Wopomnišćo online wopytać

pjatk, 28. meje 2021 spisane wot:

Budyšin. Na digitalnym wopyće Budyskeho wopomnišća móža so zajimcy njedźelu, 30. meje, w 16 hodź. wobdźělić, a to pod . Bastian Hempel a Ulrich Ingenlath rozprawjataj wo wosudźe Dietera Hötgera. Wón je 1962 ze Zapadneho Berlina tunl do wuchoda twarił, bu pak přeradźeny. Dźewjeć lět trajace chłostanje wotsedźa wón w Budyšinje. Tu so jemu 1967 jako jeničkemu poradźi, přez dźěru we wonkownej sćěnje ćeknyć. Dźewjeć dnjow pozdźišo pak jeho lepichu.

Poskića šulerske protyki

Kamjenc. Šulerske protyki Sakskeho krajneho sejma za šulske lěto 2021/2022 poskića zapósłanc Alojs Mikławšk (CDU) w swojim Kamjenskim běrowje na Zapadnej 4 wot póndźele do pjatka stajnje wot 8 do 14 hodź. Nimo praktiskeho tydźenskeho planowarja informuje protyka zajimcow wo parlamentariskim dźěle.

Přijimuja skazanki

Nowoslicy. Za nalětni grilowanski wječor pjatk, 4. junija, wot 18 do 23 hodź. móža so zajimcy hač do 2. junija pola Dinarjec w Nowoslicach přizjewić. Za bifej přihotuja tam najwšelakoriše předjědźe, přiłohi a hłowne jědźe. Wo hudźbne wobrubjenje stara so kapała Brankatschki. Wobdźělenje na wosobu płaći 25 eurow.

Kupja digitalne tafle

štwórtk, 27. meje 2021 spisane wot:

Chrósćicy (SN/MWj). Za 18 000 eurow kupi Chróšćanska gmejna digitalne tafle za štyri rjadowniske rumnosće tamnišeje zakładneje šule. To su gmejnscy radźićeljo na swojim zašłym posedźenju wobzamknyli. Gmejna bě za digitalnu wučbu dohromady 52 000 eurow dóstała a dźěl toho mjez druhim hižo do datoweje syće kubłanišća, do nawušnikow a do laptopoweho woza inwestowała, praji wjesnjanosta Marko Kliman (CDU). Dźakowano zhromadnemu wupisanju zarjadniskeho zwjazka Při Klóšterskej wodźe docpěchu „za jara dobry produkt jara dobru płaćiznu“, kaž to předsyda Měrko Domaška rozłoži. We wulkich prózdninach nowe tafle připrawja. Dotalne zelene tafle w zakładnej šuli dale wobchowaja. Za wu­pisanje bě so najprjedy 22 firmow za­jimowało, poskitk wotedali pak su na kóncu jeno tři, kaž na posedźenju gmejnskich radźićelow zdźělichu.

Klóšterski swjedźeń přestorča

Za prózdniny so přizjewić

wutora, 25. meje 2021 spisane wot:

Njeswačidło. Wotnětka smědźa so dźěći za štyri wšelake prózdninske campy Njeswačanskeje přirodoškitneje stacije přizjewić. Na wuběr steja slědźerske lěhwo wot 25. do 29. julija, insektowy přebytk wot 29. do 31. julija, zelowy camp wot 1. do 6. awgusta a ornitologiske lěhwo wot 8 do 13. awgusta. Nadrobniše informacije dóstanu zajimcy internetnje pod . Přizjewjenja přijimuja pod telefonowym čisłom 035933/ 31 900, hdźež tež na pra­šenja wotmołwjeja.

Knihu wirtuelnje předstaja

Budyšin. Na wirtuelne knižne předstajenje z awtorom Benediktom Dyrlichom štwórtk, 27. meje, w 19 hodź. přeproša Ludowe nakładnistwo Domowina wšitkich zajimcow. Awtor čita ze swojeje knihi „Doma we wućekach 2“, kotraž je nazymu 2019 wušła. Přizjewić móža so zajimcy přez link na shopje LND pod .

Maja čaru za rolery

Brězowka. Kołowokoło noweho hrajkanskeho nastroja maja w Brězowskej pěstowarni „Baćonjace hnězdo“ nětko tež čaru za rolery. To zdźěli Dźěwinski wjesnjanosta Helmut Krawc (SPD) na minjenym posedźenju gmejnskeje rady. Financowali su ju z komunalnej pawšalu a swójskim dźěłom wobydlerjow. Čara hodźi so za dwu- a třikolesa.

Njedźelu k sportnišću

pjatk, 21. meje 2021 spisane wot:

Němske Pazlicy. Kohož swjatkowny wulět powjedźe zajutřišim, njedźelu, do kónčiny wokoło Kamjenca, móže sej mjez druhim do Němskich Pazlic dojěć. Tamniše sportowe towarstwo přeproša zajimcow wot 10 do 18 hodź. k swojemu sportowemu a wólnočasnemu centrumej, hdźež poskićeja jědźe a napoje.

Ludźi darmotnje poradźuje

Kamjenc/Njebjelčicy. Wokrjesny radźićel Lěwicy a prawiznik Hajko Kozel poskići přichodny tydźeń dwójce darmotne socialne poradźowanje, a to štwórtk, 27. meje, wot 16 do 17.30 hodź. we wobydlerskim běrowje Lěwicy na Budyskej dróze 8 w Kamjencu a pjatk, 28. meje, wot 14 do 15.30 hodź. na Njebjelčanskim gmejnskim zarjedźe. Ćežišćo budu aktualne dźěło- a socialnoprawniske wuskutki koronapandemije. Tež wo wšěch dalšich temach Hajko Kozel ludźi poradźuje. Zajimcy měli sej za wobaj dnjej pod telefonowym čisłom 035932/ 363 727 termin dorěčeć.

Boža mša na putniskej łuce

Nowe rěčne kursy

štwórtk, 20. meje 2021 spisane wot:
Budyšin. Rěčny centrum WITAJ rozšěri swój poskitk kursow serbšćiny. Wot spočatka junija budźe rěčny docent Marek Krawc kurs za započatkarjow wutoru w Budyšinje a dalši kurs – tohorunja za započatkarjow – štwórtk we Wojerecach nawjedować. Třeći poskitk budźe onlinowy kurs serbšćiny na zakładźe němčiny za započatkarjow zwonka Łužicy. A tón wotměje so potom stajnje pjatk nawječor. Přizjewjenja su móžne hač do 31. meje pod telefonowym čisłom 03591/ 550 400 abo e-mailnje pod .

Radźićeljo so schadźuja

srjeda, 19. meje 2021 spisane wot:
Ralbicy. Přichodne posedźenje gmejnskeje rady Ralbicy-Róžant wotměje so jutře, štwórtk, we 18.30 hodź. w Ralbičanskej sportowni. Mjez druhim póńdźe wo wobstaranje digitalnych taflow za zakładnu a srjedźnu šulu. Tohorunja jutře, ale w 19 hodź. schadźuja so Chróšćanscy radźićeljo w gmejnskim a kulturnym centrumje. Jedyn z dypkow dnjoweho porjada zaběra so z dźěłowej skupinu za wobhospodarjenje wodźiznow, přirodne wočerstwjenje a přirodoškit.

Za dźěći maja hišće městna

wutora, 18. meje 2021 spisane wot:
Němske Pazlicy. Wjacore dyrdomdejske prózdninske přebytki za dźěći a młodostnych chcedźa lětsa w dožiwjenskim campje při Němskopazličanskim wulkim haće přewjesć. Na zajimcow čakaja tam najwšelakoriše zaběry w přirodźe, při wodźe a nad njej. Mjeztym zo su pře­bytki za młodostnych hižo wukniho­wane, maja za dźěći hišće swobodne městna, a to w času wot 10. do 14. awgusta kaž tež wot 24. do 28. awgusta. Internetnje přizjewić móža so zajimcy w syći za dźěćace a młodźinske dźěło pod .

Kołojězby zaso móžne

pjatk, 14. meje 2021 spisane wot:

Wochozy. Po tym zo dyrbješe we Wochožanskim parku błudźenkow 1. meje rostlinska bursa wupadnyć, maja wottam nětko tež dobre powěsće. Wot spočatka měsaca poskićeja wopytowarjam darmotne koronatesty a tež zaso kołojězby po parku, kaž zamołwita za zjawnostne dźěło Anita Schwitalla informuje. Na kóždej jězbje pak smědźa so jenož ludźo z jedneje domjacnosće wobdźělić. Nimo toho dyrbja zajimcy jězbu do toho přizjewić.

54 000 eurow za hrajkanišća

Budyšin. Za nowotwar abo přetwar ­hrajkanišćow přewostaji Budyska wo­krjesna lutowarnja 54 000 eurow. Tule sumu nazběra pjenježny institut z PS-loterijowym lutowanjom. Wo pod­pěru za swój projekt požadać móža so powšitkownowužitne organizacije a towarstwa, kotrež maja sydło na wobchodnym teritoriju lutowarnje. Próstwy hodźa so hač do 21. meje pod zapodać. Wotpowědny formular nadeńdu zajimcy na internetnej stronje lutowarnje.

Pućowacych jutře zastaruja

srjeda, 12. meje 2021 spisane wot:

Němske Pazlicy. Hačrunjež jutřiše wjedro na swjedźenju Božeho spěća po wšěm zdaću na pućowanje njepřeproša, chce Němskopazličanske sportowe towarstwo w swojim wólnočasnym centrumje wonkownu gastronomiju zawěsćić. Wot dopołdnja w dźewjećich witaja tam muži, ale wězo tež žony.

Online do wopomnišća

Budyšin. Na jutřišim swjedźenju Božeho spěća přeprošuje Budyske wopomnišćo na nowy online-wopyt. Přez direktny link pod móža so zajimcy direktnje wobdźělić a njetrjebaja so za to přizjewić. Barbara Pohl a Ulrich Ingenlath rozprawjetaj wo Budyskimaj jastwomaj za čas nacional­socialistiskeho režima.

Nadźija na poradźenje

wutora, 11. meje 2021 spisane wot:

Budyšin. Budyski twarski decernat so wjeseli, zo chcedźa Budyšenjo swoje domy­ na dnju pomnika zajimcam zaso wote­wrěć. Město so mjeztym 28 lět na akciji wobdźěla. Po lońšej přestawce budźe­ tónraz składnosć so wobdźělić. Cyłoněmski dźeń wotewrjeneho pom­nika wotměje so 12. septembra. Potom móža sej zajimcy městnosće wotkryć, kotrež zjawnosći hewak přistupne njejsu.

Tónkróć dowěrić

Budyšin. Minjeny čas běchu so husto wobšudnicy, kotřiž so jako zastupjerjo někajkeje firmy wudawachu, ludźom do by­dlenjow dóstali. Tuchwilu pak su w Budyšinje woprawdźe sobudźěłaćerjo Němskeje telekom po puću. Spóznajomni su woni na typiskej drasće předewzaća w barbach šěra/čorna a magenta. Woni móža so ze słužbnym wupokazom identifikować. Wobkedźbujo škitne postajenja woni zajimowanych wobydlerjow sprjewineho města po přeću poradźuja.

nawěšk

nowostki LND