Wokrjesne finale we wubědźowanju „Młodźina trenuje za olympiju“
Hrajerjo beachvolleyballa běchu ći prěni, kotřiž startowachu w nowym šulskim lěće do wubědźowanja „Młodźina trenuje za olympiju“. W Budyskej Sprjewinej kupjeli wotmě so při chłódnych temperaturach wokrjesne finale w starobnej klasy II (9. do 11. lětnik). Sportowcy Serbskeho gymnazija Budyšin (SGB) wobkrućichu znowa swoju dominancu. Woni přewinychu Schillerowy gymnazij Budyšin, Goethowy gymnazij Biskopicy a Wyšu šulu Biskopicy.
Turněr wotmě so po systemje „best of three“, to rěka, zo wojowachu mustwa – wobstejace stajnje z holčeje a hólčeje dwójki kaž tež z měšaneho porika – jednu sadźbu hač do 21 dypkow. Beachvolleyballistce Jessica Hetschickec z Dalic a Anni Leidigec z Cyžec, dwójka Józef Hantuš z Radworja/Matej Cyž z Chrósćic a měšany team Swenja Wowčerjec z Prěčec/Maksimilian Jurack z Malešec njedachu sportowej konkurency w pěsku žanu šansu na dobyće. Mustwo SGB skompletowa Toni Rudolph z Wulkeje Dubrawy a dopomha jako wuměnowy hrajer rjanemu wuspěchej serbskeho kubłanišća.
