Wojerecy (KD/SN). Wot lońšeho pokazuje projekt film.land.sachsen naročne animaciske, dokumentarne a krótkofilmy tež w prowincy swobodneho stata. Minjeny pjatk su druhu sezonu na wonkownym terenje Wojerowskeje Kulturneje fabriki we wobłuku Staroměšćanskeho bulwara zahajili.
Předstajichu we Wojerecach paski, kotrež su za sakske filmowe festiwale a iniciatiwy nastali. Animaciski film „Link“ Roberta Löbela wopisuje přez dwě z włosami zwjazanej figurje situaciju cyłeho čłowjestwa. Jednanje jednoho wobwliwuje šansy tamneho. W animaciskim filmje „Halmaspiel“ rysuje Betina Kuntzsch minjene 80 lět němskich stawiznow na zakładźe swójbnych namakankow. W srjedźišću steji jeje mać, kotraž bě za čas NDR w Berlinskim modowym instituće studowała a kotruž po zwrěšćenej ćěkańcy do jastwa tyknychu. Na to so swójba statej přiměri. Hakle w 1990tych lětach je režiserka Betina Kuntzsch wo přebytku maćerje w jastwje zhoniła. Film žněješe wjele přikleska, dokelž drje su so mnozy hosćo na spagat mjez přiměrjenjom, dwělemi a ćežkim započatkom w zjednoćenej Němskej dopomnili.
