Hišće w přirodźe wšitko wotpočuje. Najebać to su fachowcy hižo rostliny a zwěrjata lěta postajili. Štom lěta 2021 ma łaćonske mjeno ilex aquifolium. Serbja mjenuja jón wótrolist, Němcy Stechpalme. „Aqui rěka wótre a folium lisćo, tohodla wótrolist“, rozłožuje fachowc lěsnistwa Guido Budar. „Wosebitosć je, zo tón swoje zelene łopjena tež w zymje zdźerži.“ We Łužicy tajki štom skerje njenańdźemy. Typiski je wótrolist w srjedźnej Europje, hdźež su zymy miłe a hdźež włóžna klima knježi. W Němskej pak rosće wón w porynskich kónčinach kaž tohorunja při Sewjernym a Baltiskim morju. Swoje krute městno ma wótrolist w křesćanstwje. „Bołmončku su Jězusa z palmami w Jerusalemje witali. Spominajo na to swjećimy bołmončku, a to z bołminu. W južnych kónčinach Němskeje su pak hižo w srjedźowěku tež hałzy wótrolista za to wužiwali, dokelž běše štom stajnje hižo spočatk nalěća abo w jara pózdnjej zymje połny lisća a bě tuž palmje najpodobniši“, wě Guido Budar.
Wodorunje: 3 rozmlěte zorno, 5 napjaty film, 6 dźěl mjezwoča, 7 wjedro, 10 jězor w Finskej, 13 dźěl narodneje drasty, 14 předmjeno žony Gorbačowa, 15 wuprajenje mjez sobu zwisowacych słowow
Padorunje: 1 Sprung serbsce, 2 mało-, 3 ptak, 4 serbski hudźbutwórc, 8 stolica Tibeta, 9 ma biskop na hłowje, 11 hojenska rostlina a korjenina, 12 rěka přez Mnichow
Budyšin (SN/JaW). Kontaktne wobmjezowanja koronapandemije dla su tež na silwesterskim a nowolětnym dnju dale płaćiwe. Na to skedźbnja hišće raz cyle jasnje Budyski krajnoradny zarjad. Po płaćiwych předpisach smědźa so „w zjawnosći maksimalnje pjeć wosobow z dweju domjacnosćow zetkawać. Runje tak płaćiwe je to za mjezsobne wopyty. Dźěći hač do 14 lět su z toho wuzamknjene.“
We wšej zjawnosći je wudawanje, předawanje a piće alkohola kruće zakazane. W silwesterskej nocy w času mjez 22 a 6 hodź. swoje bydlenje wopušćić zakazane njeje. Runje tak silwestersku pyrotechniku wotpalić njeje cyłotnje zakazane. Města a gmejny pak móža zakazy za derje wopytane zjawne městna wukazać. Wokrjes pak radźi so lětsa silwesterskich praskotakow wzdać, dokelž su kliniki w Budyskim wokrjesu hižo přećežene a zastaranje typiskich silwesterskich zranjenjow tohodla wobćežne. Kaž z krajnoradneho zarjada dale rěka, budźe policija dodźerženje postajenjow „předewšěm na woblubowanych městnach we wokrjesu masiwnje kontrolować“.