy 2010“ tehdyšeho zwjazkoweho kanclera Gerharda Schrödera (SPD).

Zwjazkowy hospodarski minister Peter Altmaier (CDU) je dźensa ze zastupjerjemi USA wo móžnosćach wobšěrnišeho dowožowanja běžiteho zemskeho płuna z USA wuradźował. Němska steji z kóncom wužiwanja jadroweje energije a z předwidźanym kóncom wudobywanja brunicy wot 2022 před wulkim wužadanjom, trěbnu milinu zaručić. Z běžitym płunom chcył minister zastaranje nachwilnje zawěsćić. To klinči logiske, dwěle pak su dowolene. Započało je so wšo z dealom prezidenta komisije EU z USA, zo by wikowanskej wójnje zadźěwał: Europa budźe w Americe wjace běžiteho zemskeho płuna woteběrać. Tón pak tuchwilu we wubědźowanju wobstać njemóže. Toho­dla trjeba Amerika nowe płunowe wiki tež w Europje. Pólska chce so tam z centrumom za rozšěrjenje mjenowaneje surowizny stać. A USA zesylnjeja ćišć na němsko-ruski projekt Nordstream 2. Wikowanju tajka ideologija docyła njetyje. Axel Arlt

Budyšin (CS/SN). Hospodarske prašenja a naležnosće swětoweje politiki stejachu w srjedźišću foruma w Budyskim hotelu „Residence“, na kotrymž bě zapósłanc FDP Torsten Herbst składnostnje wopyta generalneho­ konsula USA Timothyja Eydelnanta­ minjeny štwórtk přeprosył.

Hósć skoržeše, zo dyrbja USA we wěstotnej politice najwjetše poćežowanja znjesć, a sej zdobom žadaše, zo dyrbjeli kraje Europskeje unije dwaj procentaj swojeho nutřkokrajneho bruttoprodukta za zakitowanje wudać. Tež w hospodarskej politice njeje žaneje runowahi. W Němskej wjele kritizowany prezident USA Donald Trump njeje diplomatam lochki partner, dokelž njeje rodźeny politikar, ale předewzaćel. Přiwšěm, Eydel­nant­ zwurazni, je Trump woleny, a tuž dyrbja sej to wšitcy někak zarja­dować. USA su dźensa bóle pačene hač prjedy, štož pak tež za Europu płaći.