Za kurs čěšćiny so přizjewić

srjeda, 12. oktobera 2022 spisane wot:
Chrósćicy. Nowy kurs čěšćiny zahaji so 7. nowembra w Chrósćicach. Kurs nawjeduje wučer Jiři Jonak, kiž naslěduje Jana Breindla. Wučba wotměwa so w zakładnej šuli „Jurij Chěžka“ stajnje póndźelu wot 18 do 19.30 hodź. Zajimcy su wutrobnje witani. Přizjewjenja přijimuje Marija Beuttenmüllerowa pod telefo­nowym čisłom 03591 550408 abo e-mailnje pod .

Přewjedu projekt

wutora, 11. oktobera 2022 spisane wot:

Rakecy. „Moja serbska domizna“ je hesło projektoweho tydźenja 5. lětnika Rakečanskeje Pawołskeje šule, z kotrymž so šulerki a šulerjo tutón tydźeń zaběraja. Mjez druhim wopytaja studijo Serbskeho rozhłosa, rejuja ze SLA, wobhladaja sej staru cyrkwinsku biblioteku a nawjerća krótke filmy wo serbskich temach. Sobotu wot 14 do 17 hodź. wuslědki w šuli prezentuja. Předwidźane su dale kwis, hudźba a reje. K tomu su zajimcy witani.

DZA so předstaji

Wojerecy. Z Němskim centrumom za astrofyziku (DZA) ma we Łužicy wulki slědźenski centrum z mjezynarodnym wuprudźenjom nastać, kiž stwori perspektiwy za cyły region. Što pak DZA dokładnje čini a što wón za region wunjese? Na tutej prašeni a dalše wotmołwjeja dr. Christian Stegmann, dr. Maria Krause a Katharina Henjes-Kunst jutře, srjedu, wot 19 hodź. we Wojerowskej kulturnej fabrice na Piwarskej hasce 1. Wšitcy ­zajimcy su na informaciske zarjadowanje přeprošeni.

W radiju wo Zejlerju

Radźićeljo wuradźuja

póndźela, 10. oktobera 2022 spisane wot:

Chrósćicy. Změna porjada wo wužiwanju wjacezaměroweje hale „Jednota“ wot 1. januara 2023 budźe jedna z temow přichodneho zjawneho posedźenja Chróšćanskeje gmejnskeje rady. Wone wotměje so štwórtk, 13. oktobra, wot 19 hodź. w gmejnskim a kulturnym centrumje „Łužica“. Dale póńdźe wo popłatki za přewostajenje stejnišćow k mjezyna­rodnemu folklornemu festiwalej a wo popłatki za wupožčowanje wuhotowanskich předmjetow gmejny.

W prózdninach do młyna

Čorny Chołmc. Za čas nazymskich prózdnin wot 17. do 28. oktobra ma Čornochołmčanski Krabatowy młyn wšelake swójbne poskitki přihotowane. Tak planuja swójbne wodźenja z kreatiwnym poskitkom wot póndźele do pjatka stajnje wot 10 do 12 hodź., póndźelu, srjedu a pjatk tež wot 13 do 15 hodź. Nimo toho móža swójby zhromadnje pjec, a to wutoru, štwórtk a sobotu wot 13 do 16 hodź. Zajimcy njech přizjewja so pod telefonowym čisłom 035722 951133.

Wodźenja wjacorěčne

pjatk, 07. oktobera 2022 spisane wot:

Budyšin. We wobłuku interkulturelneho tydźenja poskićuje Budyski Serbski muzej njedźelu, 9. oktobra, wodźenja we wjacorych rěčach. Po zawodźe k zeznaću serbskich stawiznow a kultury slěduje wopyt wosebiteje wustajeńcy „Wšitko je krajina. Serbski moler Jan Buk“. Wodźenje wotměje so w 13 hodź. pólsce, w 15 hodź. ukrainsce a w 16 hodź. rusce.

„Stwórbu“ dožiwić

Dźěłarnička Bjesadow

štwórtk, 06. oktobera 2022 spisane wot:

Hodźij. Hižo tójšto lět organizuje Serbske ewangelske towarstwo hromadźe ze serbskimi Bjesadami jako lětne zetkanišćo za wuměnu a dalekubłanje dźěłarničku. Lětsa so wona třeći króć w Ho­dźiju wotměje, a to sobotu, 8. oktobra, w kantoraće při nawsy. Dźěłarničku zahaja w 14 hodź. z nutrnosću. Na to předstajitej so přełožowanski program „Sotra“ a serbski kwis. Po kofejowej přestawce dožiwja wobdźělnicy w 16 hodź. dwurěčne dźiwadło za dźěći a dorosćenych „Čmjeła Hana“. Wšitkich sobustawow Bjesadow, maćernorěčnych kaž tež serbsce wuknjacych a wšitkich dalšich zajimcow Serbske ewangelske towarstwo a Hodźijska Bjesada wutrobnje přeprošatej.

K sadowcam kolesować

Předstaja Serbsku protyku

srjeda, 05. oktobera 2022 spisane wot:

Budyšin. Ludowe nakładnistwo Domowina přeproša štwórtk, 6. oktobra, na knižnu premjeru „Serbskeje protyki 2023“. W Budyskej Smolerjec kniharni předstaja redaktor Pětr Šołta a awtorojo jednotliwych přinoškow nowostku, kotrejež tematiske ćežišćo tworja „stawiznički a powěsće, zajimawostki a překwapjenki kołowokoło Budyskich horow“. Zarjadowanje započnje so w 19 hodź.

Jutře rěčna hodźina

Kamjenc. Zapósłanc Sakskeho krajneho sejma Alojs Mikławšk (CDU) změje jutře, štwórtk, dalšu wobydlersku rěčnu hodźinu. Wot 13 do 16 hodź. změja wobydlerjo we wólbnym běrowje na Kamjenskej Zapadnej čo. 4 składnosć swoje naležnosće přednjesć. Termin dojednać móža sej woni pod telefonowym čisłom 03578 305383 abo pod . Za wobydlerske naležnosće je běrow wot póndźele do pjatka stajnje wot 8 do 14 hodź. docpějomny.

Wódny muž na pućowanju

Rejwać wuknyć

wutora, 04. oktobera 2022 spisane wot:

Wojerecy. Dźěći a młodostni w starobje dźesać do pjatnaće lět móža kóždy pjatk wot 14 do 15 hodź. na dźěćacej a młodźinskej farmje we Wojerecach rejwać nawuknyć, zdźěli Křesćansko-socialny kubłanski skutk Miłoćicy. Za nawod ­treninga je sej CSB zdobył rejwarki a rejwarjow Serbskeho ludoweho ansambla z Budyšina. Pola nich nawuknu zajimcy rejwanske kroki. Wobdźělenje je darmotne. Poskitk spěchuje program zwjazkoweho ministerstwa za kubłanje a slědźenje. Dalše informacije a přizjewjenje dóstanu zajimcy pod telefoniskim čisłom 03571 979164.

Podlěša dobu wustajeńcy

Budyšin. Wosebitu wustajeńcu „Wuměłstwo a přiroda. – INO – Ingerose Jänichen-Kucharska, retrospektiwa“ znateje hornjołužiskeje wuměłče hač do 1. januara 2023 podlěša. Přehladka je dotal njewočakowano wjele zajimcow do Muzeja Budyšin přiwabiła.

Škody wotstronić

Wódny muž na pućowanju

pjatk, 30. septembera 2022 spisane wot:

Wodowe Hendrichecy. Serbske šulske towarstwo přeprošuje serbske dźěći a swójby, bydlace w Hornjej a Delnjej Łužicy, na zhromadny kónc tydźenja. Tón wotměwa so 21. do 24. oktobra w dźěćacym wočerstwjenišću Querxenland we Wodowych Hendrichecach. Lětsa steji zetkanje pod hesłom „Wódny muž na pućowanju“. Přinošk na swójbu z połnym zastaranjom wučinja 240 eurow. Přizjewjenja su hač do 14. oktobra 2022 pod mejlowej adresu móžne. Dalše informacije za zajimcow steja na webstronje SŠT.

Dalše šćěpjenje bórze móžne

Budyšin. Wot 4. oktobra budźe móžno so ze šćěpiwom šćěpić dać, kotrež je na wšelake omikron-warianty koronawirusa přiměrjene. Za to poskićeja šćěpiwo předewzaća BionNTech/Pfizer. Zo bychu čakanske časy pomjeńšili, su šćěpjenja jeno z předchadźacym terminowym dojednanjom přez onlinowy portal móžne, kaž Němski Čerwjeny křiž tele dny zdźěli. Rjadowanje płaći za wšitke prěnje, druhe abo dalše šćěpjenja. Terminy hodźa so knihować pod .

Třinarodny fachowy forum

Ryby z Kupoweho hata

štwórtk, 29. septembera 2022 spisane wot:

Radwor. Radworske Kupowe zjednoćenstwo z.t. přeprošuje na łójenje rybow z Kupoweho hata. Tule sobotu, 1. oktobra, móža sej zajimcy při haće čerstwu a kurjenu rybu kupić abo na městnje tež hnydom zjěsć. Dale poskićuja wšelake jědźe z gulašoweje kanony. W srjedźišću podawka pak steja dźěći, kotrež dožiwja jón ze wšěmi zmysłami. Wažne je, zo ­maja wone drastu sobu, zo móža so po po­trjebje předrasćić. Zarjadowanje wotměwa so we wobłuku Łužiskich rybjacych tydźenjow. Dalše informacije pod .

Na film do Chrósćic

Chrósćicy. W Chróšćanskej wjacezaměrowej hali „Jednota“ móža sej zajimcy wutoru, 4. oktobra, we 18 hodź. filmy ­na temu „Krabat“ wobhladać, zdźěli Chróšćanski gmejnski zarjad. Zarjado­wanje wotměje so w zwisku z Kraba­towym tydźenjom. Zajimcy su na bjezpłatny poskitk přeprošeni.

Myška w Lessingowym měsće

Do Smolerjec kniharnje

srjeda, 28. septembera 2022 spisane wot:
Budyšin. Towarstwo Přećeljo Smolerjec kniharnje přeprošuja štwórtk, 29. septembra, w 19 hodź. na literarny wječork składnostnje pjatych posmjertnin serbsko-němskeho lyrikarja, dramatikarja a přełožerja Kita Lorenca. Pod hesłom „Interview młodeho wědomostnika ze starym basnikom“ čitaja čłonojo towarstwa w Smolerjec kniharni na Budyskej Sukelnskej z Lorencoweje prozy a esejowych tekstow. Poskitk je bjezpłatny.

Serbska debata

nowostki LND