Měšćanski běh
22. Budyski měšćanski běh – lěpje ma rěkać běhi – započnje so jutře, sobotu, w 10 hodź. Start a cil budźetej zaso na Póstowym naměsće. Slědowace běhi budu:
10 hodź. 400 m bambinije
10.15 do 12.45 hodź. šulerjo
13.30 hodź. 1,2 km swójby
14 hodź. 5,6 a 9,3 km hłownej běhaj
Sezona blidotenisa so zahaji
Blidotenisća Viktorije Worklecy zahaja jutře, 12. septembra, z domjacej hru sezonu 2015/2016. Wot 18 hodź. wočakuja woni sportowcow z Wětnicy-Hole. Z nowym mustwom chcedźa Worklečenjo rady dobyć. Za nich nastupja Manuel Šołta, Roman Straube, Marcel Linka, Michał a Křesćan Mikławšk a Stephan Mět. Tež tombolu tam zaso změja. Přihladowarjo móža tortu kaž tež dobropis za masažu dobyć.
Zaso volleyball w hali
Skónčnje zaso bule lětaja! Z tutej wuwołacej sadu wabja volleyballistki ST Marijineje hwězdy za start do hrajneje doby 2015/2016. Jutře ju wone w domjacej sportowej hali w Pančicach-Kukowje zahaja. Hrać budu tam wot 14 hodź. tři žónske cyłki: Marijina hwězda, Ochranowske volleyfantki a Žitawa 09 II. Dobyćer małeho turněra po modusu kóždy přećiwo kóždemu kwalifikuje so za dalše koło. Marijine hwězdźički so na podpěru fanow jara wjesela.