Po hórstwje, lěsu a pólnych pućach so wubědźowali

štwórtk, 02. awgusta 2018
artikl hódnoćić
(0 )

Wo 27. crossowych běhach

Při přewšo tužnym wjedrje wubědźowachu so zańdźeny tydźeń crossowi entuziasća hižo 27. króć w Šěrachowje. Wšitke tři běhi na dwaj, šěsć a dwanaće kilometrow wjedu po kołokursu, maja naročny profil a započinaja so we 18.30 hodź.

Dobyćerjej na 2 km mjez dźěćimi běštaj Felix Soldaj z Korzymja (9:17 min) a Solina Trepte ze Šěrachowa (11:38 min). Běhaj za staršich młodostnych a dorosćenych běštej pokalowej na 6 a 12 km. Na 6 km rěkaše dobyćer Markus Bär z Wjernarjec (23:22 min). Najspěšniša žona a dobyćerka pokala běše Maria Niemschke z Chróstawy, wona doběža w 31:03 min do cila. Na tej distancy wubědźowachu so tež w skupinje 70-74 lět Irene Fiebag ze Załomja (39:25 min) a Hella Helmowa z Jitka (55:51 min) kaž tohorunja najstarši starter, 81lětny Siegfried Willweber z Wjelećina (34:38 min). Něhdyši Budyski wurjadny běhar Frank Gerle je so za swoje sportowe zjednoćenstwo Donaueschingen w skupinje 70-74 lět sobu wubědźował, a běše w njej dobyćer (32:14 min).

wozjewjene w: Sport
Prošu přizjewće so, chceće-li komentar podać

Serbska debata

nowostki LND