Zběrka poezije

wutora, 11. awgusta 2020 spisane wot:
Drježdźany (SN/bn). Sakska literarna rada­ je w nakładnistwje poetenladen anto­logiju „Weltbetrachter“ wudała. Mjez w zběrce zastupjenymi basnicami a basnikami su mjez druhim Měrana Cu­šcy­na, Kito Lorenc a Elke Erb. Wo wuběr lyriki­ staj so Axel Helbig, sobuwudawaćel časopisa Ostragehege, a serbska poetka Róža Domašcyna postarałoj. „Antolo­gija nazornje pokazuje, zo je basnistwo w Sakskej tuchwilu tak čiłe kaž lědma hdy. Poeća su sej wobstajnje nowu rěč a nowe temy wotkrywali“, w zdźělence rady rěka.

Wot Dvořáka hač ke skupinje City

wutora, 11. awgusta 2020 spisane wot:

Delni Wujězd (JoS/SN). Horcota minjeneje njedźele njemóžeše něhdźe 300 ludźi wotdźeržeć, w Delnjowujězdźanskim ludowym parku wopytać solokoncert Drježdźanskeje wiolinistki Katrin Wettin. Njebě wšak to jeje prěni wustup na tym městnje, tak zo tam žana njeznata njeje.

Atomowej bombje nad Hiroshimu a Nagasakijom

póndźela, 10. awgusta 2020 spisane wot:

6. awgusta 1945 lećeše nad japanskim wulkoměstom Hiroshima ameriske lětadło, kotrež wotćisny jeničku bombu, wuskutkowacu njewšědnje sylnu detonaciju ze 6 000 stopnjemi horcoty a hoberskemu hribej runacy so kur. Rozbuchnyła bě nad Japanskej prěnja atomowa bomba USA, z kotrejž USA wot lěta 1941 wójnu wjedźeše.

Kejžorska Japanska bě hižo 1938 na aziskim kontinenće wulkokraj Chinu z najsylnišim wobydlerstwom swěta nadpadnyła. Dalše staty kaž francoske kolonije Vietnam, Kambodźa a Laos, nižozemsku koloniju Indonesku, Malajziju, Burmu, kotraž bě pod jendźelskim nadknjejstwom, běchu Japanjenjo nadběhowali. Ze Singapurom, Awstralskej a Nowoseelandskej japanske wójsko tohorunja wójnu wjedźeše, wottřělejo jich wójnske łódźe a lětadła. Lětadołhe krawne wojowanja we wuchodnej a juhowuchodnej Aziji a w Pacifiku njeběchu hišće skónčene, jako zwjazkar Japanskeje, hitlerska Němska, 8. meje 1945 kapitulowaše.

Wojerecy (KD/SN). Wot lońšeho poka­zuje projekt film.land.sachsen naročne animaciske, dokumentarne a krótkofilmy tež w prowincy swobodneho stata. Minjeny pjatk su druhu sezonu na wonkownym terenje Wojerowskeje Kultur­neje fabriki we wobłuku Staroměšćanskeho bulwara zahajili.

Předstajichu we Wojerecach paski, ko­trež­ su za sakske filmowe festiwale a ini­ciatiwy nastali. Animaciski film „Link“ Roberta Löbela wopisuje přez dwě z włosami zwjazanej figurje situaciju cyłe­ho čłowjestwa. Jednanje jednoho wobwliwuje šansy tamneho. W animaciskim filmje „Halmaspiel“ rysuje Betina Kuntzsch minjene 80 lět němskich stawiznow na za­kładźe swójbnych namakankow. W srjedźišću steji jeje mać, kotraž bě za čas NDR w Berlinskim modowym instituće studowała a kotruž po zwrěšćenej ćěkańcy do jastwa tyknychu. Na to so swójba statej přiměri. Hakle w 1990tych lětach je režiserka Betina Kuntzsch wo přebytku maćerje w jastwje zhoniła. Film žněješe wjele přikleska, dokelž drje su so mnozy hosćo na spagat mjez přimě­rjenjom, dwělemi a ćežkim započatkom w zjednoćenej Němskej dopomnili.

Kulturnicy pisaja wo pandemiji

póndźela, 10. awgusta 2020 spisane wot:

Bonn (SN/CoR). „Echoräume des Schocks – Wie uns die Corona-Zeit verändert“ rěka­ antologija wo pandemiji, kotruž­ je Fran­ziska Richter, wnučka z Budyšina pochadźaceje fotografowki prof. Evelyn Richter, w nakładnistwje J.H.W. Dietz Nachf.­ wudała. W 25 přinoškach reflek­tuja kulturnicy a kreatiwni čas prěnjeje koronakrizy, rozprawjeja wo podawkach z politiki a towaršnosće a powědaja wo swojich strachach.

Mjez awtorami je tež fotografikar Jürgen­ Maćij z Budyšina.

Online-přistup polěpšili

póndźela, 10. awgusta 2020 spisane wot:

Drježdźany (SN/bn). Dokumentaciska městnosć załožby Sakske wopomnišća je swoju­ internetnu stronu dokst.de wudospołniła. Wotnětka skići wosebite polo móžnosć, w datowej bance direktnje za „mjenami a ródnymi městnami woporow nacionalsocialistiskeje diktatury kaž tež komunistiskeho namócneho knjejstwa“ pytać. Tuchwilu wopřijima digitalny archiw, kotryž wobstajnje rozšěrjeja, něhdźe 2,5 milionow zapiskow. Wuslědk pytanja pokazuje najprjedy najwažniše wosobowe daty kaž tež identifikaciske čisło,­ wolóžace zajimcam přistup k dalšim informacijam. Přichodnje chcedźa direktny link na biografije zatwarić. Zakład twori wobšěrny skład tehdy zesta­janych a po politiskim přewróće kritisce wuhódnoćenych podłožkow.

„Zwoprawdźić polěpšeny online-přistup je za dokumentacisku městnosć wulki krok a wuskutkuje za slědźerjow, žurnalistow kaž tež wšitkich zajimcow za sta­wizny přesćěhanych, zo móža da­towu banku jednorišo wužiwać a lěpje rešer­šować. Zdobom tale městnosć wuslědki swojeho dźěła zjawnosći spřistupnja“, rěka w zdźělence załožby.

Nowe mjezy na wuchodźe postajili

pjatk, 07. awgusta 2020 spisane wot:

Wažne dojednanje na Podstupimskej konferency bě, zo ma kóžda z třoch wulkomocow – USA, Wulka Britaniska a Sowjetski zwjazk – w swojim wobsadniskim pasmje połnu jednansku móc. Tak bě rozdźělne politiske wuwiće w jednotliwych pasmach nimale předwidźomne.

Nowostka Róže Domašcyneje

pjatk, 07. awgusta 2020 spisane wot:
Wilhelmshorst (SN/CoR). Jako čisło 354 je w znatym lyriskim rjedźe „Poesie­album“ zběrka Róže Domašcyneje wušła. Po Kitu Lorencu je wona druha serbska basnica rjadu. 45 basnjow je Drježdźanski awtor Axel Helbig zestajał. Angela Hampel je z portretom wuměłče Irmgard Kulineje wobalku brošurki wuhotowała. Bonusowy lětny zešiwk za abonentow je towarstwo Přećeljo Smolerjec kniharnje podpěrało. Rjad „Poesiealbum“ bu 1967 w NDR załoženy a wuchadźa wot lěta 2007 w nakładnistwje Märkischer Verlag.

Budyšin (SN/pdź). Marko Dźisławk doby w lońšim wubědźowanju sakskeho fondsa „Čiń sobu!“ myto w kategoriji mjeńšich projektow za ideju serbskeje digitalneje protyčki. „Stajnje sym so mjerzał, hdyž čitach abo słyšach wo wotmětych serbskich zarjadowanjach, na kotrychž bych so tež rady wobdźělił“, Dobroščan rozprawja. „Rozsudźich so tuž nastorčić projekt wobšěrneho a přiwšěm přehladneho kalendra, do kotrehož su tajke za­pisane. Nochcych hižo dlěje zhonić, što je nimo, ale přejach sej medij, kiž přeradźa, što budźe. Myto sakskeho fondsa je mi zmóžniło projekt zwoprawdźić.“

Dokelž pak architekt trěbne znajo­mosće za programěrowanje aplikacije nima­, pytaše sej najprjedy raz wěcy­wustojnu podpěru. „Na zbožo so młoda Serbowka Davina Suchec přizjewi a poskići mi pomoc“, Dźisławk praji. 20lětna Chróšćanka wuknje tuchwilu powołanje medijoweje designerki w Drježdźanskim zawodźe markenbuero. Wona speciali­zuje so na wa­bjenje a programěrowanje a je Dźisławkej aplikaciju po jeho předstawach natwariła.

Młoda serbska žołma

štwórtk, 06. awgusta 2020 spisane wot:

Skupiny młodostnych tuchwilu wobstajnje serbsku hudźbu produkuja

Jako wozjewi skupina JANKAHANKA před pjeć lětami swój album „Zbožo“, běše­ nadźija wosebje mjez młodostnymi wulka, zo so nowa doba w stawiznach serbskeje hudźby zahaji. Bě to prěni ryzy serbski hudźbny album, kotryž spřistupnichu zajimcam tež přez woblubowane platformy kaž iTunes, Amazon Music a Spotify. Dwanaće nowych spěwow skupiny běchu inowatiwne a rozeznawachu so zdźěla jasnje wot hudźbnych produkcijow MDR, kotrež wšědnje w Serbskim rozhłosu słyšimy.

Na to so dale wulce ničo na polu serbskeje hudźby njehibaše. Tučasnje pak dožiwjamy, zo so młode serbske hudźbne talenty w skupinach zjednoćeja, swójske spěwy pisaja a je tež njewotwisnje wot MDR produkuja a wozjewjeja. Mnozy rěča tuž wo młodej serbskej žołmje.

Praskot

nawěšk

SERBSKE NOWINY podpěruja:

Novi Sad – kulturna stolica Europy

nowostki LND