Proby jara intensiwne a wunošne

wutora, 08. měrca 2016 spisane wot:

Zhorjelc/Konjecy. Serbski muski chór Delany je so njedźelu popołdnju z tři­dnjowskeho zwučowanskeho lěhwa nawróćił. Přewjedli běchu je w młodowni ewangelskeho młodźinskeho towarstwa CVJM wosrjedź stareho města Zhorjelca. „Hospodu poručił je nam chór Bu­dyšin, kiž bě tam hižo raz zwučowanski kónc tydźenja přewjedł. Loni běchmy prěni króć tam, a nam so přede­wšěm zwučowanske wuměnjenja lubja­- chu. Wšako maš w młodowni, kotraž bě ně­hdy hudźbna šula, nimo dweju zwučowanskeju rumnosćow z klawěromaj-kři­dłomaj dalšu z pišćelemi, štož je za nas jara přijomne“, powěda předsyda delanskeho muskeho spěwneho cyłka Janek Wowčer.

Dohromady je tak wot pjatka wječora do njedźele připołdnja cyłkownje 22 muži w Zhorjelskej młodowni wjacore serbske a słowjanske pěsnje nawuknyło abo skrućiło kaž tež dźěle łaćonskeje mšě, kotrež­ chcyli tež w serbskich wosadach předstajeć. Proby zaručili su z Handrijom Henčlom, Pawołom Šołtu-Kulowskim a Chrystofom Mikławškom hnydom třo dirigenća a hudźbnicy. Tak běchu zwučowanja po hłosowych skupinach jara intensiwne a wunošne.

Wuběrnu wustajeńcu wopytali

póndźela, 22. februara 2016 spisane wot:

Katolske zjednoćenstwo kubłarjow Sakskeje organizuje hižo wjele lět za wšitkich sobustawow w małym róžku tradicionalny kulturny dźeń. Tón wjedźeše jich lětsa, 6. februara, do cyle zažnych stawiznow archeologije.

Wjetšina sobustawow wopyta w Drježdźanach „Zeitenströmung“ – wuběrnu wustajeńcu hoberskeho rownišća staro- egyptowskeho faraona Tutanchamuna, kiž bě před wjace hač 3 300 lětami zemrěł. Napodobnjenje jeho rownišća je hakle docyła móžne, dokelž je britiski archeologa Howard Carter row faraona 1922 w dole kralow blisko egyptowskeho města Luxor wuslědźił. Wuznamnu namakanku je fotograf Harry Burton dokumentował. Na zakładźe jeho 2 800 wulkoformatnych škleńčanych negatiwow, kotrež wšitke objekty a jich połoženje w rownišću jasnje pokazuja, su němscy egyptologojo a egyptowscy wuměłcy rownu komoru ze sarkofagom, amuletami, sćěnowymi mólbami a pozłoćanymi figurami Bohow natwarili.

Wažny kulturnopolitiski podawk

štwórtk, 18. februara 2016 spisane wot:

Jako bě před 50 lětami w Ludowym nakładnistwje Domowina Nowy zakoń jako dźěl Swjateho pisma znowa wušoł, njeběše to jenož nabožny, ale zdobom kulturnohistorisce wažny podawk, spěchowacy narodne wědomje Serbow. Tole potwjerdźi minjenu sobotu swjedźenske zarjadowanje na Chróšćanskej farje, na kotrež běše Towarstwo Cyrila a Metoda přeprosyło. Přełožk z łaćonskeje wulgaty přez Michała Hórnika a biskopa Jurja Łusčanskeho z lěta 1896 běše dźě rozpředaty respektiwnje přez nacionalsocialstow zničeny.

Njewšědna pomoc dźěćom

srjeda, 17. februara 2016 spisane wot:

Njedawno běch w Bergisch-Gladbachu pola swojeje sotry a jeje swójby na wopyće. Zhromadnje chcychmy sej tamniši wulki róžowopóndźelny ćah wobhladać. Mnohim přećelam a znatym z bydlenskeje štwórće swojeje sotry do toho powědach, zo so w Budyšinje za njepřewodźanych małolětnych ćěkancow angažuju. Wo wulkej pomocy a wutrobnosći Kölnjanow, kotruž na to nazhonich, běch přemóženy. Spontanje započachu młódši a starši za mnje tak mjenowane „Kamelle“ zběrać, potajkim słódčizny najwšelakorišeho razu, kotrež sobujěducy na wulkich póstniskich wozach do publikuma mjetaja. Kóždy z pomocnikow znajmjeńša cyłu titu połnu plackow, poprjancow, gumijowych zwěrjatkow a wjele dalšich wěcow z póstniskeho ćaha­ sobu přinjese, zo bych je dźěćom w Budyšinje rozdźělił, wo kotrež so sobu staram. Na kóncu běštej to dohromady dwaj centnarskej měchaj. K tomu přińdźechu hišće wjacore pakety drasty, tak zo bě moje awto hač pod třěchu napakowane.

„Wjele noweho zhonili a widźeli“

wutora, 16. februara 2016 spisane wot:

Budyšin. „Zańdźene lěto smy zajimawej přednoškaj słyšeli, na wulěće do Njebjelčic a Kamjenca wjele noweho zhonili a widźeli a porjadnu kermušu wo­swjećili“, takle hódnoćeše Hilža Nukowa, předsydka Domowinskeje skupiny Budyšin-město jeje dźěło minjeny štwórtk na zapozdźenej hłownej zhromadźiznje na žurli Budyskeho Serbskeho domu. Čłonojo sej tež lětuši plan dorěčachu. Tak chcedźa so mjez druhim do Žitawy po­dać, zo bychu so ze stawiznami a kulturnymi wosebi­tosćemi města zeznajomili.

Na zhromadźiznje wupraji předsyda Domowiny Dawid Statnik skupinarjam dźak za spomóžne dźěło a wupřa jim dalše­ dobre skutkowanje.

Prěnje lětuše předewzaće zwoprawdźichu z tym, zo je Jan Nuk, bywši předsyda Domowiny, wo swojim socialnym dźěle pola najchudšich wobydlerjow Južneje Afriki rozprawjał. Z pomocu wobrazow a krótkofilmow předstaji wón skutkowanje misionskeje stacije w měsće Port Elizabeth, hdźež zmóžnjeja dźěćom kubłanje, zastaruja bjezdźěłnych z jědźu a napojemi. A činja to z pomocu mnohich dobrowólnikow, wosebje z Europy.

Dźěłaj a spěwaj w chórowym lěhwje

pjatk, 12. februara 2016 spisane wot:

Jako druzy młodostni hišće póstnicy w Kulowje swjećachu, podachu so hólcy a holcy chóra 1. serbskeje kulturneje brigady do proboweho lěhwa. Wot róžoweje póndźele přebywachu mjeztym dźesaty raz štyri dny w Mjezynarodnym duchownym centrumje w čěskich Hejnicach. Něhdyši klóšter skića z rjanym hotelom a wulkej awlu optimalne wuměnjenja za zwučowanje. Nawoda chóra Friedemann Böhme wujasni šulerjam wažnosć přichodnych dnjow, wšako su wone zakład za lětuše koncerty chóra. Tuž dyrbjachu tójšto nowych spěwow nazwučować. Za to bě dirigentej mecosopranistka Tanja Donatec k pomocy, kiž přewjedźeše ze šulerjemi hłósne zwučowanja.

Nětko pytaja serbsku dnjowu mać

štwórtk, 11. februara 2016 spisane wot:
Dobry wothłós žnějachu organizatorojo njedawneho prěnjeho serbskeho blida w Lipsku. Ličili běchu z něhdźe dźesać wobdźělnikami, přišło bě na kóncu 17 dorosćenych a dźěći. Najstarša wobdźělnica za blidom bě 76 lět, mały Beno hakle dwě lěće. Jako prěnje přińdźechu do hosćenca tři žony, kotrež běchu namołwu k serbskemu blidu w Serbskich Nowinach čitali. Kaž rjeknychu, wone hižo 60 lět w Lipsku bydla a dyrbjachu runje tak dołho na tajke serbske blido čakać. Po móžnosći chcedźa so Lipšćanscy Serbja štyri razy wob lěto zetkać. Přichodny raz budźe to w meji. Najprjedy wšak pytaja serbsku dnjowu mać, kotraž by so wo­dnjo wo dźěći Lipšćanskich Serbow starała a z nimi serbowała. Bibiana Bartec

Tež zbrašeni póstnicy swjećili

wutora, 09. februara 2016 spisane wot:

Podobnje kaž w Kulowje a Njebjelčicach knježeše minjeny pjatk tež na póstnicach za zbrašenych w Chróšćanskej „Jednoće“ dobra nalada. Přichwatali běchu nory z Budyšina, Pančic-Kukowa, Smječkec, Lěskeje, haj samo z Drježdźan a Arnsdorfa. Dohromady bě jich wjace hač 200 póstnicarjow. To pokazuje, zo so zbrašenym w Chrósćicach kóžde lěto jara lubi.

Organizator bě kaž hižo wjele lět Bosco Nowak. Jemu poboku su Chróšćanscy młodostni kaž tež někotre žony z towarstwa „Domizna“ ze swojimi słódnymi kołbaskami. Wo hudźbu postarał je so znowa DJ Frank Law. Dokelž tež zbrašeni wjele prócy za swoje kostimy nałožuja, je ćežko so za najrjeńši rozsudźić. Tuž dóstachu po polonezy wšitke nory rjane myto, sponsorowane wot zawodow.

Nowych młodostnych přiwzali

wutora, 02. februara 2016 spisane wot:

Jako sej posledni kupcy sobotu rano při pjekarskim awće w Židźinom swoje całty kupichu, zaćahny na Wjesnym puću hižo žiwjenje. Woženjeni mužojo a młodostni zetkachu so z Wjelčanskimi hudźbnikami pod Měrowym dubom, zo bychu camprowali. Z Berndom Mačom a jeho konjacym zapřahom kaž tež z Jaegerec traktorom podachu so na puć. Do toho zestupachu so do oficialneho skupinskeho wobraza. Tradicionalnje pódla staj saznik a jejowa žona, wo čož starataj so stajnje najmłódšej młodostnaj. Na kóncu ćaha běchu mužojo z hłownej kasu.

Wosebity wjeršk camprowanja je wječor, hdyž młodźi mužojo w ćmowym wobleku, z kłobukom na hłowje a z hałžku w ruce młode holcy w jich serbskej drasće wotewzaja. Holcy přiwjazaja na hałžku pisane banćiki a zhromadnje dojědu sej wšitcy z busom na Hory do Hosćenca k lipje. Tam młodostni na žurlu zaćahnu a k zynkam kapały polku, walčik a Hanamarju zarejuja. Po napinacym dnju smědźa po tym najprjedy raz wotpočnyć.

Šulerjo sněhakować wuknyli

srjeda, 27. januara 2016 spisane wot:

19 šulerjow 7. lětnika Serbskeje wyšeje šule „Michał Hórnik“ Worklecy přebywaše minjeny tydźeń štyri­ dny w sněhakowanskim lěhwje w čěskim Bedřichovje. Pobrachowaceho sněha dla dyrbjachu lěhwo najprjedy wo tydźeń přesunyć. Zo su so prawje rozsudźili, pokazachu hromady sněha, kotrež běchu so w tym času našli. Pisty běchu spřihotowane a wuměnjenja za sněhakowanje optimalne.

Je hižo z wjelelětnej tradiciju, zo jězdźa Worklečanscy šulerjo do ­Jizerskich horin a tam sněhakować ­wuknu. Nimo sportoweju wučerjow Křesćana Bejmaka a Simony ­Eckertoweje staraštaj so tež čěskaj wučerjej wo nich. Profesionelnje a žortnje a přiwšěm čućiwje wobchadźachu wšitcy štyrjo ze strachami šulerjow, kotřiž prěni raz horu dele sněhakowachu. Socialna dźěłaćerka Rěčneho centruma WITAJ Franciska Zopic je młodostnych sobu přewodźała.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND