Serbske Nowiny

štwórtk, 30 apryla 2015 14:00

Policija (30.04.15)

Přespěšne před gymnazijom

Budyšin. Při kontroli před Serbskim gymnazijom je policija zawčerawšim spěšnosć měriła. Ze 403 měrjenych jězdźidłow bě nimale 20 přespěšne. Při dowolenych 30 km/h bě rekord 61 km/h.

štwórtk, 30 apryla 2015 14:00

Pokiwy (30.04.15)

Wotewru wustajeńcu

Budyšin. Wustajeńcu Karla Vouka „Satkula abo (s)twor(jen)a krajina“ wotewrje njedźelu, 3. meje, w 15 hodź. Budyski Serbski muzej na to wutrobnje přeproša. Zawod poda wuměłc sam, wo hudźbne wobrubjenje postara so kapała DeyziDoxs. Wopytowarjo wotewrjenja wustajeńcy dóstanu składnosć potuń­šeneho zastupa za poslednje předsta­jenje dźiwadłoweje hry „Mój wuměrjeny kraj“ w NSLDź samsny dźeń w 17 hodź. Zastup do Serbskeho muzeja je dar­motny, lisćik za předstajenje NSLDź płaći wot wosom eurow.

Wopominaja prócowarja

Hora. Domowinska skupina Łusč a Jasčanske towarstwo Bjesada přeprošatej na wopomnjensku swjatočnosć njedźelu, 3. meje, na Horu pola Bóšic. Swjatočnosć zahaji so w 15 hodź. při křižowanišću Łusč-Hora-Banecy. Tam wopominaja Jakuba­ Nowaka-Horjanskeho, kiž je so na Horje narodźił. Serbski prócowar, do­miznowědnik, spisowaćel a farar je so zaměrnje­ za serbski lud prócował. Z teje přičiny chcedźa na jeho 150. narodniny spominać a za njeho pomnjatnu taflu wotkryć.

Porěči wo stawiznach wsy

štwórtk, 30 apryla 2015 14:00

Do kina (30.04.15)

30.4.–6.5.2015: Der Babadook: pj 22:30 hodź. Kein Ort ohne Dich: wšědnje 14:30 hodź. (nimo štw, pó a srj), 16:45 a 19:30 hodź. Tinkerbell und die Legende vom Nimmerbiest: wšědnje 17:15 hodź. | w 3 D Käpt´n Säbelzahn: nj 14:45 hodź. Avengers: Age of Ultron: wšědnje 14:15 hodź. (nimo štw, pó a srj), 16:15 a 19:15 hodź. | pj a so 22:30 hodź. Fast & Furious 7: wšědnje 19:15 hodź. | pj a so 22:30 hodź. Honig im Kopf: pj 17:15 hodź. | štw, so a wu 19:45 hodź. Gespensterjäger – Auf eisiger Spur: nj 12:30 hodź. Halbe Brüder: pj 22:15 hodź. Der Kaufhaus Cop2: nj a srj 17:15 hodź. Der Nanny: štw, so a wu 17:15 hodź. | pj, so, nj a srj 20 hodź. American Sniper: so 22:15 hodź. Shaun das Schaf: pj, so a wu 14:45 hodź. Home – ein smektakulärer Trip: nj 12:30 hodź. | w 3 D Cinderella: nj 12:30 hodź.

Kino-ekstra: Als wir träumten: pó 17:15 a 20:15 hodź.

štwórtk, 30 apryla 2015 14:00

Pokiwy (30.04.15)

Mejemjetanje na nawsy

Kamjenej. Na Kamjenjanskej nawsy při swjatym křižu chcedźa hižo jutře meju­ mjetać. Započatk je w 15 hodź. Wječor su reje ze serbskej kapału Con-takt. Wo ćělne derjeměće je postarane.

Zaso wulke burske wiki

Koćina. Kockertec Krabatowy swět pře­proša hosći njedźelu, 3. róžownika, wot 10 hodź. do Koćiny na wulke burske wiki, na dźeń wotewrjeneho dwora. Wjace hač 70 wikowarjow chce tam swoje speciality a wudźěłki poskićić. K tomu zahraje dujerska kapała, toča Kulowske piwo a porjedźeja najwšelakoriše jědźe. Tež za dźěći budźe zaso zaběra přihotowana.

Na bursu rostlin

Rěčicy. Njedźelu přewjedu na Rěčičanskim Erlichtec dworje wot 10 hodź. zahrodowe wiki z bursu rostlin a ze škleńčerskim wuměłstwom. Hobbyjowi zahrodkarjo móža sej kerčki, dule a cyble měnjeć. W dźiwadłowej bróžni pokazaja wustajeńcu wo pčołarstwje.

Mejski nyšpor z hudźbu

Róžant. Towarstwo Cyrila a Metoda přeproša njedźelu, 3. meje, w 17 hodź. na mejski nyšpor do Róžanta. Hudźbnje wobrubja jón šulerjo Budyskeje hudźbneje šule a jeje Pančičanskeje wotnožki.

štwórtk, 30 apryla 2015 14:00

Franc we Wuhladku

Budyšin. Chróšćan Franc Čornak a jeho němskorěčna kniha „Franc w zbožu“ wo je­ho wandrowskich lětach staj jedna z temow telewizijneho magacina Wuhladko sobotu, 2. meje, w 11.30 hodź. na sćelaku MDR. Tam rozprawjeja wo trochu njewšědnej njedawnej knižnej premjerje w Chróšćanskej kowarni. Dale dopomina wusyłanje mjez druhim na znowazałoženje Domowiny před 70 lětami a předstaji dr. med. Alojsa Hantuša, kiž je nětko jedyn z čestnohamtskich lěkarjow Drježdźanskeje Semperoweje opery. Wuhladko wospjetuje sćelak MDR wu­toru, 5. meje, w 5.50 hodź.

štwórtk, 30 apryla 2015 14:00

Rozhłós (30.04.15)

Njedźelu, hornjoserbsce

11:00 Łužica tónle tydźeń

11:10 Moja melodija:

Weronika Rachelic

11:45 Recensija knihi Bena Budarja „Sym měła tajki strach“

12:00 Nabožne wusyłanje

 (Jadwiga Malinkowa)

po tym  Zbožopřeća

delnjoserbsce

12:30 Aktualny magacin, mjez druhim wo nowym wuhotowanju domizniskeje stwy w Bórku

13:00 K swětowemu dnjej smjeća

13:30 Nabožne wusyłanje

(Madlena Norbergowa)

13:40 Zbožopřeća

štwórtk, 30 apryla 2015 14:00

Protyka (30.04.15)

Pjatk 1.–3.5.  25. mejemjetanje w Pančicach-Kukowje

  10:00 Swójbny swjedźeń na Budyskich Žitnych wikach

  10:00 Dźeń wotewrjenych duri wohnjoweje wobory w Budyskej wohnjostraži

  10:00 Nalětnja sadźenska bursa we Wochožanskim parku­ błudźenkow

  11:00 Nalětni swjedźeń w Čornochołmčanskim Krabato­wym młynje

  11:00 Wodźenje po historiskej Hórnikečanskej ener­gijowej fabrice

  15:00 Mejemjetanje w Kamjenej

  15:30 Swjedźenske zarjadowanje „200 lět Wjercha Pückle­rowy park“ při Mužakowskim hrodźe

  15:30 Zetkawanski dźeń we Wojerowskim zwěrjencu

Sobotu 2.5. 10:00 Nalětni swjedźeń na Ćišćanskim dworje

  15:00 „Wotewrjeny biodwór“ pola Čóškec w Ralbicach

  19:00 Koncert z Classic Brass a prof. Matthiasom Eisenber­gom w Kamjenskej hłownej cyrkwi

  20:00 Budyski korčmowy swjedźeń – w „Culinariumje“ hraje kapała SerBeat

Njedźelu 3.5. 9:00 Łužiski kćenjowy běh na Kamjenskim torho­šću

štwórtk, 30 apryla 2015 14:00

Historisku wučbnu hodźinu dožiwić móhli

Młodostni měli sej struchłe podawki před 70 lětami w našej domiznje do pomjatka zašćěpić

W zymje dyrkotajo, pod předešćnikom w skupinkach so mjez sobu wohrěwajo, připosłuchachu młodostni wutoru do­połdnja stawiznarjej Alfonsej Kuringej na łuce pod Chróšćanskej Fulkec hórku. Pančičan-Kukowčan rysowaše šulerjam 10. lětnika Ralbičanskeje wyšeje šule, kak bě k surowym bitwam w Chrósćicach a wokolinje dóšło, při kotrychž su tam­ před 70 lětami sta pólskich, so­wjetskich a němskich wojakow zahinyli.

28. apryl 1945 njeje jenož historiski datum za staršu generaciju Serbow, kotraž sej jón čas žiwjenja w pomjatku wobchowa. Tež dźěći a młodźi ludźo maja­ wo tym zhonić, zo běchu tón dźeń wosebje pólscy wo­jacy wokoło Zejic,­ Lejna,­ Chrósćic a Pančic-Kukowa swoje žiwjenje za swobodu přichodnych generacijow woprowali.

srjeda, 29 apryla 2015 14:00

Rady zaso w domiznje skutkuje

Wot 1. apryla nawjeduje Andreas Ošika z Worklec dźěłarnju swj. Michała w Pančicach-Kukowje, kotraž je w nošerstwje klóštra Marijineje hwězdy. 36lětny ro­dźeny Pančičan, nan třoch dźěći, je wjesoły a zbožowny, zo móže nětko doma powołansce dale skutkować.

srjeda, 29 apryla 2015 14:00

Nowy chlěb

Budyšin (SN). K 3. dnjej němskeho chlěba 5. meje poskića sakscy pjekarjo nowy chlěb „saksku wutrobu“. Přirjaduja so tuž do zhromadneje akcije pjekarskich zjednoćenstwow w Němskej za kwalitu w rjemjesle. To zdźěli Budyske wokrjesne rjemjeslnistwo. Sakska wutroba je z majo­ranom a oreganom polěpšeny běrnjacy chlěb. Recepturu wuwiła je Sakska akademija němskeho pjekarskeho rjemjesła z.t. W formje wutroby dopomina chlěb njepječeny na sakskej krajnej barbje běło-zelene.

Na lětušim dnju němskeho chlěba wobdźělitaj so mjez druhimi Róžeń­čanski pjekar Maik Šołta a Minakałski pjekar Jens Wagner.

nawěšk

nowostki LND