Sakski dorost so wubědźował
Spočatk awgusta wuhotowaše Sakski judo-zwjazk w Budyšinje krajne mišterstwo 2025 starobneje klasy U15. Wuhotowar bě Policajski sportowy klub Budyšin (PSC).
Něhdźe kóždy třeći z cyłkownje 200 němskich a serbskich čłonow towarstwa angažowaše so čestnohamtsce na přihotach tuteje sportoweje premjery za Sprjewine město. Woni natwarichu dźeń do toho z nimale 400 jednotliwych dźělow wobstejace naddimensionalne wubědźowanišćo, postarachu so na dnju wubědźowanja wo jědźe a napoje za aktiwnych, trenarjow a přihladowarjow. Nic naposledk zaručichu bjezporočny a fairny wotběh wubědźowanjow. Wo tym rozprawješe prezident towarstwa Uwe Hilbig Markej Šimanej (CDU). Wón bě tež jako přihladowar přitomny.
Čestny a starobny prezident wokrjesneho sportoweho zwjazka Peter Schmidt a wjesnjanosta gmejny Malešecy, hdźež je PSC doma, Matthias Seidel, běštaj tež mjez hosćimi. Wšitcy třo so w swojich postrownych słowach aktiwnym, trenarjam, sudnikam a přihladowarjam za čestnohamtski angažement dźakowachu. Bjez nich njeby tajki sportowy wulkopodawk móžny był.
Wulka blamaža w Barće
ST Bart –
ST 1922 Radwor 5:0 (1:0)
Zestawa hosći: Šěrak – B. Grubert, Schäfer, Burčik (46. Bišof), Wjeńka, Lawka (46. Buša), Krječmar (55. Elsner), Wencel, Wjesela, Hetaš, Hančik (73. Dej)
Za cyłk ST 1922 Radwor skónči so pokalna hra přećiwo Bartskemu ST z hórkim přesłapjenjom.
Do hry su hosćo poprawom derje startowali. Radworčenjo stejachu stabilnje, poskićichu přećiwnikej mało rumow a wuhrachu sej někotre dobre móžnosće. Předewšěm Paul Hančik a Karl Hetaš měještaj wjacore šansy nawjedowanje docpěć. Tola jeju kónčne kopy na wrota běchu njedokładne a přechwatne. Z přiběracym hrajnym časom pak hosćo hrajnu nitku zhubichu. Domjacy cyłk hraješe nětko sylnišo, bjez toho zo by so sam dypkował. Krótko do přestawki trjechi mustwo z Barta 1:0 (43.).
Po změnje stronow Radworčenjo lědma lěpje hrajachu. Přećiwnik wosta tohorunja słaby. Tola hosćo njemóžachu hrajny staw wurunać. W 53. min. zwyši Bart na 2:0. Domjacy cyłk njewěstosće Radworčanow lesćiwje wuži. W 61. min. padny 3:0, jenož šěsć mjeńšinow pozdźišo 4:0. Zakónčace wrota docpě Bart w přidatnym hrajnym času.
Zhromadnosć skrućili
Minjeny kónc tydźenja mějachu wolejbulistki Viktorije Worklecy třidnjowske treningowe lěhwo we Worklečanskej domjacej hali. Z tym zahajichu aktiwny přihot na hrajnu dobu 2025/26 we wobwodnej lize wuchodna Sakska.
Pjatk wječor bě zhromadźizna mustwa, w kotrejž zhromadnje nowu sezonu planowachu. Slědowaše prěnja treningowa jednotka. Při tym koncentrowachu so hłownje na hornje přihraće a nadběh kaž tež na wšelakore hrajne formy. Zakónčaca treningowa hra zazběh do lěhwa skulojći.
Za sobotu předewzachu sej zhromadny wulět. Dokelž bě so mustwo wo něšto hrajerkow womłodźiło podachu so za dalše zhromadne zeznaće z hale won do přirody na jězbu z čołmom. Podłu Nysy zhromadnje padlowachu.
Chróšćenjo bjez problemow dale
Ottendorf-Okrilla II –
SJ Chrósćicy 0:3 (0:1)
Zestawa hosći: Škoda – Graf (85. F. Cyž), Młynk, Zynda, Mark, L. Zahrodnik, Hawš, Wornar, Bjeńš, Šiman, Kral-Zahrodnik (72. Donat)
Druhe pokalne koło wuhrachu Chróšćenjo sobotu w Ottendorfje. Tónkróć wojowachu přećiwo rezerwje wo docpěće přichodneho pokalneho koła. Na papjerje bě faworit po zdaću jasny, wšako domjace mustwo dwě klasy niže hraje.
To spytachu Chróšćenjo tež wot spočatka na kumštnym trawniku pokazać a wuhrachu sej spěšne nawjedowanje. Wólny kop Oskara Hawša z centralneje pozicije wrotar jenož doprědka wotwobara a Maksimilian Kral-Zahrodnik bul w druhim pospyće do wrotow suny 1:0 (5.). Tola po tym so wobaj cyłkaj jenož zrědka strašnje před wrotami pokazaštej. Hru charakterizowachu hrajne akcije mjez šěsnatkomaj a mnoho foulow. Chróšćenjo docpěchu hišće někotre šansy na wrota, tola woprawdźity ćišć njewukonjachu. Tež domjacy cyłk njebě wulce wuspěšny w ofensiwje a sej tohorunja jenož mało naspomnjenja hódnych situacijow wuhra.
Wysoka poražka Njebjelčanow
SJ Njebjelčicy –
FV Ottendorf/Okrilla 1:7 (1:2)
Zestawa domjacych: Wetzlich D. – Cyž (65. Lehmann), Reineke (85. Wetzlich R.), Hanuza, Matješk, Domš F. (78. Šiman), Plaettner, Korjeńk, Rudolf, Domš F., Kral M. (79. Čornak)
Minjenu njedźelu nastupichu Njebjelčenjo w druhim pokalnym kole. Tutón raz njeměješe losowanska sonina smilnosć a losowaše Njebjelčanam wokrjesneho wyšeho ligista z Ottendorfa-Okrille. Hrajerjam bě róla słabšeho mustwa wědoma. Trenar Pohling přihotowaše swój cyłk hižo na defensiwnu bitwu.
Hnydom wot spočatka bě rozdźěl mjez ligomaj widźeć. Přećiwnik běše prosće lěpši. Přiwšěm pak móžachu hosćićeljo dołho napřemo dźeržeć, tež hdyž steješe hižo chětro zahe 0:1 (5.). 0:2 pak daše dlěje na so čakać. Hakle w 30. min. poradźichu so hosćom druhe wrota. Nic naposledk, dokelž čerwjene košle wšitko spytachu, zo přećiwnika wot swójskich wrotow wotdźerža. W tutej fazy poradźi so domjacemu cyłkej tón abo tamny konter. Florian Domš a William Plaettner buštaj přeco zaso z dołhimi bulemi pósłanaj. Plaettner wuži jednu z tutych móžnosćow a trjechi ze zdalenosće 20 metrow 1:2 (40.).
Doma suwerenje dobyli
ST Marijina hwězda –
HZ Frankenthal 3:0 (1:0)
Zestawa domjacych: B. Czapik – L. Hoge, T. Jurš, K. Pakoßnick, E. Bulank, Peschmann (61. E. Zynda), Fl. Bulank, J. Kuring, Ch. Cyž, Zelnak (76. Langer), Kreuz (65. Eldor)
Jedyn z wjerškow na sportowym swjedźenju towarstwa Marijina hwězda bě domjaca hra muži. Tutón koparjo ze wsy při Klóšterskej wodźe tež jasnje za sebje rozsudźichu, hačrunjež pobrachowachu trenarjej Kaijej Frencelej wšelakich přičin dla tójšto koparjow.
Stara garda nowy wokrjesny mištr
Wuslědki (09.09.25)
Wokrjesny pokal
Jednota Kamjenc –
Módro-běli Minakał1:3 (0:2)
FC Łužica – ST Porchow 1:8 (0:4)
HZ Halštrow/Hlinowc II –
ST Marijina hwězda2:3 (0:2)
TSV Wachau II –
ZSZ Załom-Wopaka 9:7 (1:3) ptj
ST Bart – ST Radwor5:0 (1:0)
FV Ottendorf-Okrilla 05 II –
SJ Chrósćicy 0:3 (0:1)
ST Liegau-Augustusbad –
ST Kubšicy2:3 (1:0) pp
ST Demicy-Tumicy –
SJ Chrósćicy II3:0 (2:0)
HZ Horni kraj II –
Bretnig-Hauswalde0:4 (0:3)
ST Módro-běli Njeswačidło –
TSV Połčnica 1:3 (1:1)
HZ Wulka Dubrawa II –
Sokoł Ralbicy/Hórki 0:10 (0:6)
LSV Hory II –
ST Hnašecy-Dobruša 1:6 (0:1)
ST Natwar Němske Pazlicy II –
Germania Budyšin II 0:4 (0:1)
SZ Drjewnica 05 – ST Lubuš II 2:6 (0:5)
SJ Njebjelčicy –
FV Ottendorf-Okrilla 05 1:7 (1:2)
HZ Ralbicy II/Pančicy II –
ST Kinspork/Łužnica 2:1 (1:1)
Krajny pokal
BSC Freiberg – Budissa Budyšin 1:4 (0:2)
Wojerowski FC II –
Rjemjesło Rabenstein 2:4 (1:1)
Žołto-běli Zhorjelc – FC Grimma 0:3 (0:1)
Póst Drježdźany –
VfB Fortuna Kamjenica 0:1 (0:0)
ST Natwar Němske Pazlicy –
Biskopičanske KT 08 0:12 (0:4)
FSV Nowosólc-Hródk –
ESV Lokomotiwa Šwikawa 3:0 (1:0)
Pózdnja jědnatka hru rozsudźiła
ST Kinspork/Łužnica –
SJ Chrósćicy II 2:1 (0:0)
Zestawa hosći: Mark (65. F. Zahrodnik) – Lehmann (84. Wjela), Materna, M. Donat, T. Donat, Sćapan, Wornar, B. Donat, Budar (73. Klemenc), J. Donat (65. M. Zahrodnik), Matik
Na dalšu dypkowu hru w młodej hrajnej dobje bě sej rezerwa Chróšćanskeje sportoweje jednotki do Łužnicy dojěła.
Start do hry bě taktiski. Wobě mustwje dźiwaštej na defensiwnu stabilitu a hraještej skerje z mało rizikom. Po třiceći mjeńšinach so Łužničenjo prěni króć strašnje wrotam přibližichu. Přez lěwu stronu so wonkowny hrajer přesadźi a so w šěsnatce Chróšćanow hač na zakładnu liniju předrě. Wottam połoži bul wróćo na kromu šěsnatki. Tam přismali jeho sobuhrajer a smokny kulu na wrota. Jeho třělwa pak prasny na prěčnu łatu. Krótko do połčasa sadźichu hosćo swój prěni ofensiwny akcent. Po dołhej přihrawce Bosćana Donata so Damian Matik na lěwej stronje přesadźi a doběža před wrotarja. Matik jeho w dwuboju wuhra, tola z chětro wótreho kuta bul nimo wrotow suny.
