Serbske Nowiny

wutora, 21 apryla 2015 14:00

Krótkopowěsće (21.04.15)

Tafla za Dom biskopa Bena

Smochćicy. Turistiska tafla ma při awtodróze A 4 do směra na Zhorjelc mjez Wujězdom a Słonej Boršću na Smochčanski Dom biskopa Bena skedźbnjeć. Tole zdźěli sakski zarjad za dróhotwar a wobchad. Bruna tafla pokazuje stilizowany hłowny dom z aleju štomow. Baroknemu ansamblej twarjenjow a parka ma so tak wjetša kedźbnosć wěnować.

Studija wo projekće Witaj wušła

Budyšin. Před wjac hač 15 lětami započa so projekt Witaj ze zaměrom, serbsku­ rěč zachować a rozšěrjeć. Tola kak je so­ projekt zwoprawdźił? W runje w LND wušłej publikaciji „Bilingualer Sprach­erwerb im Witaj-Projekt“ před­staja awtorka dr. Jana Šołćina prěni raz wuslědki rěčneho přepytowanja we Witaj-skupinach a -pěstowarnjach.

Wuspěšnje wotrěznyli

póndźela, 20 apryla 2015 14:00

Jasnje pod kolesa přišli

Drohotka Ramnow

– SJ Chrósćicy 4:0 (2:0)

Zestawa hosći: Teschner – Pöpel (46. C. Šmit), Schulze, Runt, Dehn, Dórnik (71. Hawš), Pohling, Domaška, Zahrodnik, Žur (76. D. Šmit), Šafář

Hač na zadźěwaneho Bětnarja nje­trjebaše trenarska dwójka Chróšćanskich koparjow wuspěšne mustwo před­ty­dźe­nja přestajić. W Ramnowje chcychu wězo na dobyćerski wukon nawjazać a sej znajmjeńša dypk wuwojować.

Dobre poł hodźiny wotměwaše so jednanje wosebje mjez šěsnatkomaj, z lochkej lěpšinu za domjacych. Stoprocentowske šansy pak na woběmaj stronomaj nje­běchu. W 33. min. móžeše hosćićel prěni króć wyskać. Wólny kop z 35 metrow lećeše po začuću něhdźe mjeńšinu po powětře. Přiwšěm so Chróšćanam njepo­radźi so k njemu orientować. Sam ste­jacy Grohmann móžeše sej dwaj metraj před wrotami hišće kut wupytać a kulowatu kožu do saka zhłójčkować. Jeno­ štyri mjeń­šiny pozdźi­šo padny 2:0, znowa přez wólny­ kop. Tónkróć dźěše połniska třělwa mjez mnohimi nohami centralnje do klětki.

póndźela, 20 apryla 2015 14:00

GTM we Łužicy

Budyšin (SN). Po intensiwnych prócowanjach je so Marketingowej towaršnosći Hornja Łužica-Delnja Šleska (MGO) zešlachćiło, zo wopyta najwjetša turistiska dźěłar­nička za pućowanski kraj Němsku (GTM Germany Travel Mart) Hornju Łužicu. Wot 26. do 28. apryla zarjaduje Němska centrala za turizm zhromadnje z Durinskej turistiku 41. GTM w městomaj Erfurće a Weimaru, hdźež so tež MGO prezentuje.

Do for­uma, hdźež zetkaja so něm­scy poski­ćerjo z wažnymi wužiwarjemi po­słuž­bow narodnych a mjezynarodnych pu­ćowanskich wikow, wita MGO 24. a 25. apryla w Radebergskej piwarni, w Zhorjelcu a na Ramnowskim baroknym hrodźe­ nimo oficialnych zastu­pjerjow tež wjacorych pućowanskich za­rjadowarjow z Ameriki, Kanady, Chiny, Japan­skeje, Južneje Koreje, Israela, Belgiskeje, Awstriskeje a Słowjenskeje.

Turistisce prezentować chce šef MGO prof. Holm Große Hornju Łužicu a jeje poskitki aktiwneho pućowanja 24. apryla w Biskopičanskim hosćencu L‘Auberge. Wjeršk wječora ma być program Serb­skeho ludoweho ansambla.

Něhdźe 60 mopedistow a wodźerjow motorskich je so wčera na tradicionalnym požohnowanju motorskich w Ralbicach wobdźěliło. Farar Michał Nawka požohnowa po zhromadnym nyšporje přitomnych kaž tež jězdźidła před cyrkwju. Foto: Jan Šołta

póndźela, 20 apryla 2015 14:00

Krótkopowěsće (20.04.15)

Wjesnjanosta pola skupinarjow

Komorow. Mjez wopytowarjemi za­rjadowanja Domowinskeje skupiny Komo­row/Trupin/Rakecy minjeny pjatk w Komorowje bě nowowuzwoleny Ra­kečanski wjesnjanosta Swen Nowotny. Skupinska předsydka Borbora Felberowa přepoda jemu skupinski plan a jeho tež na dalše zarjadowanja přeprosy. Nowotny skedźbni w tym zwisku na wuznam towarstwow a wupraji so za zachowanje kultury a nałožkow na wsach.

Přez mjezy kraja dźěłać

Drježdźany/Podstupim. Hladajo na ak­tualnu debatu w zwisku z přichodom energijoweho koncerna Vattenfall we Łužicy chcedźa zapósłancy CDU Sakskeje a Braniborskeje wušo hromadźe dźěłać. Tole wuchadźa z nowinskeje zdźělenki. Hłowny zaměr je dźěłowe městna w regionje zdźeržeć a so zaměrnje na móžne nowe hospodarske struktury nastajić.

Strach lěsnych wohenjow wulki

póndźela, 20 apryla 2015 14:00

Policija (20.04.15)

Po njezbožu so zhubiła

Budyšin. Mało sobuzamołwitosće za tamnych wobdźělnikow nadróžneho wobchada měješe sobotu rano wodźerka wosoboweho awta w Budyšinje. Krótko po wosmich chcyše wona blisko agentury za dźěło z pódlanskeje hasy na Wonkownu Lawsku wujěć. Při tym pak njewobkedźbowaše předjězbu kolesowarki. Wona dyrbješe tak jara zaborzdźić, zo z kolesom padny a so zrani. K zražce z módrym Roverom pak njedóńdźe. Město toho zo by so jeho šoferka wo njezboženu 51lětnu kolesowarku starała, wona prosće dale jědźeše a so zhubi. Na zbožo sej swědcy awtowe čisło spomjatkowachu. Wo­dźerka Rovera změje so nětko ćeknjenja z městna njezboža dla zamołwić.

póndźela, 20 apryla 2015 14:00

Pokiwaj (20.04.15)

Na film a diskusiju

Budyšin. Film „Cerne jagody“ Maje Nageloweje a Juliusa Günzela pokazaja srjedu, 22. apryla, w 19.30 hodź. w Budyskim Dźiwadle na hrodźe. Je to poetiske powědančko wo žiwjenju, kotrež ma so brunicy woprować. Tomu přizamknje so diskusija wo filmje kaž tež wo aktualnej inscenaciji NSLDź „Mój wuměrjeny kraj“. Tónle kruch dźiwadło njedźelu, 3. meje, posledni raz předstaji.

Do hudźbneje šule pohladnyć

Kamjenc. Wo móžnosćach hudźbneho kubłanja w Kamjenskej hudźbnej šuli na Macher­owej móža so zajimcy sobotu, 25. apryla, wot 14 do 17 hodź. we wobłuku dnja wotewrjenych duri wobhonić.

70 młodostnym a někotrym dorosćenym je Drježdźansko-Mišnjanski biskop Heiner Koch (srjedźa) sobotu w Chrósćicach sakramen­t firmowan­ja wudźělił. Wjetšina holcow bě družču drastu woblečena. Serbskich firmujomnych je biskop w jich ma­ćeršćinje firmow­ał. Na farskej zahrodźe dóńdźe po kemšach k mnohim rozmołwam z Heinerom Kochom. Foto: Feliks Haza

Benediktej Dyrlichej

k pjećašěsćdźesaćinam

Njedawno spožči Mjezynarodna akademija literatury a wuměłstwa Ukrainy Bene­diktej Dyrlichej myto Nikolaja Gogola Triumf. Hnydom dopomnich so na Gogolowej twórbje „Nós“, prěnju sureali­stisku prozu, a dźiwadłowy groteskny kruch „Rewizor“, šwikacy hordosć, hłuposć a twjerdosć ludskeje heje. Snano zda so tole być jara zwažliwe přirunanje, myslo při tym na žiwjenske puće Benedikta Dyrlicha a na wšitke z tym zwja­zane wužad­anja, překwapjenja a přesłapjenja. Ale tole njezda so scyła tak nje­móžne, hódnoćiš-li při tym jeho dotalne žiwjenske lěta a z nimi zwjazane towaršnostne wuwića, katastrofy, přećiwki, dyrdomdeje a přeco zaso budźace a błudźace so nadźije. Hódne to potajkim myto, kotrež hodźi so derje do wopisowanja Dyrlichoweho basniske­ho a publicistiskeho tworjenja w zajimje „propagowanja hornjoserbskeje kultury, literatury a rěče w swěće“ (tak w SN ze 7. apryla 2015).

Hladajće z woknom won! Widźiće, zo wotuća z nalěćom naš kónčk zemje ze zymskeho spara. Zyma je mocy słónca pod­ležała a nas zaso wopušćiła. Z njej wu­ćahnu tež słabosć, letargija a wěsta bjezmócnosć. Na rjedźe je zaso bujne žiwjenje. Wšudźe pokazuja so hižo kwětki w najkrasnišich barbach. Štomy a łuki so zelenja. Baćony so nawróćeja a ptački wot ranja­ do wječora spěwaja. Boža stwórba je połna mocy. Někotre měsacy skići nam wona­ pisany wobraz, kotryž nas čłowjekow posylnja. Słónco wabi nas z domu, zo bychmy mocy čerpali. Čujemy so zaso swobodni. Wosebje naše mozy so z čerstwosću pjelnja a wuwědomjamy sej swoju wokolinu. Za kóždeho samoho­ je to wužadanje, swój wobswět tež nim­o na­lěća z wotewrjenymaj wo­čomaj přijimać.

nawěšk

nowostki LND