Zabyći Serbja Wódry

pjatk, 15. měrca 2024 spisane wot:

Ćežišćo měrcowskeho wusyłanja telewizijneho magacina Łužyca je „dźensa nimale pozabyta ludowa skupina ‚Odrinych Serbow‘, něhdy sydlaca južnje Frankobroda nad Wódru“. Po Druhej swětowej wójnje buchu jeje potomnicy wuhnaći. Mjeztym pak steji skupina w fokusu stawizniskeho slědźenja. Moderator Christian Matthée je so na jeje slědy na woběmaj brjohomaj rěki podał a mjez druhim w Ziltendorfje šwalču Cordulu Bahro našoł, kotraž zhotowja po historiskich předłohach za nju typisku drastu. Dalši přinošk wěnuje so dožiwjenjam wobdźělnicy projekta Zorja kołowokoło zapusta, kotraž je „swjedźeń tak intensiwnje začuwała, kaž hišće ženje, dokelž zamó na nim serbować“. Nimo toho wobswětluja retomas dojutrownych zarjadowanjow w Delnjej Łužicy a sposrědkuja „recept za warjenje ze serbskeje kuchnje“.

Telewizija RBB wusyła Łužycu jutře, sobotu, w 13.35 hodź. Wospjetowanje na samsnym sćelaku slěduje srjedu, 20. měrca, w 2.35 hodź. Telewizija MDR pokaza magacin sobotu, 23. měrca, w 11.45 hodź. W mediatece ARD je Łužyca wot jutřišeho cyłe lěto kóždy čas přistupna.

Jutrownik? Jutry!

pjatk, 01. měrca 2024 spisane wot:

Jutrowne jěchanje, jejkakulenje abo jutrowne wiki – w přichodnych tydźenjach wopytuja zaso tysacy hosći Sprjewine město, zo bychu serbske tradicije a nałožki zeznali. Tola kak widźomni su Serbja scyła w Budyšinje – w tak mjenowanej stolicy Hornjoserbow? Tele prašenje rozjimuja w měrcowskim wudaću telewizijneho magacina Wuhladko. Nimo toho rozprawja wo „Serbach na čerwjenym přestrjencu“, kotřiž běchu z hosćom na lětušej Berlinali kaž tež wo wosudźe młodeju Ukrainjanow, kotrajž staj „wójny dla swoju domiznu wopušćiłoj a wućek pola serbskeje swójby našłoj“. Z dalšim přinoškom pod hesłom „Pozabyte rjemjesło“ wěnuja so „wosebitosćam serbskeho módroćišća“, kotryž „hraješe něhdy přede­wšěm wokoło Wojerec a Slepoho wusahowacu rólu“.

Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 4. měrca, w 6.45 hodź. Telewizija RBB pokaza magacin sobotu, 9. měrca, w 13.35 hodź. W mediatece ARD je Wuhladko wot jutřišeho cyłe lěto kóždy čas přistupne.

Serbski sydlenski rum?

pjatk, 16. februara 2024 spisane wot:

Februarske wusyłanje telewizijneho magacina Łužyca wěnuje so z filmom „Źo lažy domownja Serbow? Zwada wó sedleński rum w Bramborskej“ nadal palacej temje a prašenju, kotre kónčiny a gmejny w Braniborskej přisłušeja serbskemu sydlenskemu rumej. Pask Britty Wulf a Rajnera J. Nagela wobswětluje „zasakły konflikt, kotryž Delnju Łužicu hižo wjele lět poćežuje a so tuchwilu tež sudnisce wuwojuje“. Nimo toho „pyta film za serbskimi korjenjemi Braniborskeje, při čimž so wukopa, zo je słowjanske herbstwo žiwiše, hač to (móžne) juristiske wusudy wotbłyšćuja“.

Telewizija RBB wusyła magacin jutře, sobotu, w 13.35 hodź. Wospjetowanje na samsnym sćelaku slěduje srjedu rano w 5.10 hodź. Telewizija MDR pokaza Łužycu sobotu, 24. februara, tónraz hižo w w 11.45 hodź. W mediatece ARD je magacin wot jutřišeho cyłe lěto kóždy čas přistupny.

„Serbske Beatlesy“

pjatk, 02. februara 2024 spisane wot:

Februarske wusyłanje telewizijneho magacina Wuhladko portretuje „serbskeho nuzoweho sanitetarja za čas njetrjeba­wšich nuzowych zasadźenjow a falowaceho abo přežadaneho personala, kajkiž dźěła hižo dołho na limiće“. Dalšej přinoškaj wěnujetej so „serbskemu rěčnemu hnězdźe w Dešnje“ a „wysoko poćežene wotpadki, kaž na přikład asbest, industrijowe šlapy abo tež radioaktiwnje zanjerodźene twarske wotpadki składowacej“ deponiji „Wětrowska hora“. Nimo toho wobswětluja pod hesłom „Serbske Beatlesy­“ pozadki přichodneje hornjoserbskeje inscenacije Němsko-Serbskeho ludoweho dźiwadła na hłownym jewišću „Na tamnym boku měsačka HERCY“.

Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 5. februara, w 6.45 hodź. Telewizija RBB pokaza magacin sobotu, 10. februara, w 13.35 hodź. W mediatece ARD je aktualne Wuhladko wot jutřišeho cyłe lěto kóždy čas přistupne.

Serbske wsy a brunica

pjatk, 19. januara 2024 spisane wot:

Stawizny serbskich wsow w dobje brunicoweho hórnistwa steja w srjedźišću januarskeho wusyłanja telewizijneho magacina Łužyca. Moderator Christian Matthée bě w Rogowje pola Baršća po puću – wjes to, kotraž bu Janšojskeje jamy dla přesydlena. Mjez časowymi swědkami, kotrychž je wopytał, staj na přikład bywši Rogowski wjesnjanosta Bernd Siegert a Waldemar Lobert, kiž je Tšawnicy, hdźež bě so narodźił, před 40 lětami wopušćił.

Telewizija RBB wusyła magacin jutře, sobotu, w 13.35 hodź. Wospjetowanje na samsnym sćelaku slěduje srjedu, 23. januara, rano w 2.45 hodź. Telewizija MDR pokaza Łužycu sobotu, 27. januara, w 11.45 hodź. W mediatece ARD je magacin wot jutřišeho cyłe lěto kóždy čas přistupny.

Europeada a brigada

pjatk, 05. januara 2024 spisane wot:

Wuhladaj na „wosebitej wjerškaj za Serbow w Hornjej Łužicy w lěće 2024“ stej ćežišći januarskeho wusyłanja telewizijneho magacina Wuhladko. Pod hesłom „Kopańca mjez morjomaj“ wěnuja so lětušej Europeadźe, koparskim mišterstwam narodnych mjeńšinow w němsko-danskej namjeznej kónčinje. Nimo toho zhladuja składnostnje 75. róčnicy – „narodniny“ swjeća 25. januara – załoženja 1. kulturneje brigady na stawizny ćělesa. Z přinoškom „Jandźel za jandźela“ wobswětluja zhromadnu akciju Serbskeho rozhłosa a Wuhladka, w kotrejež wobłuku buchu třo na dobro zjawnosće skutkowacy Łužičenjo počesćeni.

Telewizija MDR wusyła magacin jutře, sobotu, w 11.45 hodź. Wospjetowanje na samsnym sćelaku slěduje póndźelu, 8. januara, w 6.45 hodź. Telewizija RBB pokaza Wuhladko sobotu, 13. januara, w 13.40 hodź. W mediatece ARD je wusyłanje wot jutřišeho cyłe lěto kóždy čas přistupne.

Adwentna Łužyca

pjatk, 15. decembera 2023 spisane wot:

Telewizijny magacin Łužyca wěnuje so w decembru předewšěm počasu so hodźacym temam. Tak předstaji mustwo wokoło moderatora Christiana Matthéeja na přikład hodowne wiki na Lědach kaž tež w Lubnjowje a rozprawja wo adwentnym swjedźenju na Šusterec statoku w Trebinje. Nimo toho wuhódnoća hodowne projektowe dny šulerjow, kotrež stej Choćebuski Serbski muzej a rěčny centrum Witaj wuhotowałoj. Dalšej přinoškaj wobswětlujetej třeći měsac „najwažnišeho pospyta rěčneje rewitalizacije w Delnjej Łužicy, projekt Zorja, a počesćowanje „wuznamneju serbskeju filmowcow Donalda Saischowy a Hellmutha Henneberga we wobłuku lětušeho Choćebuskeho filmoweho festiwala“.

Telewizija RBB wusyła magacin jutře, sobotu, w 13.35 hodź. Wospjetowanje na samsnym sćelaku slěduje srjedu, 20. decembra, w 3 hodź. Telewizija MDR Łužycu tónraz njepokaza. W mediatece ARD je magacin wot jutřišeho cyłe lěto kóždy čas přistupny.

Dźesaćitysacy rěčacych

pjatk, 01. decembera 2023 spisane wot:

W lěće 2100 ma 100 000 ludźi aktiwnje serbsce rěčeć. Kak móhło so to zwoprawdźić, je hłowna tema decemberskeho wusyłanja telewizijneho magacina Wuhladko. Dalši přinošk nawjazuje na reportažu z lěta 2001 a pokazuje, što je so mjeztym w Trjebinje změniło. Nimo toho předstaja nowy dwurěčny wobchod w Njeswačidle a podadźa pokiwy, što so lětsa pod hodowny štom hodźi.

Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 4. decembra, w 6.45 hodź. Telewizija RBB pokaza magacin sobotu, 9. decembra, w 13.30 hodź. W mediatece ARD je Wuhladko wot jutřišeho cyłe lěto kóždy čas přistupne.

„Serbska utopija“

pjatk, 17. nowembera 2023 spisane wot:

Nowemberske wusyłanja telewizijneho magacina Łužyca zwaža so na „wid do přichoda“ a pokaza we wobłuku 33. Choćebuskeho filmoweho festiwala premjernje předstajeny film „Serbska utopija“. Jako projekt serbsko-němskeje syće Łužycafilm zwoprawdźena produkcija wopřijima krótkofilmy „Dnjownik“ Dirka Lienigsa a „Serbske bratšy“ Erika Šyškoho kaž tež „Serbski telewizor“ Helle Stolecki a Karolin Schneideroweje. Epizody su do ramikoweho sciencefictionoweho scenarija pod hesłom „Nowy swět“ zaplećene.

Telewizija RBB pokaza magacin jutře, sobotu, w 13.35 hodź. Wospjetowanje na samsnym sćelaku slěduje srjedu, 22. nowembra, rano w 6 hodź. Telewizija MDR wusyła Łužycu sobotu, 25. nowembra, w 11.45 hodź. W mediatece ARD je magacin wot jutřišeho cyłe lěto kóždy čas přistupny.

Wjelki, wołtar a wino

pjatk, 03. nowembera 2023 spisane wot:

Hłowne ćežišćo nowemberskeho wusyłanja telewizijneho magacina Wuhladko je „přiběraca ličba wjelčich stadłow w Sakskej, kotraž wosebje pola plahowarjow skotu w Hornjej Łužicy bjezsparne nocy“ wuskutkuje. Dalši wobšěrny přinošk wěnuja wobnowjenju Chróšćanskeje cyrkwje a poswjećenju tamnišeho noweho wołtarja. Nimo toho portretuja Wawrijec swójbu, kotraž w nazymskim dowolu wino w Awstriskej žněje, a rozžohnuja so z njeboh Benom Budarjom.

Telewizija MDR pokaza Wuhladko jutře, sobotu, w 11. 45 hodź. Wospjetowanje na samsnym sćelaku slěduje póndźelu, 6. nowembra, w 6.40 hodź. Telewizija RBB wusyła magacin sobotu, 11. nowembra, w 13.35 hodź. W mediatece ARD je Wuhladko cyłe lěto kóždy čas přistupne.

Serbska debata

nowostki LND