To a tamne (03.08.20)

póndźela, 03. awgusta 2020 spisane wot:

Z wohenjom w železnej škli wo ruku młodeje žony prosył je w porynsko-pfalcskim Neustadće muž a zawini tak zasadźenje wohnjoweje wobory. Swědcy na to wohnjowu woboru informowachu. Jako wobornicy přijědźechu, woni płomjenja hnydom zhašachu a powučichu porik, zo je woheń tuchwilneje suchoty dla wokomiknje wosebje strašny.

Wot błyskača dospołnje nastróžany je 26lětny wodźer wosoboweho awta do njeho zajěł. Nětko dóstanje nimo chłostanki tež hišće zličbowanku wjacorych dźesaćtysac eurow za skóncowany błyskač do domu. Prawdźepodobnje bě so šofer błyska dla tak nastróžił, zo je wodźidło wokoło storhnył a do błyskača zrazył. Alkohol abo drogi pola njeho zwěsći­li njejsu.

Rekordny spad hospodarstwa

pjatk, 31. julija 2020 spisane wot:

Paris/Madrid (dpa/SN). Koronakrizy dla wukonitosć hospodarstwa w Francoskej a Španiskej raznje woteběra. Francoske hospodarstwo je w druhim kwartalu lěta wo 13,8 procentow spadnyło, španiske samo wo 18,5 proc. To je we woběmaj krajomaj negatiwny rekord, kaž statistiskej zarjadaj w Parisu a Madridźe informujetej. Wobaj krajej stej wot koronapandemije wosebje potrjechenej

Tež Esken hroženja dóstała

Berlin (dpa/SN). Předsydka SPD Saskia Esken je po swójskich informacijach tohorunja prawicarskoekstremnu hrožacu mejlku dostała, kotraž bě z „NSU 2.0“ podpisana. „Wobsah je tak grawoćiwy, zo njemóžeš to ani wopisać“, rjekny socialdemokratka nowinarjam. W mejlce hroža jej ze smjerću. Esken je njeznatych mjeztym wobskoržiła. Minjeny čas bu znate, zo běchu tež wjacori politikarjo Lěwi­cy hižo tajke mejlki dóstali.

Opozicija hotuje so na wólby

Wulki nawal hosći dožiwjeja tuchwilu w Błótach. To pokazuje so we wupožčo­warnjach małych čołmikow a w přistawach, kaž tule w Bórkowach, hdźež wjetše čołmy­ zastawaja. Kónc tydźenja z rekordnymi temperaturami budźe nawal hišće wjetši. Njedźelu so potom zdobom posledni tydźeń prózdnin w Braniborskej započnje­. Foto: Michael Helbig

Obama: Dźiće wolić

pjatk, 31. julija 2020 spisane wot:

Washington (dpa/SN). Tři měsacy do prezidentskich wólbow w USA je bywši prezident Barack Obama Američanow naležnje namołwja, swój hłós wotedać. „Jenož mało wólbow bě w mnohim nastupanju tak wažne kaž lětuše“, rjekny Obama na žarowanskej Božej słužbje za ze­mrěteho wojowarja za čłowjeske prawa Johna Lewisa. Kraj hodźi so jenož polěpšić, hdyž so wšitcy Američenjo do wólbnych lisćin zapisaja a w nowembru wothłosuja. Wuraznje zasudźa Obama prócowanja, ze zawrjenymi wólbnymi loka­lemi a hinašimi trikami ludźom wobdźělenje na wólbach znjemóžnić.

Prezident USA Donald Trump chce so 3. nowembra znowa do zastojnstwa wolić dać. Wčera bě wón namjetował, wólby koronakrizy dla přestorčić.

Zakituje dźěło policije

pjatk, 31. julija 2020 spisane wot:
Berlin (dpa/SN). Bayerski nutřkowny mini­ster Joachim Herrmann (CSU) wot­pokazuje kritiku, zo wužiwa policija li­sćiny kontaktnych datow wopytowarjow w hosćencach za swoje přepytowanja. Lisći­ny hosći móhli „w jednotliwych padach wažne informacije“ dawać, rjekny Herrmann nowinarjam. „Ludźo z prawom wočakuja, zo policija wšitko po zakonju móžne čini, zo by jich škitała a skućićelow zwěsćiła. Njemóžu kritiku tuž rozumić.“ Runje ćežke złóstnistwa ma policija dokładnje přepytować a skućićelow chłostać. Hosćency dyrbja wosobinske daty hosći zběrać, zo móhli za­rjady w padźe koronainfekcije kontaktne wosoby spěšnje zwěsćić. Kritikarjo skorža, zo lisćiny z mjenami a adresami wosobinske prawo ludźi na škit datow ranja.

Drježdźany (SN). Generalny sekretar sakske­je SPD Henning Homann namjet zwjazkoweje swójbneje ministerki Franziski Giffey (SPD) wita, wólbnu starobu na 16 lět znižić, a namołwja CDU, so w tymle prašenju skónčnje hibać.

„Dyrbimy na wuchodźe a tak tež w Sakskej demokratiju wobnowić“, pisa Henning Homann w nowinskej zdźělence. K tomu słuša wólbnu starobu znižić. „Młodźi ludźo­ chcedźa sobu rěčeć, so wobdźěleć a sami sobu skutkować. Jich wid na po­litiske a towaršnostne wuwiće dyrbimy chutnje brać. Jedne z centralnych žadanjow sakskeje SPD tuž je, starobu za pasiwne wólbne prawo za komunalne wólby kaž tež za wólby krajneho a zwjaz­koweho sejma a europskeho parlamenta znižić.“

Nět Čěska jedna

pjatk, 31. julija 2020 spisane wot:

Praha (ČŽ/K/SN). Wotmysleneho rozšěrjenja Turówskeje brunicoweje jamy dla wobroći so Čěska republika nětko na komisiju Europskeje unije. To tohodla, dokelž je Pólska dotal kóždužkuli rozmołwu wo tutej naležnosći zapowědźiła a njeje Čěskej tež požadane informacije poskićiła. Mi­nister za wobswět Richard Brabec (ANO) k tomu zdźěli, zo předpołoži jeho ressort hromadźe z wonkownym ministerstwom na zakładźe posudka komisije EU namjety za dalše postupowanje. Při tym mysli Čěska samo na wobskóržbu Pólskeje před Europskim sudnistwom.

Miliony eurow dojězdźowarjam

pjatk, 31. julija 2020 spisane wot:

Berlin (dpa/SN). Braniborska je něhdźe jědnaće milionow eurow dojězdźowarjam z Pólskeje wupłaćiła, kotřiž běchu po za­wrjenju němsko-pólskeje mjezy koronapandemije dla w Braniborskej wostali, zo bychu tam dźěłali. Wo tym sćelak RBB24 rozprawja, powołujo so na hospodarskeho ministra Jörga Steinbacha (SPD). Tak je něhdźe 7 000 w Braniborskej přistajenych pólskich dźěławych z pjenjez profitowało. Woni dóstachu wob dźeń 65 eurow, zo móhli so zežiwić a podruž płaćić.

Pomocny program so dźensa kónči. Po informacijach Steinbacha tuchwilu njeplanuja jón na tych rozšěrić, kotřiž njejsu dotal žane pjenjezy dóstali. „Njemóžemy kóždeho docpěć a kóžde předewzaće w koronakrizy wuchować. Jědnaće milionow za 7 000 dojězdźowarjow pak móže so widźeć dać“, minister Steinbach rjekny.

Pólske knježerstwo bě srjedź měrca wukazało, zo dyrbi kóždy, kiž do kraja přińdźe, do dwutydźenskeje karanteny. Potrjechenych bě 14 000 dojězdźowarjow, kotřiž wšědnje do Braniborskeje na dźě­ło jězdźa. Braniborska přilubi jim na to pawšalu, hdyž w Němskej wostanu.

To a tamne (31.07.20)

pjatk, 31. julija 2020 spisane wot:

Do akwarija w coowje awstralskeho Sydney­ja zalězł je 30lětny muž – a ma nětko mjerzanje ze sudnistwom. Přećeljo muža běchu zwažliwu akciju filmowali a w interneće wozjewili. Na wideju je widźeć, kak 30lětny w spódnich cholowach do basenka lěze a mjez mjeńšimi rybami wokoło płuwa. Policija wumjetuje jemu ranjace zadźerženje a mylenje wotběhow w zwěrjencu. Za 17. september su jeho tuž na sudnistwo skazali.

Z 250 km/h před policiju ćěkał je paduch awtow na A 2 pola Braunschweiga. Do toho bě so wón policajskej kontroli wuwinył. Na ćěkańcy jědźeše chětro riskant­nje a přesćěhowaše awta zdźěla na nuzowej čarje. Po 50 kilometrach wotjě­dźe z awtodróhi, wotstaji awto a ćekny. Zastojnicy lepichu muža krótko na to w kerčinje a jeho zajachu.

Nadpad raznje zasudźili

štwórtk, 30. julija 2020 spisane wot:

Drježdźany (dpa/SN). Zwjazk žurnalistow Němskeje (DJV) je nadpad na žurnalistow magacina Spiegel TV minjenu njedźelu při B 96 raznje zasudźił. „Wospjet dyrbjachmy dožiwić, kak kolegow na zarjadowanjach nadběhuja. Móžemy stajnje zaso rjec: Woni tam swoje dźěło činja“, piše předsydka DJV Sakskeje Ine Dippman. Štóž so na demonstracijach wobdźěli, dyrbi z tym ličić, zo jeho filmuja. Jedyn­ z demonstrantow bě žurnalistow nadběhował a kameramuža z pjasću bił.

Historiski łamk korony dla

Wiesbaden (dpa/SN). Němske hospo­darstwo je na wjeršku koronakrizy dotal njesłyšany łamk dožiwiło. Nutřkokrajny bruttoprodukt (BIP) je w druhim kwar­talu porno prěnjemu wo 10,1 procent wote­běrał, zdźěli Zwjazkowy statistiski zarjad we Wiesbadenje. Bě to najsylniši spad po zahajenju štwórćlětneho wobličenja BIP w lěće 1970. Najwjetše hospodarstwo Europy tči we hłubokej krizy. Porno lětu 2019 je so hospodarski wukon wo 11,7 procentow wosłabił.

Protesty dale traja

Serbska debata

nowostki LND