Pak młodostni w nocy měrnje we łožu spja, abo so na partyjach a rejach zabawjeja. Sobotu do hód pak su w nocy sportowali. Serbske młodźinske towarstwo Pawk bě na swój kóždolětny nócny wolejbulowy turněr do Pančičanskeje sportownje přeprosyło. Dźesać mustwow so tuž wubědźowaše, zo bychu sej hišće tróšku městna w brjuchu za hodownu pječeń spřihotowali.
Dwaj dnjej do hód je za młodostnych přeco zaso witany datum, wšako je so tón dźeń wjetšina z wulkich městow wot studija do domizny hižo nawróćiła. Tak běštej tež studentskej cyłkaj Bjarnat Krawc z Drježdźan a Sorabija Lipsk zastupjenej, ale tež tójšto wjesnych cyłkow kaž Miš-maš z Radworja a Wulkeje Dubrawy, Prachróšćenjo wězo, CTP-crew ze Serbskich Pazlic abo lokalny matador Dwójna nula z Pančic-Kukowa. Ale tež tamne mjena mustwow su młodostnym z wolejbulowych turněrow, wosebje Radija Satkula, znate. Organizator turněra Fabian Šěrak wopisowaše niwow hrow jako jara wysoki. Tež w pózdnjej hodźinje sej mustwa ničo njedarichu.
Njedźelu, 6. januara, zetka so w Kamjencu wot 14 hodź. wosom koparskich cyłkow z Hornjeje Łužicy a hraje w sportowni při lětanišću wo S-mobil-trofeju. Patron budźe serbski zapósłanc krajneho sejma Alojs Mikławšk z Worklec.
W skupinje A nastupja: Biskopičanske KT 08, FC Hornja Łužica Neugersdorf, Wojerowski FC, ST Horni kraj Sprjewja; w skupinje B Přezjednota Niska, LSV Nowe Město nad Sprjewju, Jednota Kamjenc, Budissa Budyšin.
Jubilejny turněr Natwara
Sportowe towarstwo Natwar Němske Pazlicy přewjedźe njedźelu, 6. januara, wot 9 do 13 hodź. swój jubilejny 30. interny halowy koparski turněr, a to w Kamjenskej sportowni „Při Boršći“. Wšitcy su wutrobnje přeprošeni.
Awtorka dźensa
Tereza Wićazowa
Tereza Wićazowa z Budyšina pisa dźensa prěni raz za rubriku Widźał(a), słyšał(a) – napisał(a) a je tak w stawiznach sportoweje kolumny nimo Ralbičanki Haleny Jancyneje druha žona. Rodźena Kukowčanka Tereza Wićazowa dźěła w Budyskim šulskim a zetkawanskim centrumje na Serbskim gymnaziju jako sportowa wučerka. Nimo toho je wolejbulistka Hrajneho zjednoćenstwa Pančicy-Worklecy we wobwodnej lize. Nětko w lěće 2019 je wona jedna z dweju WSN-nowačkow.
Wulki sportowski dźak wupraja sportowa redakcija Serbskich Nowin na tutym městnje Budyšanej Jurjej Nukej, kiž je swój WSN-pisak po wjac hač 100 přinoškach złožił.
Dźesać lět sym w Chrósćicach najprjedy w holčim, pozdźišo w žónskim koparskim mustwje za bulom honiła. Lěpje prajene, sym bule popadnyła abo wotwobarała, zo bych přećiwniskim wrotam zadźěwała. Moje dźěło běše našu klětku čistu dźeržeć. Dokładnu bilancu žanu nimam, ale myslu sej, zo sym swoje dźěło derje dosć wukonjała.
Přizjewjenski čas dźensa wuběži
Na internetowych stronach www.baer-service.de smědźa so běharki a běharjo za 52. Budyski silwesterski běh přizjewić, a to hišće hač do dźensa w połnocy. Zarjadowar budźe Budyske lochkoatletiske sportowe towarstwo Čerwjeno-běli 90. Start a cil budźetej w stadionje Młynkec łuka, čary 2,5 km, 5,3 km a 10,6 km powjedu do Humboldtoweho haja a zaso wróćo do stadiona.
Halowa kopańca we Worklecach
K 28. razej zetkaja so njedźelu, 30. decembra, wjesne koparske mustwa we Worklečanskej sportowej hali, zo bychu wo pokal wjesneje a gmejnskeje skupiny CDU hrali. Wo trofeju kopać budźe znowa dźesać cyłkow z Pěskec, Smječkec, Noweje Wjeski, Worklec, Hórkow, Róžanta, Chrósćic a Serbskich Pazlic. Turněr započnje so připołdnju w 13 hodź. Mytowanje je wječor 17.30 hodź. planowane.
Wuhraja zymsku ediciju
Tydźeń po wuhraću wokrjesneho pokala dyrbjachu wolejbulisća z Pančic na třećim hrajnym dnju w Budyšinje nastupić. Přećiwnikaj rěkaštaj Budyšin sewjer a Sokoł Budyšin. Prěnje mjenowane mustwo běchu klóšterscy doma hižo raz přewinyli. Hra přećiwo Sokołam wuwołaše so jako serbski derby. Tutón króć pak běchu karty nowe měšane, wšako je so hrajerjam ze sprjewineho města dorost přidružił. A dalšu nowostku prezentowaše Pančan mustwo – hrajachu prěni króć w nowych dresach.
SG Budyšin sewjer – ST Marijina hwězda 2:0 (25:19, 25:16)
Awtor dźensa
Jan Hrjehor
Bratraj-lodohokejistaj hrajetaj w narodnym mustwje za Němsku, třećemu synej małeho ratarja ze Slepjanskeje kónčiny, kiž ma doma stadło wowcow, rasowe nukle a někotre wosebite kokoše, pak so skok k najlěpšim dorostowym lodohokejistam Němskeje hišće poradźił njeje. A potom je tam tež hišće sportowy wučer, kiž dyrbi chětro krutemu nanej wo zadźerženju swojeho syna rozprawjeć ...
Nócny wolejbul Pawka
Serbske młodźinske towarstwo Pawk zarjaduje jutře, sobotu, zaso swój tradicionalny wolejbulowy turněr, a to w Pančičansko-Kukowskej sportowni. Pawkojo namołwjeja serbskich a dalšich młodostnych zběhnyć so z přitulneho křesła a so na sportowe polo podać. Zo bychu sej sportowče a sportowcy hodownu pječeń bjez hubjeneho swědomja zesłodźeć dać móhli, njech so do toho hišće raz porjadnje wucychnuja. Maksimalnje dwanaće cyłkow smě sobu hrać, přizjewjenja su po Facebooku móžne. Startowy pjenjez wučinja 10 eurow, žónska kwota žana njeje, bule za zahraće maja mustwa sobu přinjesć.
Hodowna kopańca
Tež lětsa přewjedu w Budyšinje w sportowym arealu Humboldtowy haj zaso hodownu kopańcu, a to srjedu, 26. decembra, wot 9 hodź. Na jubilejne 60. bulkopanje su tež zaso serbske sportowče a serbscy sportowcy přeprošeni.
Hodownu husycu sej wotběhać
Worklečanscy koparscy přećeljo chcychu tež na druhim wólnočasnym koparskim turněrje ,,Horce-wino-cup“ na podesće stać. Loni wobsadźichu woni na kumštnym trawniku w Biskopicach třeće městno, lětsa móžachu turněr samo dobyć.
Hač k dobyćerskmu wobrazej pak běše to napinacy bój za koparjow wokoło trenarja Renéja Kaczmareka. Kaczmarek pak pokaza ze swojimi rozsudami złotu ruku.
K zazběhej turněra běchu hosćo z Worklec hnydom dwójce wuspěšni. Přećiwo Germaniji Biskopicy 92 trjechi Ronny Wünsche dwójce, a runje tak bě wón přećiwo hosćićelej, mustwu Ći Swěrni, dwójce wobdźěleny. Prěnje wrota třěli Wünsche hišće sam, pola druhich je bul njesebičnje sobu běžacemu Dawidej Matikej přihrał. Před přećiwniskej klětku stejo tón čuwy wobchowa a bjez problemow přetwori.