Starožitnosće znowa wotkryć

štwórtk, 28. měrca 2024 spisane wot:

Budyšin. Twjerde a papjerjane pjenjezy, medalje, wuznamjenjenja, pohladnicy, ­literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so sobotu, 30. měrca, wot 9 do 14 hodź. w Serbskim domje. Tam móža so zajimcy poradźować dać a smědźa parkowanišćo na dworje Serbskeho domu darmotnje wužiwać.

Józef Brězan najlěpje hrał

Radwor. Škotowarka a 27 škotowarjow je so wutoru na škotowym turněrje serbskich seniorow w Radworskim hosćencu „Meja“ wobdźěliło. Najlěpje hrał je Józef Brězan, kiž doby z 2 658 dypkami před Eberhardom Kroschkom (2 459) a Manfredom Höraufom (2 313). Wšitcy třo steja tohorunja na čole cyłkowneho hódnoćenja, kotrež nawjeduje E. Kroschk před J. Brězanom a M. Höraufom.

Stawizniska přehladka

Instalacija podlěšena

srjeda, 27. měrca 2024 spisane wot:
Rakecy. Spirituelna zwukowa instalacija „Lubowany“ w Rakečanskej ewangelskej cyrkwi je wulkeho zajima dla dlěje přistupna, a to hač do 14. apryla. Boži dom je wšědnje wot 9 do 20 hodź. přistupny. Zastup je darmotny. Ze 24 wótřerěčakow je słyšeć chór Rakečanskeje Pawołskeje šule. K tomu postaraja so swětłomjetaki wo wosebitu atmosferu w cyrkwi. Zwukowa instalacija traje 25 minutow. Po pjeć minutow trajacej mjezyhudźbje ­wona awtomatisce znowa startuje. Tak móže so wopytowar kóždy čas wot hudźby, swěcy a tekstow inspirěrować dać.

Kofej w třoch z HERCAMI

wutora, 26. měrca 2024 spisane wot:

Budyšin. Kónc 1960ych lět zdobychu Beatles a Rolling Stones swět, w Pólskej znaješe kóždy Czerwone gitary. Tež ­we Łužicy chcychu młodźi Serbja beatowu hudźbu činić a załožichu skupinu ­HERCY. Wo swojej hudźbje a wo swojich wosobinskich dopomnjenkach na tehdyši čas rozprawjeja čłonojo skupiny na přichodnym zarjadowanju w rjedźe „Kofej w třoch“, jutře, srjedu, w 15 hodź. w Budyskim Serbskim muzeju. Zarjadowanje poćahuje so na inscenaciju Němsko-Serbskeho ludoweho dźiwadła „Na tamnym boku měsačka“ Lubiny Hajduk­Veljkovićoweje, kotraž je hač do 6. apryla na hłownym jewišću dźiwadła widźeć.

Přeprošuja na rozpominanje

Smochćicy/Budyšin. Smochčanske kubłanišćo swjateho Bena přeprošuje ćichi pjatk na rozpominanje do Budyskeho wopomnišća na Weigangowej. Křižowy puć započnje so w 10 hodź. Na zarjadowanju spominaja na horjo woporow diktaturow a namócneho knjejstwa 20. lětstotka hač do dźensnišeho. Po tym móža sej wobdźělnicy trajnu wustajeńcu wobhladać. Zajimcy zetkaja so w 9.50 hodź. před wopomnišćom.

Seniorojo škotuja

póndźela, 25. měrca 2024 spisane wot:

Radwor. Přichodny škotowy turněr serbskich seniorow wotměje so jutře, wutoru, w Radworskim hosćencu „Meja“. Započatk budźe w 14 hodź. Kaž organizator Měrćin Nowak zdźěli, su nowačkojo rady witani. Dalši turněr přewjedu 23. apryla w Njeswačanskim „Knježim hosćencu“.

Wotewru wustajeńcu

Wojerecy. We Wojerowskim kompjuterowym muzeju ZCOM wotewru jutře, wutoru, w 16 hodź. wustajeńcu wo dźěle, wšědnym dnju a prawach žonow. Přehladka z wosom portretami žonow pokazuje swět dźěławych žonow za čas NDR a po politiskim přewróće hač do dźensnišeho. Wobrazy pokazuja, kak žony jako čłonki dźěłarnistwow a zawodnych radow wo swoje prawa wojuja.

Přednošk wo překasancach

pjatk, 22. měrca 2024 spisane wot:
Njeswačidło. Na přednošk profesora dr. Wesche na temu „Wužiwajće krajiny w Sakskej na dobro překasancow“ su zajimcy póndźelu, 25. měrca, w 19 hodź. do přiro­doškitneje stacije w Njeswačidle pře­prošeni. Přizjewjenja za zarjadowanje přijimuja pod abo telefonisce pod 035933 30077. Zastup płaći na dorosćeneho 2,50, potuńšeny jedyn euro.

W bibliotece jejka debić

srjeda, 20. měrca 2024 spisane wot:

Wojerecy. Dojutrownu dźěłarničku přewjedźetej župa „Handrij Zejler“ a syć ­ZARI jutře, štwórtk, wot 14 do 17 hodź. we Wojerowskej bibliotece „Brigitty ­Reimann“. Tam móža zajimcy jutrowne jejka po serbskich technikach debić. Nimo toho profesionelnje debjene jejka wustajeja a wo nich informuja. Wobdźělnicy njech přinjesu dwě wudutej abo zwarjenej jejce sobu. Zastup je darmotny. Wšitcy su wutrobnje witani

Čita wo pradźědu

Njeswačidło. Ze swojeje knihi „Johann Zautes Lebensfahrt“ čita jutře, štwórtk, w 19.30 hodź. Sabine Bauer-Helpert na Njeswačanskej cyrkwinskej žurli. Kniha jedna wo jeje serbskim pradźědu a je za­jimawy biografiski roman wo hornjo­łužiskim žiwjenju w 19. lětstotku. Wo­pytowarjo móža sej knihu po čitanju za 19,80 eurow kupić. Awtorka jednotliwe eksemplary rady signuje. Knižne čitanje so w běhu lěta na dalšich městnach Hornjeje Łužicy wospjetuje. Čitanje budźe w němskej rěči.

Sejm hotuje so na wólby

wutora, 19. měrca 2024 spisane wot:
Drjenow/Chrósćicy. Wólbny wuběrk Serbskeho sejma předstaji w Hornjej a Delnjej Łužicy naćisk směrnicow za ­wólby 2. Serbskeho sejma 2024. Wšitke towarstwa a iniciatiwy su namołwjene, zastupjerjow do wólbnych gremijow słać. Prěnju diskusiju wuhotuja štwórtk, 21. měrca, w Drjenowskim hosćencu „Jagdhof“. Dźeń pozdźišo slěduje dalša w Chróšćanskim Krawčikec hosćencu. Zarjadowani započnjetej so w 19 hodź.

Serbskich wučerjow wukubłał

póndźela, 18. měrca 2024 spisane wot:
Budyšin. Organist, hudźbny pedagoga a komponist Karl Eduard Hering (1807– 1879) steji w srjedźišću hudźbneho přednoška jutře, wutoru, w 19.30 hodź. na Budyskej wosadnej žurli swj. Pětra při Měšćanskim nasypje. Jako hudźbny wučer na krajnostawskim wučerskim seminarje njeje Hering jenož Korlu Awgusta Kocora wukubłał, ale tež wjele dalšich serbskich wučerjow. Přednošuje Hagen Schulz z Muzeja Budyšin.

Kołbaski w srjedźišću

pjatk, 15. měrca 2024 spisane wot:
Kamjenc. Znate a woblubowane Kamjenske kołbaski steja w srjedźišću regionalnych a kołbaskowych wikow njedźelu, 17. měrca, wot 12 do 18 hodź. w Kamjencu. Mjeztym sedmy raz přeprošuja tamniša měšćanska iniciatiwa, rěznicy a měšćanske zarjadnistwo na nakupowansku njedźelu a regionalne wiki. Nimo kołbaskow změja na torhošću a kołowokoło njeho wjele dalšich poskitkow, mjez druhim tajke za cyłu swójbu.

Poskićuja přednoški

štwórtk, 14. měrca 2024 spisane wot:
Budyšin. We wobłuku mjezynarodneje wědomostneje konferency Serbskeho instituta a Praskeje Karloweje uniwersity wo splećenjach a interakcijach w cyrkwinskich stawiznach centralneje Europy poskićuja jutře, pjatk, w Budyskim Serbskim domje wjacore zajimawe přednoški. Wot 9 hodź. přednošuje Tadeja Zelnakec z klóštra Marijineje hwězdy wo Marijinej hwězdźe a swěće cisterciensow w zažnym nowowěku a Marius Winzeler z Drježdźan porěči wo twarskich wose­bitosćach Marijineje hwězdy w špihelu wuměny mjez Hornjej Łužicu, Sakskej, Čěskej a Šleskej. Popołdnju steja dalše přednoški na programje konferency. Wot 16 hodź. wěnuje so Martin Christ z Er­furta prašenju, kak so łužiscy katolikojo w jendźelskorěčnych tekstach w času wot 1600 do 1900 wotbłyšćuja. Lubina Malinkowa předstaji dźenik Jurja Wawrika wo jeho putnikowanju w lěće 1842 z klóštra Marijineje hwězdy do Roma a Fabian Kaulfürst porěči wo poćahach mjez Prahu a Serbami na zakładźe Noweho biografiskeho słownika.

Serbska debata

nowostki LND