Tučasnje su we Łužicy kóždy kónc tydźe­nja halowe koparske turněry. Tež Zapadołužiski koparski zwjazk (WFV) přeco zaso swójske halowe wokrjes­ne mišterstwa wot młodźiny A do F za­rjaduje. Tak wotměwaja so najhusćišo najprjedy předkoła, po tym mjezykoła a na kóncu finalne koło. Wot decembra přewjeduja tuž tež najwše­lakoriše turněry w halach Budyskeho wo­krjesa.

W Ralbicach je WFV njedawno sobotu kaž tež njedźelu dwaj turněraj přewjedł. Sobotu dopołdnja zahaji młodźina F mjezykoło. Mjez šěsć mustwami běše tam ST Marijina hwězda jako serbski zastu­pjer pódla, docpě pak jenož pjate městno a so tuž za finalne koło kwali­fikowała njeje. Teamaj z Wojerec a Hermanec móžeštej na kóncu wyskać. Wobaj změjetej tuž šansu sej halowe mišterstwo w starobnej klasy F na přichodnym turněrje zawěsćić.

Po mocyměrjenju najmłódšich nastupi młodźina E w mjezykole přećiwo sebi. Tu wobdźěli so sydom cyłkow, ale žadyn serbski. Přesadźiłoj stej so tam Jednota Kamjenc a SV Ottendorf-Okrilla.

Wuměnjenja za trening w přirodźe na nowu sezonu běharjow wurjadne

W swojim 65 lět trajacym sportowanju jako běhar njejsym dotal móhł pod tajkimi­ wurjadnymi, nimale nalětnimi wje­dro­wymi poměrami w tydźenjach so kónčaceho a spočatk lěta w přirodźe trenować a so wubědźować kaž tónkróć.

W zymskich měsacach wot nowembra hač do kónca februara přihotuja so bě­harjo zaso na wurisanja noweje sezony. W mjezyčasu intensiwneho treninga w přirodźe při najwšelakorišim wjedrje so pak tež rady na tym abo tamnym crossowym wubědźowanju wobdźěleja. Běhar chce dźě wědźeć, hač su so dotal nałožena móc, wobjim treninga a prawa spěšnosć wudanili. Štóž pak dyrbi runje w tej dosć ćežkej fazy za ćěło a duch dźěle ze swo­jeho intensiwneho zwučowanja šmórnyć, dyrbi potom w poprawnej wu­bědźo­wanskej sezonje wosebje we wutrajnosći ze słabšimi wukonami ličić. Najwjetši dyr je stajnje dlěša chorosć!

Budissa Budyšin młodźina A

– Sokoł Ralbicy/Hórki 2:1 (1:0)

Za hosći zasadźeni: Bjeńš – Šewc, Kobalc, M. Matka, K. Matka, Wałda, Budar, Rawš, Gloxyn, Šiman, G. Kurjat, M. Kurjat, Domaška, Nuk, Materna

Po jasnym dobyću 5:1 w prěnim tesće minjenu njedźelu w Kamjencu přećiwo SJ Njebjelčicam dojědźechu sej koparjo Sokoła Ralbicy/Hórki njedźelu do Humboldtoweho haja w Budyšinje. Na kumštnym trawniku přewjedźechu z juniorami młodźiny A Budissy Budyšin dalši test. Hižo w lěću běštej wobě mustwje w De­lanach mocy měriłoj, tehdy so Sokoljo ze 4:0 přesadźichu.

Biskopičanske KT 08 II

– SJ Njebjelčicy 4:2 (2:1)

Za hosći zasadźeni: Matješk – Kral, Šołta, Haška, Hanuza, Korjeńk, Gödig, Pawlik, Malaškin, Mikławšk, O. Domš, F. Domš, Wagner, Lejnart, Hrjehor, Ričel

Na kumštnym trawniku w Biskopicach je so Njebjelčanske koparske mustwo lěpje prezentowało hač w Kamjencu. Hnydom w 2. min. přesadźi so Handrij Korjeńk w šěsnatce domjacych a třěli 1:0. Hosćićel pak wukonješe ze spěšnymi a krótkimi přihrawkami ćišć na Njebjelčanow a tak po derje wuhratym nadběhu přez prawu stronu w 11. min. wuruna. Krótko po tym wudoby sej róžk z lěweje strony. Józef Matješk w Njebjelčanskich wrotach sčasom njezapřimny, a domjacy nadběhowar zhłójčkowa bul k 2:1 do syće. Znowa bu Korjeńk w centralnym nadběhu derje nahraty, połoži pak sej kulowatu kožu předaloko, a šansa bě fuk.