Serbski spěw na arabskej ud poručenje

wutora, 10. nowembera 2015
artikl hódnoćić
(0 )
Budyski gymnaziast a hudźbnik na arabskej lutni ud Milad Gergi (nalěwo) je tohorunja wobdźěleny na projekće „Migranća ze znawaja so ze serbskej kulturu“, kotrehož wuslědki su wčera w Budyskim Serbskim muzeju prezentowali. Před lětom bě Milad zhromadnje z maćerju (na foće), nanom a sotru ze Syriskeje do Budyšina přišoł.  Foto: SN/Maćij Bulank Budyski gymnaziast a hudźbnik na arabskej lutni ud Milad Gergi (nalěwo) je tohorunja wobdźěleny na projekće „Migranća ze znawaja so ze serbskej kulturu“, kotrehož wuslědki su wčera w Budyskim Serbskim muzeju prezentowali. Před lětom bě Milad zhromadnje z maćerju (na foće), nanom a sotru ze Syriskeje do Budyšina přišoł. Foto: SN/Maćij Bulank

Projekt „Migranća zeznawaja so ze serbskej kulturu“ předstajili

Budyšin (SN/CoR). Na arabskej lutni ud a serbskich huslach zhromadnje zanjeseny serbski přazny spěw abo tež ze somaliskej a serbskej chorhoju debjene jejko – wosebity serbsko-němsko-pólsko-arabsko-afriski kulturny miks dožiwi wčera popołdnju něhdźe 35 zajimcow w Budyskim Serbskim muzeju, hdźež předstajichu wuslědki projekta „Migranća zeznawaja so ze serbskej kulturu“.

Witać móžeše direktorka muzeja Christina Boguszowa nimo wobdźělnikow projekta mjez hosćimi tež předsydu Domowiny Dawida Statnika, społnomócnjene za serbske naležnosće, za runostajenje kaž tež za wukrajnikow Budyskeho wokrjesa Reginu Krawcowu, Heidemarie Tröger a Annu Piętak-Malinowsku. Jeje mandźelski, hudźbnik Serbskeho ludoweho ansambla Artur Malinowski, je projekt iniciěrował a nawjedował. Podpěrali su jeho tež Tomasz Nawka a Budyski powołanski centrum za zežiwjenje a domjacnosć ze swojimi kursami němčiny.

Před lětom zezna Artur Malinowski wuměłca Michaela Kurzwellu z Frankfurta nad Wódru, kiž pytaše hišće wobdźělnikow za němsko-pólsku mjezu překročacy projekt „Nowa Amerika“. A dokelž słuša tež Łužica do regiona měšanych kulturow „Nowa Amerika“ a dokelž SLA runje projekt z ćěkancami „Armida“ přihotowaše, so Malinowski rozsudźi přewjesć wjetši projekt pod hesłom „Migranća zeznawaja so ze serbskej kulturu“. Tak bě wón wot junija z přeco měnjacymi so skupinami Budyskich ćěkancow po puću. Woni wopytachu Mjezynarodny folklorny festiwal „Łužica“, zeznajomichu so ze serbskej narodnej drastu w krawcowni SLA, ze serbskej hudźbnej kulturu a serbskimi instrumentami na probach SLA a w rozmołwje z komponistom Janom Cyžom, wopytachu wospjet wustajeńcy Budyskeho Serbskeho muzeja, předstajenja NSLDź kaž tež Domowinu a rozestajachu so tohorunja z problemom wotbagrowanja serbskich wsow na wuprawje do brunicoweje jamy. Artur Malinowski organizowaše, fotografowaše, filmowaše a zběraše material. Ze wšeho toho zestajichu wobdźělnicy na nazymskej dźěłarničce „Wuměłstwo nje­znaje hranicy“ pod nawodom Ellen Spengler w muzeju štyri pisane kolažowe kašćiki, dokumentowace jich zetkanja ze Serbami.

Hač do pjatka móža sej zajimcy wuslědki projekta a wid migrantow na serbsku kulturu hišće wobhladać. Potom pućuje přehladka dale do pólskich Słubic, hdźež wotměje so wot 20. do 22. nowembra kongres „Nowa Amerika“. Tam budu wšitke jědnaće wobdźělenych projektow předstajene. Za to chce Artur Malinowski nimo 50 mjeńšin trajaceje fotoweje prezentacije hišće mały film wo dožiwjenjach projektowych wobdźělnikow na slědach serbskeje kultury přihotować.

wozjewjene w: Socialne
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND