Nalětni swjedźeń seniorow

štwórtk, 07. junija 2018 spisane wot:
Hižo 26. raz je tele dny Budyski njewotwisny zwjazk seniorow nalětni swjedźeń na zahrodźe swojeho domicila na Löhrowej přewjedł. Tradicionalnje hraja tam Wulkodubrawscy dujerjo čěske melodije za wucho a rejku. Tohorunja z tradiciju je, zo přijědu čěscy seniorojo z Jabloneca nad Nisou ze swojej nawodnicu Ernu ­Kohoutkovej. Lětsa bě jich nimale třiceći. Z němskeje strony wobdźěli so wjace hač 60 ludźi. Rady přebywa tež stajnje zapósłanc Sakskeho krajneho sejma Marko ­Šiman (CDU) na hodźinku mjez nami. Při wjesołej rejce po čěskich melodijach a při zhromadnym wobjedźe su sej Češa, Němcy kaž tež Serbja někotružkuli nowosć wuměnili. Organizowało bě swjedźeń znowa předsydstwo seniorskeho zwjazka ze swojej předsydku Judith Mühldorfer. Hosćo z Čěskeje wopytachu popoł­dnju hišće Małowjelkowski pra­zwěrjenc. Wopyt je Budyske měšćanske zarjadnistwo sponserowało. Helmut Gros

W kotrym kraju swěta je najrjeńšo?

štwórtk, 17. meje 2018 spisane wot:

„Přednošujće nam wo jednym ze swojich rjanych pućowanjow“, běše přeće katolskich seniorow tachantskeje wosady tele dny na rozhłosownika Bena Bělka. Tola wo kotrej turje měł wón rěčeć, hdyž je dotal hižo w 162 krajach swěta był? Skoro přeco bě ze swojej mandźelskej po puću, před lětami běštej tohorunja wobě dźowce pódla.

Swoje pućowanja Bělkecy nimale bjezwuwzaćnje sami planuja, a to z awtom. Jenički „wulět“ z dosć ekskluziwnym turistiskim předewzaćelstwom Studiosus skónči so najprjedy jónu ­w iranskej sto­licy Teheranje za knjeni Bělkowu z přepytowanjom pola nuzo­weho lěkarja, štož sta so za Europjanku w muslimskim kraju wězo na dosć nje­zwučene wašnje.

Najsylniše hłosy mytowali

srjeda, 09. meje 2018 spisane wot:

Tradicionelnje prezentowaše so minjenu sobotu Ćišćanski nalětni swjedźeń z kwětkami a zeleninowymi rostlinami kaž tež z drjewjanymi, wołmjanymi a keramiskimi wudźěłkami. Wo ćělne derjeměće swojich hosći postarachu so organizatorojo nalětnich wikow z gulašowej poliwku z pólneje kuchnje, ze samo­pječenym tykancom, z plincami a z čerstwym chlěbom z tamnišeje pjecy.

Prěni raz je lětsa serbska dujerska ka­pa­­ła Horjany rańše piwko hudźbnje wob­rubiła. Hromadźe ze swojimi swěrnymi fanami z Hućiny a Worklec zaručichu muzikanća najlěpšu naladu mjez připosłucharjemi. „Přewodźamoj kapału na nimale wšitke koncerty“, rjeknyštaj Helmut a Hannelore Paff ze Złeho Komorowa. Jako zahoritaj rejwarjej staj 83lětny a jeho 77lětna mandźelska lědma jednu štučku skomdźiłoj. Kedźbyhódne běchu tohorunja spěwne kwality mnohich wopytowarjow. Tym z najsylnišim hłosom so moderator Horjanow Uwe Macka ze słódnej kapku podźakowa. Wosebje wu­zběhny wón Ursulu Schäfer z Wojerec, kotraž so jako rodźena Wětničanka hižo stajnje za dujersku hudźbu zajimuje.

Muski chór z Hornjeje Hórki je tele dny składnostnje swojeho 50lětneho wob­staća swjedźenski koncert wuhotował. Ze swojej dirigentku Mariku Matthes-Hartmann zahajichu jón w Hornjohórčanskej wjacezaměrowej hali zhromadnje z Budyskim dujerskim orchestrom. Moderator Jürgen Hänel witaše jako čestneho hosća 93lětneho bywšeho orchestroweho nawodu Wernera Frenzela z Laatzena pola Hannovera. Werner Frenzel pochadźa z Lejna, wjesneho dźěla Hornjeje Hórki, a je 38 lět Budyski młodźinski dujerski orchester nawjedował a za njón njeličomne aranžementy spisał. Hänel postrowi tohorunja wutrobnje wjesnjana-wučerja Hilmara Urbana, kiž běše prěni dirigent jubilejneho cyłka a je jón 30 lět nawjedował. Z něhdźe 250 přichwatanymi hosćimi bě žurla hač na poslednje městno wobsadźena.

Słónčne pruhi při spěwanju

pjatk, 04. meje 2018 spisane wot:

Do zwučowanskeho lěhwa do Jawornika-Nechowa (Jauernick-Buschbach) blisko Zhorjelca su sej tele dny spěwarki a spěwarjo chóra Lipa wulećeli. Runje tak kaž před lětomaj, hdyž tam ze swójbnymi rjany kónc tydźenja přežiwichmy.

Hłownje słužeše chórowe lěhwo k skrućenju wobstejaceho repertoira, ale tež nowe spěwy stejachu na planje. Tuž dachmy so hnydom pjatk po wječeri do zwučowanja. Sobotu nas słónčne pruhi­ cyły dźeń přewodźachu, tak zo so hnydom po snědani hač do pózdnjeho připołdnja lěpje spěwaše. Popołdnju pak sej dlěšu přestawku popřachmy a pućowachmy zhromadnje ze swójbnymi po lěsu k něhdźe tři kilometry zdalenej wuhlad­nej wěži. Tam při najrjeńšim nalětnim wjedrje zhromadnje swačachmy a sej po něhdźe 100 schodźenkach na wěžu zalězechmy. Daloki wid na jězor a krajinu bě krasny.

Tróšku wučerpani, ale z dobrej naladu so do wustawa swj. Wjacława nawróćichmy, hdźež hižo słódna wječer na nas čakaše. Při zhromadnym spěwanju a dobrej kapce wječor wuklinča.

Wo tuchwilnej situaciji migrantow a ćěkancow w Budyskim wokrjesu zhonić, a to wot kompetentneje wosoby, běše njedawno tema stajneho blida Budyskeje žónskeje unije CDU. Předsydka Regina Spitzer běše nawodu hamta za wukrajnikow krajnoradneho zarjada Larsa Eibischa na rozmołwu do hosćenca Lusatia přeprosyła. 40lětny jurist wšak njeje po nimale třoch lětach hižo nowačk w zarjedźe. Wosebje wažne jemu je, zo so diskusija nastupajo požadarjow azyla z emocionalneje runiny skónčnje zwěcni. „Je naš job, zo problemy zmištrujemy“, je jeho dewiza.

W treningowym lěhwje pobyli

srjeda, 25. apryla 2018 spisane wot:

Dwuskokowa reja wopřijima dwaj skokaj w jednym pohibje. Čłonojo Smjerdźečanskeje rejwanskeje skupiny hnydom cyłu reju z tym pjelnja a su ju kaž tež tamne naročne reje njedawno w Čěskej nastudowali a wufilowali. Pjatk popołdnju podachu so z busom, w kotrymž chowachu so mjez rejwarjemi tež tójšto rekwizitow, do čěskeho Janova nad Nisou. Pod nawodom Dietera Wendischa započinachu hnydom po wječeri z prěnjej pót ćěrjacej probu.

Wosebite wjeselo mějachu młodźi rejwarjo při sćoplenju. Při tym zaklinčachu mjenujcy spěwy Měrćina Weclicha, štož wubudźi dobru naladu, byrnjež jara napinace było. Sobotu rano hnydom po snědani startowachu do dalšeho treningoweho dnja, kotryž traješe hač do pózdnjeho wječora. Wječork dachu hišće zhromadnje wuklinčeć a tež tam wězo rejwachu a zhromadnje spěwachu. Treningowe lěhwo bě idealny přihot na nowu rejwansku sezonu, za kotruž je tójšto wustupow planowanych. Tak doleća sej Smjerdźečenjo mjez druhim na festiwal do dalokeho Peru. Chětro wučerpani, ale přewšo spokojni z wuslědkom lěhwa so wšitcy do domizny nawróćichu.

W mnohich naležnosćach je po puću

wutora, 24. apryla 2018 spisane wot:

W interneće předstaji so Gerat Róbl ze Smjerdźaceje jako financny hospodar. Jako generalny zastupjer znateje zawěsćernje zasłuža sej swój wšědny chlěb. Komunikaciju z klientami poskićuje wuraznje serbsce a němsce. Rady skutkuje tohorunja jako braška. Tola hišće šěršo znaty, a to předewšěm w słowjanskim wukraju, je wón dla swojeho njewšědneho socialneho angažementa. Serbšćina je jemu kluč za durje k někotrymžkuli wutrobam.

Spytaja alternatiwnje žiwi być

štwórtk, 19. apryla 2018 spisane wot:

Slepjanske a Wojerowske kónčiny běchu njedawno cil politiskeje ekskursije Serbskeje lěwicy. W Starej předźerni pola Noweho Města informowachu so hosćo z Hornjeje Łužicy wo alternatiwnym žiwjenskim koncepće pod „Stara předźernja“ zapisaneho towarstwa. Na 3 600 kwadratnych metrach spytaja sej swoje žiwjenje na hinaše wašnje zrjadować a stare rjemjeslniske tradicije regiona wožiwić. Tola při tym so ćeže nakopjeja, rjekny zastupjer towarstwa. „Štóž so přećiwo politiskemu aparatej staja, ma tež na­blaku běrokratiski aparat přećiwo sebi.“

W Slepom rozmołwjachu so ze serbskej wobswětowej aktiwistku Edit Pjenkowej. „Wjace tajkich njepowalnych pjeńkow by serbstwo trjebało“, praji rěčnica Serbskeje lěwicy Měrka Kozelowa. Na městnje wobhladachu sej, kajke rany brunica do serbskeho kraja bije. „Krajina so zhubi a rěč na to sćěhuje“, měnješe spisowaćel Křesćan Krawc.

Jako bu znate, zo optikarski wobchod na terenje BHG w Njeswačidle kónc januara 2018 zawru, njebě ludnosć runjewon zwjeselena. Nimo nawočow a pisanskeje potrjeby bě we wobchodźe mjenujcy tež wotnožka póšty zaměstnjena. Po jeničce dwěmaj lětomaj so młoda wobchodnica rozsudźi, do Rakec přećahnyć. Z tym bě Njeswačidło bjez póšty. Runje w dźensnišim času, hdyž bywa mnóstwo paketow wobstajnje wyše, bě to špatny signal wobydlerjam. Ludźo dźě pakćiki jenož njepřijimuja, ale je často zaso bjezpłatnje wróćo pósćelu.

Ćim bóle so wobydlerjo nětko wjesela, zo je so mandźelska Christiana Budarja, kotryž ma blidarstwo a wobchod za pčołarsku potrjebu na terenje BHG, rozsudźiła, póštowu wotnožku we wobchodźe sobu zaměstnić. Po tym, zo bě so za wažne dźěło wukubłać dała, posłužuje Beata Budarjowa nětko kupcow wšědnje popołdnju wot 14 do 17 hodź. a sobotu wot 9 do 11 hodź.

nawěšk

  • Minjenu sobotu, 24. nowembra, wotmě so Budyskim NSLDź lětuša Schadźowanka. Tule namakaće někotre fotowe impresije.
Das alljährliche Treffen der sorbischen Studierenden, Absolventen und Gymnasiasten Schadźowanka fand am Samstag, den 24. November, zum

nowostki LND