Zhorjelc (SN/CoR). Wosebitej serbskej temje wěnowane zarjadowanje wotmě so wčera wječor we wobłuku 5. Zhorjelskeho fotoweho festiwala „Městna podawkow“. Zapřijate do festiwala je wustajeńca fotografa Serbskich Nowin Maćija Bulanka „Prjedy hač woteńdźeš“. Jeho portrety wšědnych nošerkow serbskeje drasty – nastate w lětach wot 1985 do 2010 – su tuchwilu widźeć w dwórnišću kaž tež w cyrkwi Našeje knjenje w Zhorjelcu. Tam bě wčera něhdźe 20 zajimcow, předewšěm fanow fotografije, přišło na čitanje a rozmołwu z fotografom a basnicu Róžu Domašcynej. Organist cyrkwje wobrubi zarjadowanje na zakładźe hudźby Měrćina Weclicha z CD, z kotrejž je Ludowe nakładnistwo Domowina w lěće 2011 wušłeje knihi k portretam wudospołniło. Z podobnymi hudźbnymi meditacijemi su do toho hižo někotre razy připołdnju do wustajeńcy w cyrkwi wabili.