Na hłownej zhromadźiznje Spěchowanskeho kruha za serbsku ludowu kulturu zajědźe powěsć kaž błysk do wjesołeje zhromadnosće: Jedna z najwušiknišich debjerkow serbskich jejkow je dnja 23. oktobra w Berlinje z runje hakle 73 lětami zemrěła.
Carola Stauberowa narodźi so 1. junija 1950 we Wojerecach a je wnučka znateje ludoweje wuměłče Marje Reuteroweje. Wot njeje je techniku škrabanja nawuknyła a swójbne mustry přewzała. Spočatki jeje wuměłstwa sahaja do 1970ych lět. 1974 dósta prěnje spěchowanske myto. Štomik žiwjenja, hwězdy, třiróžki a wšelake dalše prastare geometriske a floralne motiwy je wužiwała. Wosebje zajimawa bě za mnje jeje „wodowa kroma“ třiróžkow, kiž tworja cikcakowy pas – pomjenowanje jeje wowki, kiž wotewrěwa nam dźensa woči wo woznamje starych symbolow tež na serbskich wušiwankach. W Serbskim muzeju je w lěće 2019 přewjedła kurs za škrabanje, na kotryž so wobdźělnicy zawěsće hišće z dźakom dopominaja.
W hodowniku móža so čitarjo na mnoho zajimawostkach zwjeselić, wobraz zańdźenosće na wsy přeproša w swojej něžnej šěriznje k reflektowanju wo přichodźe. Mjez wustajeńcy a křižerjom poskići Rozhlad wuhlad do pokojneho časa: Zworać a wusywać je zasada tutoho wudaća. Je to, štož so čitarstwu poskići tež to, štož čitarstwo wočakuje?
Serija Michaela Meyera wo mjezynarodnych móžnych prjedownikach łapanja kokota w hodowniku pokroči.
Andrea Pawlikowa wěnuje so wjesnemu figurowemu pječwu, wšako symboliske pječwo do cyrkwinskeho a burskeho lěta słuša. Wuměłsce sformowane ćěsto a figurki běchu něhdy połne woznama – što je z toho do dźensnišeho znate? Wosebity symbol čłowječeje witalnosće je na přikład plećena wopuš, přetož włosy so něhdy jako sydło žiwjenskeje mocy wobhladowachu. Darjenje plećeneje całty k jutram wšitcy znajemy – ale we Wotrowje tuta nahladny meter dołha běše!
Evelyn Fiebiger přinošuje stawizniski pozadk k Njeswačidlskim šulskim stawiznam z fokusom na skutkowanje Křesćana Wylema Hercoga.
Město Budyšin a ewangelsko-lutherska wosada spominatej lětsa na 500. róčnicu załoženja cyrkwinskeho Tuchorskeho kěrchowa. W tym zwisku su Kai Wenzel, Heinz Henke a Christoph Kretschmer zestajili zajimawu a dokładnu knihu. Pod hesłom „500 Jahre Taucherfriedhof Bautzen“ wěnuja so wobšěrnje stawiznam pohrjebnišća a wopisuja wubrane němske a serbske wosobiny a jich nahladne historiske kaž tež nowše, jednoriše narowne pomniki.
22. nazymnika 1963 wopyta nowy prezident Zjednoćenych statow Sewjerneje Ameriki (USA) John Fitzgerald Kennedy w zwjazkowym kraju Texas wulkoměsto Dallas. Cyły swět bě nastróženy, hdyž ludźo z rozhłosa zhonichu a w telewiziji widźachu, kak bu prezident najmócnišeho kraja swěta při jězbje we wotewrjenym awće wot atentatnika zatřěleny.
Ameriski atentatnik bu zajaty, ale potom wot dalšeho muža zatřěleny, kotryž chcyše pječa prezidenta wjećić. Pozadk atentata bu tak zakryty. Ludźo žarowachu w mnohich krajach wo młodeho sympatiskeho prezidenta USA a njemóžachu sej předstajić, zo so tajke złóstnistwo tam stanje.
Budyšin (SN/bn). „Wjeselu so hižo na to, markhrabju Gera rappować widźeć“, rjekny předsyda Załožboweje rady Marko Kowar zakónčiwši mytowansku swjatočnosć idejoweho wubědźowanja „Rěč zwjazuje – Rěc zwězujo – Sorbisch verbindet“ minjeny pjatk w Budyskim Serbskim domje, poćahujo so na wuznamjenjeny projekt „Animěrowane hudźbne widejo wo serbskich stawiznach“. Z nim chce Pětr Dźisławk předewšěm młodźinje „skerje suchu maćiznu na zabawjace wašnje spřistupnić“, kaž lawdatorka Jěwa-Marja Čornakec podšmórny, dodawajo: „Bjeze stawizniskeje wědy žanoho narodneho wědomja!“