Wustajeńca dale přistupna
Pančicy-Kukow. Wustajeńca, kotruž je Towarstwo Cyrila a Metoda składnostnje lětušeje 775. róčnicy wobstaća klóštra Marijineje hwězdy wo serbskich wjerškach w zwisku z jubilejom před 25 lětami zestajało, je hišće hač do klóšterskeje kermuše, 15. oktobra, w rumnosći w přechodźe z klóšterskeho dwora w Pančicach-Kukowje přistupna. Zajimcy móža sej ju hač do pjatka wot 10 do 16.30 hodź. a sobotu wot 12.30 hodź. do 16 hodź. wobhladać.
Swědkojo zašłosće
Kamjenc. Wurězk wobstatka Kamjenskeho měšćanskeho archiwa ze sydom lětstotkow wobsahuje wustajeńca, kotraž je wot dźensnišeje srjedy hač do 28. januara přichodneho lěta w Kamjenskim sakralnym muzeju Swjateje Hany widźeć. Najstarši dokument pochadźa z lěta 1323. Wustajeńca je wot póndźele do pjatka wot 10 do 18 hodź, kónc tydźenja a swjate dny wot 11 do 16 hodź. widźeć. Zastup je darmotny.
Twarnišćo drje zašo hotowe
Njeswačidło. Statnu dróhu S 98 (Bóščanska dróha) w Njeswačidle budu šoferojo po wšěm zdaću hižo srjedź tohole tydźenja wužiwać móc. Tole zdźěli nowinski rěčnik krajneho zarjada za dróhotwar a wobchad (Lasuv) Franz Großmann. To pak je wot wjedra wotwisne. Poprawom bě předwidźane, dróhu hakle pjatk přepodać. Kružny wobchad wosrjedź wsy je wot spočatka tydźenja zaso wužiwajomny.
Wot apryla 2023 su jězdnju Bóščanskeje dróhi kaž tež Njeswačanski kružny wobchad a krótki dźěl Hłowneje dróhi hač k wotbóčce ponowili. We wobłuku twarskich dźěłow su Budyske wokrjesne zawody nowy wodowód do zemje połožili. Njeswačanska gmejna je kable za nadróžne wobswětlenje składła a chódnik ponowiła. Twarski wotrězk bě 650 metrow dołhi. Dohromady inwestowachu 875 000 eurow.
Za rěčny kurs so přizjewić
„PRISMA“ w bibliotece
Zhromadnje do wustajeńcy
Pančicy-Kukow. Čłonojo Domowinskeje skupiny Pančicy-Kukow njech njezabudu na zhromadny wopyt wustajeńcy „Čej’ da sy“ w Budyskim Serbskim muzeju. Wobdźělnicy dojědu sej njedźelu, 8. oktobra, do Budyšina z priwatnym awtom a zetkaja so w 14 hodź. před muzejom.
Swjeća při kupowym haće
Radwor. Dalši swjedźeń we wobłuku łužiskich rybowych tydźenjow budźe jutře, sobotu, swjedźeń při Radworskim kupowym haće. Wot 10 do 13 hodź. poskića tam čerstwu a sušenu rybu.
Radźićeljo wuradźuja
Róžant. Popłatki staršich za zawodowe wudawki Ralbičanskeje pěstowarnje budu jedna z temow přichodneho posedźenja gmejnskeje rady Ralbic-Róžanta jutře, štwórtk, we 18.30 hodź. w sydarni Róžeńčanskeho gmejnskeho zarjadnistwa. Dale zaběraja so radźićeljo z wustawkami wo zarunanju čestnohamtskeje dźěławosće a z wustawkami wo wotškódnjenju wohnjowych wobornikow. Nimo toho póńdźe wo plan potrjeby wohnjoweje wobory.
Campus na dwórnišću
Radwor. Staršiska iniciatiwa Radwor přewjedźe w druhim tydźenju nazymskich prózdnin na bywšim Radworskim dwórnišću nazymski campus. Mysleny je wón za šulerjow wot 1. lětnika. Wot 9. hač do 13. oktobra chcedźa so tam wšědnje wot 9 do 15 hodź. pod serbskim fachowym nawodom z přirodu a zwěrjatami w nazymje zaběrać, slědźić, eksperimentować, paslić, warić, pjec a wjele wjace. Přinošk płaći dźesać eurow na dźeń za zastaranje a material. Zajimcy njech přizjewja so pola Diany Mejnoweje pod telefonowym čisłom 035935/ 219 862 abo e-mailnje pod . Pjatk, 14. oktobra, přewjedu dźěłarničku za wudźenje. Městna pak su hižo wšitke wobsadźene.
Zahaja nowy sinfoniski rjad
Zhromadnje zmije pušćeć
Smječkecy. Wjesny klub Smječkecy přeproša wšitke swójby zbliska a daloka na tradicionelne pušćenje zmije do Smječkec, a to njedźelu, 1. oktobra, na łuku za Bjeńšec twarskej firmu. Po zwučenym wašnju spřihotuja tež lětsa zaso wjesne žony wot 15 hodź. butřankowe plincy. Organizatorojo wjesela so na bohate wobdźělenje
Oratorij trójce zaklinči
Zahaja Krabatowy tydźeń
Wojerecy. Składnostnje zahajenja Krabatoweho tydźenja jutře, 29. septembra, před radnicu w starym měsće Wojerec dźěći z Němčanskeje pěstowarnje w 14.30 hodź. serbski program předstaja. W 16.30 hodź. móža wopytowarjo dźěćacu rejwansku skupinu Brětnja dožiwić. Tomu so w 17.30 hodź. Serbska ludowa rejwanska skupina Ćisk přizamknje, kiž tradicionelne młóćenje z cypami pokaza. Tež „připołdnica“ steji na programje – w kamishibai-dźiwadle. Při jewišću je stejnišćo župy „Handrij Zejler“. Rěčnaj motiwatoraj Marija Šołćić a Lucian Kaulfürst budźetaj z keramiku resp. dudami přitomnaj. Oficielne zahajenje přewjedźe wyši měšćanosta Torsten Ruban-Zeh (SPD) w 14 hodź. Krabatowy tydźeń budźe hač do 8. oktobra trać. Dalše informacije: .
Kupjel zawrjena
Kamjenc. W Kamjenskej halowej kupjeli dyrbja w nazymskich prózdninach nuznje trěbne reparatury přewjesć. Tohodla wostanje kupjel wot póndźele, 2. oktobra, hač do njedźele, 15. oktobra za zjawne płuwanje zawrjena. Sawna hodźi so w tym času we wobmjezowanej měrje wužiwać, a to wot póndźele do pjatka stajnje wot 12 do 22 hodź. 3. oktobra wostanje sawna zawrjena.
Pólsce a jendźelsce po muzeju
Budyšin. Serbski muzej w Budyšinje je zetkawanišćo za ludźi z regiona a z cyłeho swěta. Tu nadeńdźeš rěčnu mnohotnosć. Pjatk, 29. septembra, přeprošuje Serbski muzej w ramiku mjezykulturnych tydźenjow w Budyšinje hosći w 15 hodź. na wjedźenje w pólskej a w 16 hodź. w jendźelskej rěči. Stawizny Serbow a wosebita wustajeńca „Čej’ da sy?“ so při tym předstajeja. Zajimcy njech přizjewja so pod .
Knižna premjera na hrodźe
Lichań. W Ludowym nakładnistwje Domowina je w septembrje wobrazowy zwjazk Jürgena Maćija „Ducy domoj – Unterwegs nach Hause“ wušoł. Nakładnistwo a Domizniske towarstwo Lichań přeprošujetej wšitkich zajimcow na knižnu premjeru, kotraž budźe wutoru, 3. oktobra, we 18 hodź., na hrodźe w Lichanju.
Radźićeljo wuradźuja
Chrósćicy. Přichodne posedźenje Chróšćanskeje gmejnskeje rady wotměje so štwórtk, 28. septembra, w 19 hodź. w tamnišim gmejnskim a kulturnym centrumje. Mjez druhim póńdźe wo wysokosć staršiskeho popłatka za hladanje dźěći w Chróšćanskej pěstowarni. Dale na dnjowym porjedźe steja wustawki wo wudawkach za zasadźenje wohnjoweje wobory a změna wobtwarjenskeho plana „Při pastyrni“ w Chrósćicach. Zjawnemu posedźenju přizamknje so njezjawny dźěl. Zajimcy su wutrobnje přeprošeni.
Wjelk dwě wowcy torhnył
Hórki. W nocy na minjenu sobotu je w Hórkach na kromje wsy do směra na Chrósćicy wjelk dwě wowcy morił. Jeju wobsedźer, kotryž měješe dohromady štyri wowcy na pastwje, je škodu hnydom přisłušnemu městnu přizjewił. Fachowc je hišće sobotu dopołdnja přijěł a po obdukciji wobkrućił, zo běše to wjelk. Tamnej wowcy móžeštej so wuchować a najprjedy raz ćeknyć. Jej su w běhu dnja zaso namakali.
