Karnewal lětsa njebudźe

wutora, 29. septembera 2020 spisane wot:

Serbske Pazlicy. Kaž w Kulowje je so nětko tež Serbskopazličanske karnewalowe towarstwo rozsudźiło, koronapandemije dla lětuše póstniske zarjadowanja w Njebjelčanskej „Bjesadźe“ wotprajić. To wo­znamjenja, zo tam žane zahajenje kar­newaloweje sezony njeswjeća a tež ža­noho noweho princa njewuzwola. Hač so klětu k wjerškej póstniskeje sezony kapičkowe wječory a dalše ze zańdźenych lět zwučene zarjadowanja wotměja, tuchwilu hišće jasne njeje. Kaž ze Serbskopazličanskeho karnewaloweho towarstwa rěka, dyrbja najprjedy raz dalše wuwiće korony a z nim zwisowace postajenja hygieny wočaknyć.

Nowi spěwarjo rady witani

Konjecy. Serbski muski chór Delany pře­pro­ša dalšich muži, kotřiž rady a rjenje spěwaja, na projektny spěwny wječor. Po dorěčenju z prěnimi nowymi spěwarjemi zetkaja so stajnje štwórtk w 19 hodź. w Konječanskej Burskej stwě, infor­muje zamołwity za projektny chór Alojs Langa. „Na nowych spěwarjow čaka a wjeseli so předsydstwo chóra Delany“, rěka w jeho zdźělence.

Kulturna zyma wupadnje

Wuspěšna sezona při haće

póndźela, 28. septembera 2020 spisane wot:

Němske Pazlicy (SN). Němskopazličanske stanowanišćo při wulkim haće je wob­lubowane. Lětsa móžachu w lěću nimo­ swójbow wosebje šulerjow witać, kotřiž tam po zakónčenju 10. lětnika abo po abiturje w skupinkach stanowachu. Sezona pak njeje hišće nimo. Jedyn z wjerškow budźe přichodnu sobotu, 3. oktobra, tradicionalny rybarski swjedźeń, zwjazany z dnjom wotewrjeneho campa. Hižo nětko planuja w syći za dźěćace a młodźinske dźěło w Biskopicach přebywanje dźesać- do 16lětnych, tež serbskich dorostowacych w krasnym arealu při Němskopazličanskim haće.

Wodźenja w zwěrjencu

Wojerecy (SN). Prawidłownje přeprošuja we Wojerowskim zwěrjencu na wosebite wodźenja, hdźež móža zajimcy tež za kulisy pohladać. Tak wotmě so njedawno wodźenje „Dobru nóc, zwěrjenco“. Dožiwić móžachu dźěći a jich starši kaž tež dalši, što so stawa, hdyž durje coologi­skeje zahrody wječor za wopytowarjow zamknu. Hladarjam poboku móža zajimcy tohorunja 3. oktobra wot 8 hodź. do­žiwić, kak zwěrjenc wotući. Coologiska pedagogowka Silke Kühn runja lawam a wopicam hižo na holcy a hólcow čakaja.

Digitalna doku wo lehnjakach

štwórtk, 24. septembera 2020 spisane wot:
Njeswačidło/Budyšin. Wotnětka předleži digitalna dokumentacija wo zwěrjatach, kotrež we a na Budyskich twarach hnězda. Jeje zakład twori 30 lět trajaca zaběra z problematiku. Ptaki kaž tež njetopyrje maja dźeń a hubjeńše wuměnjenja. Město Budyšin je ornitologow při tym podpěrało, předležacu wědu wo lehnjakach zawěsćić a digitalny zakład za cyłe město zestajeć. Wšelake zarjady, kotrež maja naležnosće družin wobkedźbować, móža daty nětko wužiwać. Měšćenjo su prošeni při dalewjedźenju dokumentacije pomhać z pokazkami wo tym, w kotrych twarjenjach na přikład sowy, kiwki, pu­stawy abo njetopyrje bydla. Informować móža woni Franka Urbana pod telefonowym čisłom 03591 /302766 a přirodowědnu staciju w Njeswačidle pod tel. čo. 035933/179862 abo pod .

Powjetša kubłanišćo

srjeda, 23. septembera 2020 spisane wot:

Kamjenc. Lessingowy gymnazij w Kamjencu budźe powjetšeny. Krajnoradny zarjad Budyšin, nošer kubłanišća, přeprosy na połoženje zakładneho kamjenja pjatk, 25. septembra, w 13 hodź. na Henselowej.

Wo stawiznach so rozmołwjeć

Biskopicy. Budyski wokrjesny zwjazk žónskeje unije dopomina z diskusiju na minjene 30 lět. Zarjadowanje na temu „Dopomnjenki – rozmołwy k 30. róčnicy němskeje jednoty“ wotměje so dźensa w 19 hodź. w klubowni Biskopičanskeho hotela Evabrunnen. Něhdyša zapósłanča poslednjeje swobodnje woleneje Ludoweje komory NDR a pozdźiša zapósłanča CDU zwjazkoweho sejma Marja Michałkowa poda zawodne słowa do temy. W naslědnej diskusiji chcedźa so wobdźělnicy rozmołwjeć wo wosobinskich dopomnjenkach a začućach za čas před 30 lětami, kotryž žiwjenje wobydlerjow Němskeje hač do dźensnišeho wobwliwuje.

Čitanje w galeriji

Předstaja posudk

wutora, 22. septembera 2020 spisane wot:

Budyšin. Zhromadnje ze swójskim zawodom za wotstronjenje wopłóčkow a ze zawodom za energiju a wodu chce město Budyšin Paulijowu hasu wutwarić. Tam maja so wodowody kaž tež zastaranje z milinu a pitnej wodu wobnowić. Wulke diskusije zbudźiło pak je, kak ze štomami wobchadźeć, kotrež při dróze steja. Detailowany posudk štomy nastupajo twori nětko zakład namjetowaneho planowanja. 28. septembra chcedźa je měšćanske zarjadnistwo a zawodaj mějićelam ležownosćow na Paulijowej, kotraž leži w tak mjenowanej wilowej štwórći Budyšina, předstajić. Dalši zajimcy su na zarjadowanje, kotrež započnje so we 18 hodź. w Budyskej sukelnicy, witani. Wobmjezowaneje ličby městnow dla je při­zjewjenje pod abo pod tel. čo. 03591/ 534 251 nuznje trěbne.

Magiski próh nimale překročeny

Dźěło zahaja w januarje

póndźela, 21. septembera 2020 spisane wot:

Budyšin. Ličby, fakty a orientacija na temu bydlić maja so wot januara přichodneho lěta znowa zestajeć. Kaž je dźěłowa skupina z Budyskeho měšćanskeho zarjadnistwa wobzamknyła, maja so daty wot januara zběrać. Hač do wozjewjenja dokumenta płaći dale 7. Budyski přehlad wo podružach. W dźěłowej skupinje skutkuja zastupjerjo wotnajerjow bydlenjow, hamtskeho sudnistwa kaž tež wuběrka za dobrozdaća Budyskeho wokrjesa. Wobhonić móža so zajimcy pola wotpowědneho partnera na komunalnym zarjedźe za statistiku pod mejlowej adresu , pod telefonowym čisłom 03591/534 491 abo pod: https://www.bautzen.de/leben-in-bautzen/wohnen-bauen/wohnen/

Zwjazkowa wobora zwučuje

Kinowy wječork wotměli

pjatk, 18. septembera 2020 spisane wot:

Radwor. Radworska młodźina měješe ideju, wuhotować „kino w klubje“. Před něšto dnjemi witachu na njón tam 90 hosći, zdźěli Jakub Wowčer. Wosebje swójby z dźěćimi, wjesnjenjo a młodo­stni z Radworja a wokoliny běchu přeprošeni. Serbski synchronizowany kanadiski film „Peeweje“ bě zazběh kinoweje nocy pod hołym njebjom. Hornjoserbsku premjeru měješe pask „SMY“, Sophije Cyžec z Njebjelčic a Luizy Nawkec z Wotrowa. Wonej běštej z nim hłowne myto lońšeho krótkofilmoweho festiwala w Choćebuzu dobyłoj. Wokoło połnocy zakónči so Radworski kinowy wječor z filmom „The Imitation Game“.

Wjace pjenjez třěchikryjerjam

Budyšin. Něhdźe 500 třěchikryjerjow Budyskeho wokrjesa je za čas pandemije dale dźěłało. Nětko chcedźa woni na hospodarskim wužitku wobdźěleni być. To žada sej industrijne dźěłarnistwo Twarić–ratarstwo–wobswět (IG BAU). „Knihi z nadawkami su pjelnjene, zajimcy dyrbja dołho čakać. Za sobudźěłaćerjow ma so ćělne napinanje tež w móšni pokazać“, rjekny Peter Schubert, wobwodny předsyda IG BAU wuchodneje Sakskeje.

Premjera budźe – ale druhdźe

štwórtk, 17. septembera 2020 spisane wot:

Budyšin (SN). Serbska premjera „Horce plincy“, kotraž bě za 26. september w Radworju planowana, budźe tón dźeń w Budyskim Dźiwadle na hrodźe. Pozadk rozsuda su hygienowe předpisy korony dla. Ličba přihladowarjow, kotruž smě dźiwadło na Radworskej žurli rozdźělić, je tak snadna, zo je so NSLDź rozsudźiło premjeru do Budyšina přepołožić, hdźež maja wjace městna. Za transport wopytowarjow z Radworja a wokolnych wsow pak poskićeja darmotny bus, kotryž hodźinu ­do spočatka, potajkim we 18.30 hodź. w Radworju při „Meji“ wotjědźe. Plan naslědnych předstajenjow so tohorunja tróšku změni. Tež 11. oktobra budźetej busaj zasadźenej a publikum darmotnje do Dźiwadła na hrodźe dowjezeny. Premjera tam budźe tuž 26.9. w 19.30 hodź. We 18.30 hodź. wotjědźe bus z Radworja přez Kamjenej, Bronjo, ­Chasow, Čorny Hodler, Chelno a Mały Wjelkow. Dalše předstajenja budu 27.9. w 17 hodź. w Pančicach-Kukowje (Klóšterska bróžnja) / 11.10. w 17 hodź. w Dźiwadle na hrodźe. W 16 hodź. wot­jědźe bus z Róžanta přez Sernjany, Nowu Wjesku, Worklecy, Wudwor, Kozarcy, Chrósćicy a Prawoćicy. W 16 hodź.

Hłowna zhromadźina Maćicy

srjeda, 16. septembera 2020 spisane wot:
Budyšin. Maćica Serbska přeprosy swojich čłonow a swoje čłonki na hłownu a wólbnu zhromadźiznu, kotraž budźe sobotu, 26. septembra, w 14 hodź. na žurli Budyskeho Serbskeho domu. Towarstwowemu dźělej a wólbam noweho předsydstwa a předsydy přizamknje so wědomostny přednošk dr. Roberta Lorenca, kiž porěči wo Mukowej „Statistice łužiskich Serbow“, kaž zdźěli městopředsydka towarstwa dr. Anja Pohončowa. Přizjewjenje je trěbne hač do 23. septembra.

Semester zahajeny

wutora, 15. septembera 2020 spisane wot:

Wojerecy (SN). Na Wojerowskej ludowej uniwersiće su nowy semester ze zajimawymi kursami zahajili. Wosebje woblubowane je tuchwilu nimo nawuknjenja wšelakich rěčow tema zdźědźenske prawo a kak testament pisać. Mnozy wuměnkarjo so za zakładnu wědu wobchadźenja z kompjuterom zajimuja, a fitnesowe kursy su dale jara požadane. Aktualne programowe zešiwki dóstanjeće mjez druhim w bibliotece Brigitty Reimann, we Łužiskim centeru, při kasy zwěrjenca a wězo na ludowej uniwersiće.

Kupjel zaso přistupna

Budyšin (SN). Pod krutymi postajenjemi hygieny korony dla je Budyska Röhrscheidtowa kupjel zaso přistupna. Tež šulerske płuwanje je zaso móžne. Ličba wopytowarjow w kupjeli je za zjawne płuwanje na 124 wobmjezowana. Hač k předrasćernjam je škitny nahubnik trěbny. Parna komora wostanje zawrjena.

Komora wotewrjena

nawěšk

SERBSKE NOWINY podpěruja:

Novi Sad – kulturna stolica Europy

nowostki LND