Južna Afrika skorži Israela dla
Den Haag/Pretoria (dpa/SN). Južna Afrika namołwja Mjezynarodne sudnistwo z nuznej próstwu, Israelej kazać, humanitarnu pomoc do Gazaskeho pasma pušćić, w kotrymž přeco hišće wojuja. Južna Afrika wopodstatni swoju próstwu z „daloko rozšěrjenej hłodowej nuzu“ w dospołnje zawrjenym pobrjóžnym pasmje, sudnistwo w Den Haagu zdźěla. W decembru bě Južna Afrika Israel před mjezynarodnym sudnistwom wobskoržiła, wumjetujo Tel Avivej morjenje ludu.
Hladajo na přiběracu kritiku tež z druhich krajow katastrofalneho zastaranja w Gazaskim pasmje dla knježerstwo w Jerusalemje twjerdźi, zo tuchwilu wjace pomocnych srědkow Gazaske pasmo docpěwa hač do wudyrjenja wójny. Pječa dojědźe wšědnje sto nakładnych awtow do palestinskeje kónčiny, Israel twjerdźi.
Najebać to je połoženje ludźi we wuskim pobrjóžnym pasmje zadwělowane. Po informacijach UNO hrozy hłodowa katastrofa. W pasmje žiwori wjace hač dwaj milionaj ludźi. Minjeny tydźeń su tam 15 zahłódnjenych dźěći zličili.
Rjana gesta, wjace nic
Skónčnje – reforma BAföG-zakonja! Tysac eurow za studentow-započatkarjow. To je wjele, abo? Nó haj, tak prawje nic. Wobhladamy-li sej situaciju na bydlenskich wikach, kaž tež płaćizny zežiwidłow, potom pytnjemy, zo wone stupaja. Tysac eurow, to je rjana gesta, wjace nic. Pjenjezy mjenujcy dołhodobnje ničo na financielnej situaciji studentkow a studentow njezměnja. Za to měli so sadźby wupłaćenja powyšić. W najlěpšim padźe dóstawa studowacy dźensa 934 eurow na měsac. To zda so dosahace być, ale jenož najmjeńši dźěl wšitkich zapisanych studentow tutu wysoku sumu woprawdźe dóstanje. Němski stat mjenujcy wjaza wupłaćenje BAföGa na mnohe wuměnjenja. Žadanje za BAföGom, kiž so po zasłužbje staršich nima, ale po woprawdźitych žiwjenskich wuměnjenjach studowacych, je dźeń a aktualniše. To jedne je mjenujcy jasne: Žadyn dorosćeny čłowjek nochce wot staršeju wotwisny być!
Maximilian Gruber
Mjenje listow – wjace paketow
Bonn (dpa/SN). Němski póst je loni wo wjele mjenje listow wozył hač do toho. Mnóstwo listowych posyłkow je lěta 2023 wo 5,6 procentow na 12,6 miliardow listow woteběrało, póstowy koncern DHL wčera w Bonnje zdźěli. 2022 bě minus jenož 0,3 procenty wučinił. Lěta do toho běchu stajnje stratu dweju abo třoch procentow registrowali. Hłowna přičina je přiběraca digitalizacija: Ludźo wužiwaja mejlki abo chatuja za komunikaciju – a njepisaja hižo listy.
Naprašowanje za paketami přiwšěm dale přiběra, wosebje, dokelž wulki dźěl ludźi prawidłownje pola internetnych wikowarjow kupuje. Mnóstwo paketow je loni wo 3,8 procentow na něhdźe 1,7 miliardow přiběrało. Logistiske předewzaće DHL z hłownym sydłom w Bonnje je z wotstawkom najwjetši posrědkowar listow a paketow po wšej Němskej.
Při dowožowanju listow dyrbi so koncern na prawidła dźeržeć, kotrež pochadźeja z 90ych lět. Tak dyrbi 80 procentow wotpósłanych listow přichodny dźěłowy dźeń pola adresata być. Tole chcedźa z nowym zakonjom změnić, štož by ćišć na koncern a tak kóšty znižiło.
To a tamne (07.03.24)
Wjace hač tysac přizjewjenjow dóšło je na małej sewjernomórskej kupje Wangerooge za městno dohladowarja tamnišeje swětłownje. Po wobšěrnym rozprawnistwje w medijach wo swobodnym městnje dochadźeja tam požadanja ze wšeje Němskeje a samo z europskeho wukraja. 39 metrow wysoka historiska swětłownja je dawno wusłužiła. Dźensa wužiwaja ju jako wuhladnu wěžu. Nowy přistajeny předawa jenož hišće zastupne lisćiki a suweněry a stara so wo porjadk.
Mobilny błyskač zaparkował je muž w badensko-württembergskim Rottweilu ze swojim bydlenskim mobilom – a to cyle legalnje. Błyskač steješe na parkowanišću při wjele wužiwanej hłownej dróze. Městno pódla nastroja pak bě hišće swobodne, štož muž ze swojim mobilom wuži. W interneće žněje wón za to wjele chwalby a připóznaća.
Dźesać procentow za Slepo!
Nowy rjad pod hesłom „Serbska debata“ smy w Slepom zahajili. Samo zastupjer ministerstwa je so słowa jimał. Městno bě wotpohlad, wšako słuša region bóle do fokusa narodneje politiki.
USA žadaja sej přiměr w Gazy
New York (dpa/SN). Po měsacy trajacej ćahańcy wo přiměr w Gazaskim pasmje su USA naćisk změnjeneje rezolucije ze žadanjom za „hnydomnym přiměrom“ Bjezstrašnostnej radźe UNO zapodali. W naćisku wobzamknjenja rěča wo „nuznje trěbnym dojednanju wo hnydomnym přiměrje šěsć tydźenjow w Gazy k pušćenju zastajencow“. Njejasne je, hač a hdy wo tym wothłosuja. Rezolucije bjezstrašnostneje rady UNO su zawjazowace.
Hromadźa granaty za Ukrainu
Sarajevo/Paris (dpa/SN). Němska a Francoska chcetej so zhromadnje za lěpše zastaranje Ukrainy z municiju zasadźić. Wonkowna ministerka Annalena Baerbock (Zeleni) a jeje francoski kolega Stéphane Séjourné staj so w Parisu na to dojednałoj, přidatnu municiju wobstarać. Francoski prezident Emmanuel Macron bě njedawno připowědźił, zo chcył iniciatiwu Čěskeje podpěrować, w EU 800 000 granatow za Ukrainu znosyć.
Moskwa hrozy z wupokazanjom
Tutón wobraz hrozy wot jutřišeho na mnohich dwórnišćach ...
Trump k wólbam: Fantastiski wječor
Dowolnosćza camp pruwuja
Rentowa zawěsćernja skeptiska
Berlin (dpa/SN). Němska rentowa zawěsćernja je skeptisce na plany nastupajo tak mjenowany generaciski kapital reagowała a chcyła móžne rizika za płaćerjow přinoškow wuzamknjene měć. Přinoški ludźi do rentoweho zawěsćenja njesměli so za generaciski kapital nałožować, žada sej prezidentka Němskeje rentoweje zawěsćernje Gundula Roßbach w Berlinje. W stejišću zawěsćernja na to skedźbni, zo wotwisuje wuwiće kapitala na bursy stajnje wot powšitkowneje situacije financnych wikow. Nimo toho njeje widźomne wolóženje pjenježneje situacije rentoweje kasy přez nowy kapital „poměrnje krótkeho časoweho horiconta dla“ wočakujomne.
Po wčera předstajenych planach dźěłoweho ministra Hubertusa Heila (SPD) a financneho ministra Christiana Lindnera (FDP) chcedźa hač do srjedź 2030tych lět nowy kapital 200 miliardow eurow natwarić. Z pjenjezami chcedźa rentowu zawěsćernju podpěrować, zo móhli rentowy niwow 48 procentow mzdy dołhodobnje zawěsćić.
