FC Energija Choćebuz
– ST Wehen Wiesbaden 2:3 (0:3)
Zestawa FC Energije: Spahić – Starcew, Knechtel, Matuwila, Schlüter, Schneider, Zickert (46. Raak), Bender (55. Scheidhauer), Geisler, Rangelow (67. Mamba), Broschinski
Dokelž je tójšto koparjow FC Energije Choćebuz zranjenych a dokelž je so kapitan Marc Stein z Choćebuza rozžohnował, bě trenar Claus Dieter Wollitz nuzowany, po zdaću najmłódše startowe mustwo cyłeje třećeje ligi na hrajnišćo pósłać. Hnydom šěsć koparjow su ze swójskeho dorosta a wjetšina z nich je pod 19 lětami. Na tym pak njesměmy so postorčić, pře wjele indiwidualnych zmylkow zmóžnichu hosćom dočasnje rewanšu za domjacu poražku 0:2. Hakle po změnje stronow, jako buštaj najprjedy Kevin Scheidhauer, a pozdźišo tež Streli Mamba zaměnjenaj, nastachu rjane akcije před wrotami hosći. Scheidhauer a Mamba postaraštaj so pola 4 500 přihladowarjow z 1:3 (82.) a 2:3 (90.) wo nadźiju na znajmjeńša jedyn dypk. Na kóncu pak njedosahaše čas při „Wšo abo ničo“. Georg Zielonkowski
Dokelž je dypkowa hra FC Energije Choćebuz pola hrajneho zjednoćenstwa Unterhaching wupadnyła, předstajimy wam raz zymske nowopřichady. W busu do Unterhachinga a wróćo sedźachu mjenujcy hnydom štyrjo nowi FCE.
Nimo Roberta Müllera, kotrehož smy hižo skrótka předstajili, rěka nowopřichad čisło dwaj Jürgen Gjasula (na wobrazu). Wón přińdźe k FCE wot Viktorije Berlin. 1,89 metrow wulki srjedźopólny hrajer z Albanskeje je zrěčenje hač do junija 2019 podpisał. Jeli FC Energija w třećej lize wostanje, so zrěčenje wo dalše lěto podlěši. Gjasula bě so w albanskim Tirana narodźił a kopački za Freiburg, Kaiserslautern, Sankt Gallen, Basel a Litex Lovetch šnórował. W Němskej bu 33lětny pola FSV Frankfurt, MSV Duisburg, VfR Aalen, Greuther Fürth a Viktoria Berlin zasadźeny. Jürgen Gjasula ma 191 hrow w druhej zwjazkowej lize, sydom w prěnjej zwjazkowej lize a 150 hrow na europskej runinje.
Tež lětsa zaso budźe Zapadołužiski koparski zwjazk (WFV) swój dźewjaty ewag Kamjenc – prózdninski koparski camp při Baltiskim morju přewjesć, a to wot 21. 28. julija 2019.
Přizjewić smědźa so holcy a hólcy lětnikow 2005 do 2009. Po wotrěčenju ze staršimi smědźa so tež młódše abo starše dźěći přizjewić. Cyłkownje 54 městnow ma WFV k dispoziciji, 45 su hižo wobsadźene a kruće knihowane. Dalše informacije steja we wupisanju na internetowych stronach www.westlausitzer-fussballverband.de/feriencamp.html.
Na dotalnych wosom koparskich campach bě so hižo wjac hač 500 dźěći a dorosćenych wobdźěliło. Mjez nimi běchu tež přeco serbscy dorostowi koparjo a z Józefom Šwonom tež čłon předsydstwa Serbskeho Sokoła.
Kompletny camp z busowym transferom z Kamjenca k morju, sydom přenocowanjemi, połnej pensiju, zastupnymi lisćikami, koparskim bulom a modernej hrajerskej garnituru płaći 309 eurow.
Jurij Bjeńš
W Chrósćicach wuhotowachu stari knježa Sportoweje jednotki Chrósćicy w swojej starobnej klasy koparski turněr w Jednoće. Přeprošene běchu mustwa ST Zeleno-běli Hórki, SJ Njebjelčicy, Sokoł Ralbicy/Hórki, ST Marijina hwězda a ST Mały Wosyk. Naposledk mjenowanaj cyłkaj dyrbještaj nažel wotprajić, tak zo so na turněrje jenož štyri cyłki wobdźělichu. Hraješe so kóždy přećiwo kóždemu, a to hnydom dwójce.
Po prěnim kole stejachu Chróšćenjo ze sydom dypkami na čole tabulki a na druhim městnje łakachu Ralbičenjo z jenož jednym dypkom zastatka. Hórčenjo, kotřiž hišće tydźeń do toho w Kamjencu dobychu, nakopachu sej štyri dypki a Njebjelčenjo bjez dypka pytachu hišće za formu.
Koparska młodźina hrajneho zjednoćenstwa Kubšicy/Bukecy je kónčne koło haloweho mastersa starobneje klasy młodźina A w sportowni na Budyskim Třělnišću dobyła. Mustwo trenarja Inga Freunda wosta bjez poražki. Nimo toho buštaj z Maksom Korbom a Francom Voigtom hnydom dwaj z dobyćerskeho teama do kruha najlěpšich pjeć koparjow turněra wolenaj. Slěbro wudobychu sej hólcy TSV Wachau a bronzu mustwo Hrajneho zjednoćenstwa Radwor/Wulka Dubrawa.
Foto: Hanspeter Benad
Wolejbul, wobwodna liga žony
1. Módro-běli Wojerecy 11 31 : 16 26
2. CVJM Zhorjelc 10 28 : 11 24
3. TSV Kundraćicy 10 24 : 14 21
4. JTVG Koblicy 11 21 : 23 17
5. Ochran. wolejfantki 11 21 : 23 16
6. OSC Lubij 11 20 : 21 15
7. HZ Pančicy-Worklecy 11 17: 26 11
8. ST Kupoj Nowa Łuka 10 17 : 25 10
9. VV Žitawa 09 II 11 12 : 32 4
HZ Pančicy-Worklecy – TSV Kundraćicy 1:3 (23:25, 25:19, 18:25, 20:25)
Kónčna tabulka haloweho mastersa młodźiny D w Kamjencu
1. ST Porchow 15 dypkow
2. Jednota Kamjenc II 12 dypkow
3. HZ Ottendorf/Hermsdorf 7 dypkow
4. ST 1922 Radwor 4 dypki
5. ST Kinspork/Łužnica 4 dypki
6. HZ Malešecy/Budyšink 1 dypk
Šěsć cyłkow starobneje skupiny młodźiny D bě so přez puć předkoło-mjezykoło-kónčne koło za wulke finale haloweho mastersa Zapadołužiskeho koparskeho zwjazka (WFV) kwalifikowało a sobotu w sportowni při lětanišću w Kamjencu nastupiło. Mjez nimi bě tež zastupnistwo Sportoweho towarstwa 1922 Radwor pod nawodom trenarja Franka Šnajdera.
Škoda, zo so Radworscy młodźi bulkoparjo hakle pozdźe do turněra zahrachu. Z wuslědkoweje lisćiny je mjenujcy wuwidźeć, zo woni prěnju hru z 1:3 přećiwo pozdźišemu pjatemu z Kinsporka a Łužnicy přěhrachu. Po 2:2 w druhim duelu dnja přećiwo hólcam hrajneho zjednoćenstwa Ottendorf/Okrilla a poražce 2:5 přećiwo faworizowanym koparjam Jednoty Kamjenc, móžachu Radworscy skónčnje hru dobyć, a to 5:4 přećiwo hrajnemu zjednoćenstwu Malešecy/Budyšink. Ze sylnej moralku a bojowniskim wukonom woni zastatk 0:3 zwjertnychu.
Hižo započatk lěta 2018 zdobychu sej wolejbulisća Sokoła Budyšin ze Stevom Geierom trenarja za sebje. Česćelakomny něhdyši hrajer mustwa JTVG Koblicy změni najprjedy starodawny system a wobstara Sokołam w naročnym treningu tójšto aha-efektow. Tež mjezwočo mustwa so do aktualneje sezony njemało změni. Zasłužbny kapitan a sobuzałožer Sokoła Budyšin Tilo Mager woteda hrajny wupokaz, wostawši pak w duchu Sokołčan. Bywši hłowny nadběhowar Tobias Mösch wopušći nažel serbske mustwo a hraje nětko přećiwo njemu w cyłku ST Hnašecy-Dobruša. Cyłk Sokoła Budyšin wopušćił je tohorunja Olaf Nathe. Za to přidružištaj so k mustwu z Gabrielom Hollmannom a Mariom Walterom dynamiskej nadběhowarjej, tohorunja z Koblic. Z Robertom Krawcom a Frankom Püschelom dósta serbski cyłk nimale dwajmeterskej sobuhrajerjej. Nimo toho wuzwoli mustwo Stefana Cušku za kapitana. Tomaš Suchy přewza nadawk jako administratiwny zamołwity mustwa.