Serbske Nowiny

srjeda, 22 apryla 2015 14:00

Sportownja přichodny projekt

Worklečansku gmejnu bjez Franca Bruska móžeš sej runje tak ćežko předstajić kaž na přikład tamniši hat bjez kupy. Hižo dlěje hač 40 lět steji Brusk na čole komuny, hač do lěta 2000 jako hłownohamtski, mjeztym jako čestnohamtski a přistajeny zarjadniskeho zwjazka Při Klóšterskej wodźe. Što je w tym času wšitko na dobro Worklečanskeje gmejny zwoprawdźił, je ćežko naličić. Wjesny konsum, přitwar šule, sportownja, pěstowarnja, žłobik, płuno­wód, nowe dróhi a kolesowanske šćežki su jenož někotre z wulkich přikładow.

Njelochki bě předewšěm čas po politiskim přewróće, jako hrožachu Worklecy socialnje trochu wusnyć. Tehdy je Franc Brusk w poslednim wokomiku wotwo­barał, zo wjesny konsum zawru. Po wja­corych lětach prócowanja je so poradźiło, zo do hrodu ambulantna słužba maltezow zaćehnje, po tym zo bě chorownja wu- a do Kamjenca přećahnyła. A najnowši wuspěch je, zo su za hosćenc no­weho wobsedźerja namakali a zo móža so mjeztym tež nad saněrowanym hosćencom wjeselić.

Njewšědny dźeń dožiwi njedawno 47 dźěći z Běłowodźanskeje pěstowarnje „Ulja“. Blisko Chrjebje-Noweje Wsy su wone zhromad­nje ze sobu­dźěłaćerjom spěchowanskeho towarstwa Přiroda hornjołužiskich hatow a krajiny Denisom Henningom při škitnych płotach za amfibije pobyli. Kak móžeš aktiwnje zwěrinu a přirodu škitać, to dźěći nětko wědźa. Foto: Joachim Rjela

srjeda, 22 apryla 2015 14:00

Krótkopowěsće (22.04.15)

Na olympiadu serbšćiny

Wodowe Hendrichecy. Wot přichodneje póndźele hač do srjedy chce so 58 serbšćinarjow ze 6. lětnika na 49. centralnej olympiadźe serbskeje rěče we Wo­dowych Hendrichecach wubědźować. Při­zje­wjeni su wyši šulerjo z Worklec, Ralbic, Radworja, Budyšina, Kulowa a Slepoho kaž tež serbscy gymnazisća z Budyšina, Wojerec a Choćebuza.

Wosmjom stipendij čěšćiny

Budyšin. Wosom wosobow z Łužicy wobdźěli so lětsa na měsačnym lětnim kursu čěšćiny w Praze a Českich Budě­jovicach. Kaž hižo w zašłych lětach pře­wostaja čěske­ knježerstwo přez posrěd­nistwo Rěčneho centruma WITAJ za to stipen­dije. Dwaj serbskaj młodostnaj staj so nimo­ toho wo cyłolětny studij w Praze požadałoj.

Na ratarsku přehladku

wutora, 21 apryla 2015 14:00

Policija (21.04.15)

Ničo přinawuknył

Niska. „Jězbneho započatkarja“, kiž njebě cyle strózby, je policija zawčerawšim w Niskej lepiła. Při kontroli zwěsćichu pola 53lětneho wodźerja Škody 0,3 promile alkohola w kreji. Dokelž muž jězbnu dowolnosć hakle něšto měsacow zaso měješe, płaći wón po zakonju jako započatkar z probowym časom. Kohož w tym času z alkoholom w kreji hač do 0,5 promilow­ lepja, tomu hroža pokuta 250 eurow,­ dypk w Flensburgu, po­dlěšenje proboweho časa a winowatosć, so na wosebitym seminarje wobdźělić.

wutora, 21 apryla 2015 14:00

Wotewru přehladce

Pančicy-Kukow (SN). Hnydom dwě wustajeńcy wotewru njedźelu, 26. apryla, w 14.30 hodź. k zahajenju lětušeje sezony klóšterskeje zahrody w Pančicach-Kukowje. Tam budźe widźeć přehladka „Prjedy hač woteńdźeš“ z wulkoformatowymi fotografijemi Maćija Bulanka wo nošerkach narodneje drasty. Předewšěm, ale nic jeno za filatelistow zajimawa budźe wustajeńca „Přiroda a domizna w formaće listowych znamkow“. W njej widźeć budu tež serbske motiwy, kotrež přinošuje Jörg Petrenc. Měrćin Weclich wote- wrjenje hudźbnje wobrubi.

wutora, 21 apryla 2015 14:00

Kandidat so předstaji

Delni Wujězd (SN). Tež w Hamorskej gmejnje wola 7. junija noweho wjesnjanostu. Jako njewotwisny kandidat nastupi Frank Knobloch. Za to trjebaše wón 40 podpěranskich podpismow. Jenož dobry tydźeń je trało, zo so samo 70 wobydlerjow do Hamorskeho gmejnskeho zarjadnistwa poda a za Knoblocha podpisa. Nětko chce wón swój wólbny program zjawnje předstajić, a to štwórtk, 23. apryla, we 18 hodź. w Delnjowujězdźanskim hosćencu „Tři lipy“. Knobloch je 49 lět a skutkuje samostatnje we wobłuku financnych posłužbow a zawěsćenjow.

wutora, 21 apryla 2015 14:00

Wjesnjanosta skupinarjow wopytał

K zajimawemu stawizniskemu wječorej zetkachu so minjeny pjatk čłonoje Domowinskeje skupiny Komorow/Trupin/Rakecy a dalši zajimcy w Komorowskim młodźinskim klubje. Předsydka Borbora Felberowa powita wosebje Swena Nowotneho, noweho Rakečanskeho wjesnja­nostu, kiž bu hakle tydźenja wuzwoleny. Jako witanski dar přepoda jemu dźěłowy plan skupiny. Swen Nowotny wupraji so za­ to, zo měli so kultura a nałožki na wsach­ gmejny zachować, a podšmórny wuznam towarstwow. Nadźijomnje gmejna a wjesnjanosta wobydlerjow w prócowanju wo aktiwne skupinske dźěło tež přichodnje podpěrujetaj.

„Wikowanske dróhi mjez Kamjencom a Budyšinom“ rěkaše na to přednošk Trudle Kuringoweje. Něhdyša wučerka a županka zaběra so hižo wjele lět ze stawiznami a kulturu swojeje dwurěčneje domizny wokoło Kamjenca. Jara zajimawy film wo wikowanskich pućach w srjedźowĕku a wuznam za žiwjenje našich prjedownikow, wuwiće rjemjesła a industrije – wšo to zbudźi wulki zajim mjez připo­słucharjemi.

Ze Smječkečanskeje cyrkwje su sobudźěłaćerjo Gerntkec třěchikryjerskeje firmy dźens dopołdnja křiž a kulu dele wzali. Dźakowano darej we wsy křćeneho muža móža woboje restawrować a znowa pozłoćić dać, informuje farar Friedrich Prüfer z Halštrowa, kiž Smječkečansku wosadu sobu zastaruje. Restawrowanje wobstara Rjenčec firma z Dobrošic. Foto: SN/Maćij Bulank

wutora, 21 apryla 2015 14:00

Benediktej Dyrlichej zbožo přeli

Wjelelětny šefredaktor Serbskich Nowin, basnik Benedikt Dyrlich, přija dźensa w Budyšinje k 65ćinam zbožopřeća mnohich serbskich a němskich gratulantow. Mjez nimi běchu předsyda Domowiny Dawid Statnik (naprawo), bywši kolegojo z redak­cije, z Němsko-Serbskeho ludoweho dźiwadła, ze Sakskeho krajneho sejma kaž tež zastupjerjo serbskich institucijow. Za čas swojeho šefredaktorstwa je jubilar naš wječornik politisce a wobsahowje profilował. Foto: SN/Maćij Bulank

wutora, 21 apryla 2015 14:00

Rjane wokomiki zapopadnyła

Gloria Žurec skedźbnja z wosebitymi wi­da­mi na swójbnych kaž tež na přećelow a swjedźenje, kotrež zhromadnje wot­měwaja. W knize „Wćipni być“ předstaja so wona jako młoda fotografowka. Loni wobdźěli so Róžeńčanka na dźěłarničce fotografowanje, kotruž běštej Lu­dowe nakładnistwo Domowina a Spěchowanski kruh za serbsku ludowu kulturu wuhotowałoj. „K tomu pohnuł, tam sobu činić,­ je mje Ralbičan Jan Šołta, kiž wědźeše, zo so za fotografowanje zajimuju“, rozłožuje šulerka 10. lětnika Budyskeho Serbskeho gymnazija. Na swojich fotach předstaja wona předewšěm ludźi, žony při přihotach na Kulowski póstniski ćah abo dźěći wulkeje Brězanec swójby, kotrež w delnich Sulšecach jutry swjeća. „Sulšecy su za našu swójbu takrjec ko­rjenje a domizna. Wottam Brězanecy pochadźeja a tam so stajnje rady zetkawamy“, młodostna podšmórnje. Tak bě jej tež poměrnje lochko, mjezwoča a rjane žiwjenske wokomiki zapopadnyć.

nawěšk

nowostki LND